US Leh South Korea Ralkap Raldo Zir Tlang Ding

Kosovo Ram Thu I C J in A Rel Ding

Serbia ram ihsi la hranaw Kosovo  cu mahte rorel thei naknei ram pitling ih pawmding leh pawmlo dingthu International Court of Justice (ICJ) in a ngaihtuah ding. Kosovo hi Serbia ram ihsi mahte rorel theinak neiih lak hranawk tumin kum ziangmaw zat sung a raksualih, kum 1999 ah khan Kosovo ih Serbia ralkap um pawlkhal dawisuak thluh an raksi.
Himi hnuah UN cun Kosovo  ah hin palai a retih, an ram rorel nakcu UN kut hnuaiih ih um a si. kum 2008 February thla ih an ram hrilawk nak ih an ram hotu pawlcun Kosovo cu mahte rorel theinak nei ram pakhat a si tiah an puangih, hihi Serbia Cozah cun dankalh a si thu leh Kosovo cu Serbia ramsung a si thu an puang cihve ih, an buainak relfel dingin UN ah thu an thlen a si. Himi thu hi UN khalin an ngaihtuah ih  UN in ram dangdang ngaihdan a lakkhawm nakah UN Member ram 192 sungah ram 69 cun Kosovo cu mahte rorel theinak nei ram pakhat si dingin an pawm.
UN Member ram pawlih hleiah  Europe ram dangdang pawlkhal Kosovo ram thu ah hin an ngaihdan a bangaw lo nasa ih, Curuangah International Court of Jistice cun himi thuhi a ngaihtuah ding a si. Himi laiah UN hnuaiih, Kosovo Protection Force hotu, German General, Markus Benther cun  Kosovo cu  zo ih ramkhalin  tibuai a thinglo ih, Kosovo ram zalen nak dingah cun  a hoha mi ralkap pawlcun  dung ansip dahlo dingih, mi ih hronak men ruangah a thinglung a danglam lo ding tiah a sim.

US Leh South Korea Ralkap Raldo Zir Tlang Ding

Tihni sunah khan US Secretary of State,  Hillary Clinton cun  South Korea a tlawnnakan tuikum March thla ih South Korea raldo nak lawng North Korea in a kahpil sak ruangah US cun North Korea cu hremnak a pe beet ding tiah a sim. US in North Korea  hremnak a pekbeet dingmi ah ralthuam thilri leh Vanzam, Motor leh thilri pawimawh dang pawlcu North Korea in ramdang ihsin a laklut leh a khuatsuak a harsa thlang ding a si a ti.
Hillary Clinton cun North Korea Cozah thinlung put diklo ruangah an ram mipi pawlih harsat nak an tuarih, North Korea Cozah in an  thinlung putdan an thleng duhlo a siah cun US cu South Korea lamah a ttang ringring ding a si tiah a simih, US in North Korea hremnak pekbet a tumnak sanhi an ram mipi pawl hnenih harsat nak thlenter duh ruangah a silo ih, an Cozah thinlung thlengter duhnak ruangah a si tiah a sim.
Hillary Clinton hin South Korea leh North Korea karlak ramri fimkhur zetih an kilnak hmun khal a fehih, a mah thluntu US Defence Secretary, Robert Gataes khalin  South Korea an fehnak sancu ram pahnih karlak pehtlaih awknak tha sinsin a um thei nak dingah a si tiah a simih, North Korea ram Lalpa Kim Jong il in a fapa hnenih thu neihnak a pek cingtum ruangah tui naite hrawng ihsin North Korea thinlung hi a kawi zawngin a feh a si tiah a simbet.
Himi laiah US ralkap leh South Korea ralkap pawlcun tuizarh colhni sun ihsin  Sea of Japan  tipi thuanthum ah nili sung raldo an zirtlang dingih, himi ah US raldo nak lawngpi Nuclear ralthuam phur Aircraft Carrier USS George Washington leh Raldo nak Vanzam  Aircraft 100 leh ralkap 8.000 hrawng an teldingih, Cumi hnu ah  Yellow Sea tipi thuanthum ah raldo dan an zirtlangbet ding, Yellow Sea hi  Korean Peninsula khawthlang lamih um a si.
US leh South Korea ralkap pawlin raldo an zirtlang nak dinghmun hi China Cozah cun ramdang ralkap pawlin  pal tlakai lo haisehla a duhnak hmun pawimawh a siih, China Foreign Ministry, thupuangtu, Qin Gang cun  himi tipi thuanthun ah cun ramdang ralkap pawlin an cah nak leh an thiamnak pholang lo in leh mi hringhro zawngih umlo dingin a ngen hai.
Hillary Clinton ih thusim mihi North Korea  Cozah thupuangtru, Ri Tong il cun a letcih ih, South Korea lawng pilnak thu ruangih US in North Korea hremnak a pe a si ah cun  UN dankalh a si dingih, UN thusuah mi US in a pahbal tinak a si ding tiah a simih, US ralkap leh South Korea ralkap in raldo zirtlan an tum mikhal boruak tthalo a suak sawn pangding ti a phanthu a sim

(Visited 63 times, 1 visits today)

Comments

comments

Comments

%d bloggers like this: