US President, Obama A Mai Party Pawl In An Mawh Thluk

obama_speech_DNC_speech_ap_295US President, Obama cun a Cozah tharih a hnattuanpi ding US Cozah  hna pawimawh  kaitu dingah Mingo mipahlir a ret ruangah a mai umnak Party Democratic sungih mi hrekkhat khalin an mawhthluk zet. tu ah President, Obama cun  Treasury Secretary dingah, Jack Lew a ruatsalih a nihhi US Cozah  mi pawimawh 4 nak a si dingih, US Cozah hna pawimawh kaitu dingih  a retzomi pawlhi mingo hlir an siih hleiah nunau an um hrihlo.

Senator hlun, John Kerry kha Secretary of State, ah a ret zoih  Senator hlun,  Chuck Hagel cu Defence Secretary, ah ret a siih, CIA Director, ah  John Brennan ret a siih,  tuah Tresury Secretary, ah Jack Lwe retsal a si. Himi laiah Labor Secretary nunau, Hilda Solis cun  tuizarh tlawngkai nithum ah khan a baan thu a puangih,  kandung thlakhalah midum nunau Lisa Jackson cun Environment Protection Agence hotulu bikih sinak ihsi a banthu a rak puangzo.                  

Congress ih  hruaitu hlun midum  New York Democrat,  Charles Rangei cun  US Cozah thar hmelcu ttha ih a hmuhlo thu a simih, Congress ih nunau Member hlir umnak NewHam Pshire ih  Democratic Sanator, Jeanne  Shaheen khalin  tutiang thil umnak zoh tikah US Cozah tharcu America ram Cozah  silo vek a bang tiah a simih, Republican Party pawl tlacun President, Obama ih Cozah cu nunau pawl donak ah an puhih, a term hmaisa ah khan  President, Obama ih Cabinet hna pawimawh kaitu pawlkha zaa ih 35% cu nunau an rak siih,  Democratic Party President hlun, Bill Clinton tilo ah cun US President, ttuanzo pawl lakih nunau dinhmun pawimawh leh saangih ret tubik  asi thotho.

Pakistan Bomb Puak Mithi An Tam

BBC, in a sim nakah Pakistan ram Quetta khawpi leh Swat District saklam ih  bomb  voi 4 puakah minung 116 an thiih midang 255 in hriamhma an tuar tiah  asim. Quetta ah bomb voi 3 a puakih bomb puahtu pawlhi  Sunni Muslim Tapung Laskkar-e- Jhangvi pawl an si tiah thuthangca latu pawlcun an sim. bomb puak hmaisabik hi tihni zan zanlam nazi 3:50 hrawng  Quetta ah a puakih hihi Balochistan Province khawpia siih, Afghanistan leh Iran ramri ih um a siih,  ralkap Check Post kiangih puak a si ruangah himi hmunah ralkap 1 telin minung 12 anthiih midang 59  in hramhma an tuar.

Himi bomb hi ralkap Check gate kiang motor hnuai ih kammi a siih Kg 25hrangih rit leh puak nazet  asiih, a puahnak leilung hnuailam feet 2 hrawng leh a kauhlam feet 8 hrawngin leilung a saihparh thluh thei ih, a kiangih Motor 13 leh dawrin leh Office ziangmaw zat pawl a siatter.Himi hnu nazi 2 hrawngah Khuber Pakktun Khawa Province saklam Mingora khua Isalamabad ihsi Km 115 hrawngih hlah Bomb dang a puak leh salih sakhua biaknak Inpi sungih mi zatamtak an um laifang a si ruangah minung 22 an thiiih midang 65 ih hriamhma an tuar.

Himi hnu nazi 3 dan hrang zan nazi 8:50 hrawngah Snooker Club ah a puaksal leh ih Bomb hi Kg 7 hrawngih rit a siih, bomb puah tuhin a thihcilh, cumi hnuah bomb puahnak hmun ih thil umdan zohfiang dingih Palik leh ttuanvo neitu mi pawimawh  pawl an feh laiih a kiangih bomb dang  an kammi  a rak puak sal lala ih mi 81 an thiih midang 121 in hriamhma an tuar, President,  Asif Ali Zardari leh Prime Minister, Pervez Ashrat khalin Bomb puahtu hi nazetin an mawhthluk thu an simih   mithi sungte an tuarpi thu leh hriamhma tuartu pawl tuamhlawm thazet dingih  ttuanvo neitu pawl thu an pecih.

US in Syria Ram Ah Ralkap Kuat Lut A Tum Lo

US Defence Secretary, Leon Pannetta cun  US cun Syria ram buainak leh thil umdan a zoh tikah  Luzin thlakzet sihman sehla tui dinhmunah  ralkap kuat lut tumnak a neilo tiah a simih, Syria ram buainak hi midang kutsungih  daihnak um dingih tluangtei  pek theinak ding lamzin ngaihtu  dingih ram dangdang in ralkap an kuat lutih US khal ralkap kuat lutve dingih dilnak a um a si len  hicu ngaihtuah leh theihding a sithu a sim.

US Defence Secretary cun Syria ram buainak leh umdan cu US cun a zohfiang in a thlir ringring tiah a simih, America ralkap Bawibik  Joint Chiefs of Staff Chairman General,Martin Dempsey khalin  Syria ram buainak ih tursi tel ralthuam hmanglo dingih   an hnattuan rero nakcu a hlawhtling ding ti simtheih a silo tiah a simih, ngaihtuah harsazet a si a ti. US President, Obama cun Syria  President Bashar  al- Assad ih hnenah Tursi tel raltuam hmanglo dingih a rak hrozo ih, hihi Syria  President, Assad in a thlunduh cuanglo a si ah cun America a rolh awkmai a ttul ding tiah US ralkap Bawi pawl cun an sim.

(Visited 110 times, 1 visits today)

Comments

comments

Comments

%d bloggers like this: