US Milian Pawlin Mi Rethei Pawl Bawm Ding

British PM, Leh Pakistan President, Tongaw

British Prime Minister, David Cameron leh Pakistan President, Asif Ali Zardari cu ram pahnih thu reltlang dingin London ah an tongaw. British PM, David Cameron hin tui naite ih India a tlawn ttumah khan Pakistan ram kaihhruai awkdan cu nasazetin a rak sawiselih, Curunagah Pakistan ram thuneitu pawlhi PM, David Cameron ih parah an lung a awilo zet.

Pakistan President, Asif Ali Zardari hi tuah Britain ramah a caam laiih, a caam sungah PM, David Cameron cu tuihlanih a thurel zomi pawl ruangah  kom tengteng a tumthu a sim. Hi ram hruaitu pahnih hi mizanah khan zanriah an kil tlangih, a sinan ziangthu an rel timicu himi cangan lai tiangah theihfiang nak a um hrihlo ih, tuizan ah an kawmaw salding.

Tuizan ah ziangthu an reltlangding ti theihnak a um hrihlo nan ram pahnih karlakih pehtlaih awknak ttha tuah leh Tapung leh misual donak ih tantlang, leh Afghanistan ramih NATO ralkap pawl ticak danding thupawl an reltel dingah zum a si.

Britain ram thupuangtu cun ram pahnih hotu komawk nakin  ram pahnih karlakih pehtlaih awknak lamzin ttha a suahter a zumthu a simih, kum 2010 leh 2011 sungah  British Cozah cun Tapung misual donak dingah  Pound Million 9  Pakistan hnenih bawmnak a pek dingthu a sim.

Poland Ram President,Thar

Poland ram President, tharah Bronislaw Komorowski kum 55 micu mizansun ah laklut a si. President, laklut nak khawmhi Warsaw ih Parliament House ah an tuahih, Poland ramin zalen nak a ngahhnu ih President, 4 nak a si.

Relzo vekin tuikum April thla ah khan  Poland ram President, Lech Kaczynski leh a nupi cu Russia ramah  Vanzam in an tla thatih, Caan ziangmaw zatsung President, neilo ih an um hnuah kandung thla ah khan President, hrilnak an tuah ih, Bronislaw Komorawski cu President ah hriltlin a si.

Poland ramhi  President, liangpar ih thuneihnak sangzet peknak ram a siih, President, hlun Lech Kaczynski kha thu neihnak hmangdikzet leh hmang thiamzet a si ruangah tui President thar hrang khalah a phur a ritzet dingah ruah a si.

US Milian Pawlin  Mi Rethei Pawl Bawm Ding

United States ih milian cungcuang Billionaire minung 36 pawlcun an thil neihmi a hrekcu mi rethei zonzai pawl hrangih pek an sianthu an sim. Leitlun pumpi ih milian cungcuang Warren Buffeft leh MIcrosoft Company dintu Bill Gates pawlih tlunah New York Mayor, Micheal Bloombery, CNN dintu Ted Turner leh Barry Diller pawlcun  hna kum June thla ihsin an sumpai leh an thil neihmi pawlhi a hrek mi rethei zonzai pawlhnen ih pe dingin an tiamkam.

The Giving Pledge an timi pawlhin mi rethei zonzai pawl hrangih sumpai petu ding nasa zetin an hawlih, milian pawlih umnak Inn ah fehin an thilri neihmi leh an sumpai pawl hmannak ding an sut vivo ih, hiti vekih milian pawlin mi rethei zonzai pawl henih an thiri leh sumpai pak an sian ruangah an parah an lung a awizet.

Milian pawlhin an sumpai thawhding zat leh an thawh duhnak san pawlhi ca in an nganih an kuat. Cumi pawl lakah Film Producer hminthang zet George Lucas khalin an neihmi thilri leh sumpai a hrekhnak ih tamsawn cu tlawngta nauhak pawl hrangih a pek duhthu a simve.

South Korea Ralkap Pawl Raldo Zir Ding

South Korea leh North Korea in ramri an cuh awkih an buai ringring nak hmun  Yellow Sea tipi thuanthum ah South Korea ralkap 4,500 cun  tipi sungih raldo an zirzikih, himi ah South Korea ralkap pawlhin raldo nak Vanzam 50 leh raldo nak lawng 29 an hmangding.

Himi laiah North Korea cun an ramri ih South Korea ralkap pawlin raldo zir an tumcu a duhlo zet thu a puangih, North Korea in an duhlo zet timi theicing ringringih an zir thotho a si ah cun an ram do tlukih an ruah dingthu a puangve.

South Korea Defence Ministry cun an ralkap pawlih raldo zir nak ding hmuncu North Korea thawi an ramri ngaingai a silo ih, North Korea ramri cinah zianghman  buainak tuah an tumlo thu an sim.

South Korea ralkap bawipa in Yonhap News Agency  hnenih a sim nakah an ralkap pawlin raldo an zirding san bikcu an ram Inn hnen pawlin South Korea ih ralthuam neihthat zia leh an ralkap pawlih thiamzia an theihfiang nak dingah a si tiah a simih,an ram hrangih buainak leh harsat nak thlengter tucu an ralkap pawlin an do let veding thu khal a sim.

Isreal Leh Labanon Ralkap -Kapaw

Tihni zanah khan Isreal ralkap leh Lebanon ralkap pawlcu an ramri ah an kapaw ih Labanon ralkap 3 leh Thuthangca latu 1 an thiih, Isreal ralkap 1 a thive. Isreal ralkap leh Lebanon ralkap pawlhi ziangruang bikah an kapaw ti fiangtei theihnak a umlo nan, Lebanon ralkap pawlin an sim nakah  ramri ih Duty Isreal ralkap pawlin an khawcawn nak khamtu zanthingkung hau dingin Lebanon ramsungah an lutih Lebanon ralkap pawlin Isreal ramsungih kirlut dingih an ti hnu khalah Isreal ralkap pawlhi an ramsungah an kir duh cuanglo ih, Curuangah Lebanon ralkap pawlin an hro nakah meithal an hmetpuakih, cuhnu ah Isreal ralkap pawlkhalin an kapcih ve tiah an sim, Lebanon ralkap pawlcun an mah kahtum taktak silo in hro nak menih meithal kap an sithu an simih.Isreal ralkap pawlcu thil tisual tu ah an puh.

Asinan Isreal ralkap pawlcun Lebanon ralkap pawlih thusim micu thudiklo a siih, Lebanon ralkap pawlin an mailam hoi ih meithal an kah ruangah an kahlet vemi a sithu an simve. Himi kiangih UN palai khalin Isreal ralkap pawlhi Lebanon ramsungah an lut a si timi thu fiangtei theihnak a umlo a tiah a sim.

Labanon ramih Muslim Tapung Hezbollah leh Isreal ralkap pawlhi kum 2006 ah khan ni 34 sung an rak kapaw zoih, khami an kahawk nak sankhal Hezbollah pawlin Isreal ralkap pahnih an kaih ruangah Isreal ralkap pawlcu Lebanon ramsung va lutin a vasiim ruangah a si.khami tumah Isreal ralkap 45 an thiih, Hezbollah ralkap leh Civil mi 1,000 lenglo an rakthi ih Lebanon ram khawpi Beirut ih minung umnak Building tamzet khal Isreal ralkap pawlin vanzam in an kapsiat thluh.

Tu ih hiti vek boruak thalo an karlakih an suahsal ruangah an karlakah buainak sosang a suaksal pangding tihi UN khalin a phangzetih, ram pahnih in kum 2006 ih ralthuam retih remnak thutiam an raktuahzomi thlun hramhram dingin UN Security Council cun mizan sunah a ngen.

Isreal in Gaza A Kap

Mizanzing khawvang zawngah Isreal ralkap pawlin  Gaza ih Palestinian pawlih umnak Khan Younis khaw kiangih Palestinian  pawlcu Rocket in an kapih minung 1 a thiih, midang 3 in hriamhma an tuar.Isreal ralkap thupuangtu cun Isreal ralkap pawlin an ramsungih lutruk tum an hmuh ruangah an kap a si tiah a simih, Gaza thlanglam paltlangih  Isreal ramsung luhruk tum pawlcu tuihlan khalah Isreal  ralkap pawlcun an kap theu a si tiah a sim.

Isreal ralkap pawlcun  an ramsungih luhruk tumpawlin a thuptei Isreal ralkap pawl kah leh rukhlo leh Isreal ramsungih Bomb puah an tum ringring tiah an sim.

Tui naite hrawng ihsin Isreal leh Gaza ih Palestinian tapung Hamas pawlih karlak boruak hi a sezetih, tuikar tlawngkai ni1 khalah Gaza ih Palestinian Tapung Hamas pawlih zummi pawlin  Isreal ramsungih Sinai, Eilat, Red Sia, leh Jordan pawlcu Rocket in an kapih minung 1 a thiih, midang 3 in hriamhma an tuar. Kandung zarh tlawngkai ni 5 leh zarhte ni khalah Isreal ralkap pawlin Gaza ih Palestinian  tapung Hamas pawlih umnak cu raldo nak vanzam in an kapzo.

Rocket in Isreal An Kap

Isreal ralkap pawlin an sim nakah mizan sunah khan  Tipisen ih colh an hman theunak hmun Eilat Holyday Resort hnarcu Egypt  ramih Sinai thlaler ihsin Rocket in voi 5 an kapih, Rocket pakhat cu Jordan lawngcolh nak hmun Agaba kiangah a tla ih, minung 4 in nazetin hriamhma an tuar tiah an simih, Rocket dang tlaknak hmunah cun hriamhma tuar an umloih, Rocket pakhat cu tipisen ah a tla tiah an sim.

Hithu thu Egypt Cozah cun an ram sung khuitawk hmunkhal ram dang kah nakih hman an sianlo thu an simih, Isreal in Egypt ram ihsi an ram kap vekih an puh nakcu thudiklo leh thuphuah cawpih buainak leh doawk nak suahter an duh ruangah a si tiah Egypt Cozah cun Isreal a puhveih, Egypt Cozah cun an ramri cu thazet in an ralkap pawlin an kil ringring thu leh thilsual tuah misual zohman an umlo  thu an simve.

Himi laiah mizan sun simlam ah khan  Gaza ih Hamas Tapung hotu Commander, Alaa Al- Danef ih umnak Inn ah Bomb cakzet a puakih, minung 20 ih hriamhma an tuar. Hamas pawlcun himi Bomb puahtu ah Isreal Intelligence pawl an puhih, mizan sunih Isreal ramsung Rocket ih kah a si ruangah phuba laknak a si dingtiah an zumthu an sim. Asinan  Isreal cun himi bomb puakih an hnam hnawih awklo thu an simve.

Comments

comments

Comments

%d bloggers like this: