US Le North Korea An Dinhmun A Sosang Vivo; Thuhla Lawr Khawm

Salai V Bawi Lian

US rampi rorelnak ih hotu lu US Senator 100 lenglo cu US rorel inn pi ah an tongkhawm aw ih North Korea tlun ih an celek danding le thil thalo a tuahmi tlun ah khamnak nasa sin nei bet ding an rel.

United State in Korea tipi thuanthum vaukam ah remdaihnak le nuclear thacaknak pawl ti reh dingin kan ralring. Kan tumtahmi pawl hlawhlting dingin remawknak tuah dingin kan ong aw. Cumi rualrual in kan ram, kan mipi le kan lamtang pawl kilhim ding khal kan ralring tiin Secretary of State Rex Tillerson le Defense Secretary Jim Mattis le Director of National Intelligence Dan Coats pawl cun an sim.

President Trump ih tumtahbik mi cu North Korea ih nuclear, phukpi (ballistic missile) pawl cemter ding, sumtuahnak thu ih rikham cin pawl fekzet ih kaihhnget ding pawl tla an si.

North Korea in a nuclear thacahnak pawl a tisin sallonak dingah US in an ram sung ih puanhlum kuatnak ih sumtuah hrimhrim le North Korea pawl thawi pehpar awtu ram pawl cu a misualhminsinmi ram (blacklists) ah ret dingin a phuang. Ziang mi khamnak pawl a suah bet ding ti cu theih fiang a si hrih lo.

North Korea In ASEAN Ram Pawl Nuclear Ih Thihthluhnak Thawn A Hro

US rampiih a zip rero mi North Korean cun Association of Southeast Asia Nation pawl hnen ah ca kuat in, ralpi thoknak ding hrangih a thoknak tivakap ah kan um zo tiin an ti. Culawng siloin an mahlam ih a tanglo tu pawl cu Nuclear ih thahcimit dingin a hro bet.

An cakuat hi North Korean foreign minister Ri Yong-Ho cun ASEAN ram 10 pawl hnenah, Korea Peninsula ih US ralkap pawl cangvaihnak thu ah an zaten, nornak rak tuah cio dingin a ngen hai.

ASEAN ram pawl cu Myanmar, Thailand, Cambodia, Lao, Vietnam, Philippine, Brunei, Singapore, Indonesia, Malaysia pawl tla an si. North Korea naihniamtu bik ram hi Combodia le Laos pawl an si.

North Korea In US White House An Kap Puak Lai Video Lem An Suah

North Korea in a mipi cokphurnak hrang le thinteu dingin White House inn pi an namnuai lai zuknung lem cu April 27 ni ah a ti suak. An zuknung tisuak mi ahcun ‘kan ral pawl cu kan mithmuh ah ti siatsuah an si ding’ ti in an tarlang.

Hi video hi Trump in a ralkap pawl Korea tipithuanthum ih a kuat mi le, South Korea pawl thawn tangtlang ih an ralthuam thacaknak pawl rak khamdai theitu THAAD bun ding thu pawl, an ram tlun ih sumtuah rikhamnak China ih a neih mi thu le hla pawl thawn a pehpar thluh tiin leitlun ralthiam thlithlaitu pawl cun an rak sim.

Hi video hi Meari lole Echo timi website ihsin thanzainak an tuah. An zuknung pawl ahcun White House inn zuk a lang ih cumi thluh ihsin vanzam pawl in cui inn pi an bitum lai pawl a siih vanzam pawl cun puak thei a phunphun thawn an phom; cule a hnui ah ca ra lang in ‘kan ral pawl in karkhat te in rak nam hmaisa tik can ah’ tiin an tarlang. Minute 2 le hrek tluk te lawng rei mi asinan, April 15 niih, North Korea ralkap thacaknak pawl pholangnak ih ralkap burpi, an ralthuam an kah lai zuk pawl tla a tel cih.

An ralthuampi pawl an kahlai ih a dunglam thlaam te ah hitin catlang an ngan sal ; ‘leitlun ah nuclear thacak le hmunhla kahnak meithal thacaknak thiamang a tuahtheitu le a hruaitu kan lo hmuh ding’ tiin an ngan.

– ST, Agencies, BBC

Comments

comments

Comments

%d bloggers like this: