US President Brac Obama Ih Thusim Iran Cozah In Zoh Fiang Tum

March 21st, 2009
 
US President Brac Obama Ih Thusim Iran Cozah In  Zoh Fiang Tum
 
Mizan sunah US President Brack Obama cun Nuclear ralthuam tuahtum rero ruangih America Cozah thawi kum ziangmawzat rakrem aw dahlo Iran ram mipi leh Cozah thunei tupawlcu hmaitawnih rualrem nakthu reltlang dingih tawnawk a duhthu a sim. Obama cun President thar asi vekin leitlun ramtinkim rualremzet tei um theinak lamzin thar a hawltum thukhal asimbetih Obama ih thusim mihi White House Website ihsin kuatsuak a si ih Iran mipi in an thei fiangthei nakdingah Farsi ttongih leh mi asi. President Obama cun Iran leh US ram rualpi that awknak dingthu reltlang dingin US cun a thinlung sangka a awng ringring asi ati.
 
Himi laiah Iran ram hotu bik Supreme Leader an timi Ayatollah Ali Khamenei, cun America in Iran hnenih a thinlung putmi ah hmelthar hmuhding a um cuanglo ih President Obama in US Cozah thinlungput a ti danglam asi ah cun Iran cun a thinlung put thlengdanglam a hrehlo asi ati. Ayatollah Ali Khamenai cun an ram TV ih thu a simnakah Iran ramcun America Cozah leh President thar hnenihsin hmelthar danglam hmulo hmansehla Iran ramcun thil umdan fiangzetin a thlir ringring ih cumi vekin lamzin a zawh vivo ding asi ati.
 
Ayatollah Ali khamenei, cun a simbet nakah  America cun a thil timi a thlengdanglamding asi ah cun tongkam lawngmen silo in a tuahmi ah ati langdingih Israel a ttan nakleh Iran a hremnak cu a bansan veve ding asi ati.
 
Iran President Mahmoud Ahmadinejad, khalin  America cun thiltha leh rualrem nak tuah a duh taktak asi ah cun  tongkam lawngin Change Change tilo in an tuahmi parah thiltha an duhnak an langter a ttulih Israel an ttan ringring nakleh Iran a hremnak cu an bansan veve a tul ding a ti.
 
Iran Energy Minister Parviz Fattah khalin President Obama in  Iran mipi ngaithlak nuamzet  thu a simmen ruangah, an tuahnak ih danglam nak hmelthar hmuhding a um cuanglo ah cun, Iran cun Nuclear Programme cu danglam zawngin a hercuanglo ding a ti. Minister Parviza Fattah cun Turkey ih Istanbul a tlawn nakah hithu hi simin, Busher ih Nuclear Plant
cu tuikum ihsin hmanthawk asi dingih hi Nuclear Palant hi US leh European pawlin Nuclear ralthuam tuahnak ding vekin rel khal haisehla, Mipi hmanding Power tuahsuak nakding lawngih hmanding mi asi ati. President Obama ih thusim mihi thil thatzet vek cu banghman sehla Iran Cozah cun a duhmi sawncu thurel men lawng silo in a taktak ih a thiltuahmi langter hi asi ati.
 
Madagascar ram Politics Din Hmun
 
Madagascar ram President Marc Ravalomanana cu ralkap cah nak hmangih hlawnthlak asi hnuah, Opposition Party hruaitu Andry Rajoeline kum 34 micu  President ah retcih asiih, Hipa hin kum hnih sung President a tuanding thu leh an ram danpi tuahtthat asi ding thukhal a puangcih ih, an ram hrilawk nakdingcu an ramdan pi an tuah thluhhnu ah asi ding a ti.
 
Himi laiah Africa Union cun  Madagascar ram Cozah tharcu  Africa Union Member ihsin an hlawnthla ih, Africa Union hnuaiih Peace and Security  Council cun Madagascar ram Cozah thar thuhla hi nazi 2 sung an relkhawm hnuah an Member ihsin hlawnthlak asi tiah an Chairman Burkina Faso Ambassdor, Bruno Nangama  Zidouemba cun a puangsuak. Madagascar ram Cozah tharcu ralkap cahnak hmangih dinmi asi ih Africa Union dan ding lai kalh  asi ruangah an pawmlo thukhal a simbet.
 
Madagascar ram Cozah tharcu  European Union ramleh US Cozah khalin an sawisel zetih Democracy kalh asi an ti, US cun  himi ruangah Madagascar ram mipi harsa pawl a bawmnak khal a titawp sal thluh.
 
India In US Cozah Thu Rawnmi Pawm TumLo
 
NDTV in a simnakah US in India Cozah cu Pakistan ramri tluanih a ralkap tamzet a ret mipawl cu hnukkir saldingin  Foreign Secretary Shiv Shanker Menon hnenah an ngen nakthu an sim tiah an tarlang. US cun India in Pakistan ramri tluanih a ralkap pawl a retmi a hnuhkir salhnu lawngah Pakistan thawi rualrem nak hawlih an biakawk theiding a zumthu a sim.
  
   US Cozah thurawn pekmi ruangah India Cozah cu a lung a awilo zetih, India Cozah cun US thurawn pekmi cu a tuahlo dingthu a simfiangzo. US in India ralkap pawl Pakistan ramri ihsin hnukkir saldingih a duhnak san cu  Pakistan ralkap pawlhi Afghanistan ramih Taleban pawl dopi tudingah  duh hmansehla Pakistan in India ramri ihsi a ralkap a hmuhkir hmaisak hlanlo cu India cun zovekih thurawnpek mihman a pawmlo ding thu a sim..
 
External Affairs Minister Pranab Mukherjee cun nikum Nov, 26 ih Mumbai khawpi siimtu misual pawlcu Pakistan ram leilung ihsi ttanhmun khuar an si ti India cozah cun a pawmhngetih President Bush ih hunlai vekin India leh US rualpi tthat awknak leh laicin awknak  ttha kha President thar Obama in a tuah tengteng ding timi theifiangnak a umhlan sungah cun India Cozah cun US thurawn pekmi a zate in ziangti lamhman in a pawm theilo ding ati.
(Visited 57 times, 1 visits today)

Comments

comments

Comments

%d bloggers like this: