US khawpi 70 ah lamzin zawhnak a thleng

US khawpi 70 ah lamzin zawhnak a thleng

Kan dung zarh May 01, 2010 (May day) ah US ram ih Arizona state khawpi Los Angeles ahcun mi 60,000 lai in US acozah hnen ah ‘Arizona in daan a tuahmi pawl zohsal dingin’ dilnak an aupi ih, khawpi sung ihsin tipi kap tiang mipi an au celcel a si. Khawpi dang ahcun ram dangmi USA ih kum tampi rak um zo pawl cun anmai’ suahkehnak ram thantaar (flag) an keng na’n Los Angeles ih ram dangmi pawl cun US flag lawng an fehpi. Cucun ram dangmi, US ih ra lut pawl, US ram mi sinak co thei lo cingin US parih rin umnak lengter duhnak a si thei tiah palik hotu pawl cun an sim.

Arizona State hnuai ih daan thar an tuahmi cun ram dangmi zokhal, US ram mi sinak nei lo pawl cu US ram mi vekin zoh an si thei lo ding ti a si ruangah mi tampi cun ninghang riahsiazet in acozah hnenah zaangfah an dil. Buainak zianghmana  suak lo na’n mi pakhat cu kaih a si. Los Angeles khawpi uktu (mayor) Antonio Villaraigosa khalin hih lamzawhnak hi a telpi ih, Illinois state ih Democratic law-maker pakhat Luis Gutierrez tla White House kiangih lamzawhnak ah palik in an kai. Hrekkhat cun “Obama, in thei hram aw”,.. “Kan zawnzaihnak hi kan thihpi ding”… “Zahpi umzet Arizona”… “Milai zate’n bangrep ih tuahmi kan si” timi pawl cu cangan tumpi (slogan) in an keng. – AFP

March thla danglambik neitu 2010

US ram ih National Climatic Data Center cun kum zabu (20) nak sungah kumtin March thla cu leilung a satbik caan a si ih, 1901 ihsin 2000 tiang March thla sungih leilung sat daan hnakin 2001 ihsin 2010 sungih a sat daan cu 2.45 degree C a si ih, tipi thuanthum sat daan cu kum zabu (20) hnakin 1.4 degree C a si tiah an ti. Cuhlei ah 2010 kum March thla cu kum zabu (21) sungah a satbik caan a si bet. – dpa

Taiwan ah Hnihsuak Ni an tuah

Taiwan ram ih ‘Hnih duh pawlkom pakhat (laughter club) cun kan dung May 02, 2010 ah ‘World Laughter Day’ timi cu an hoha thei. Himi Ni ahhin Dr. Sun Yet Sin Hall hmai ah mi (200) hrawng cu an pungkhawm ih, pakhat le pakhat cu hni siamsi te’n an zoh awk ti a si. Culawng si loin, zapi hmai ah hnisuak capoh sai phah ih ‘hlasak zuam awknak (gibberish singing) an tuah. Mi tampi a hip ih, “harhdamnak hrangih thil tha’ titu an um lai ah ‘atthlak za ngaingai (silly) a si’ rak titu khal an mal lo. Laughter Club hi ‘Yoga’ phun deuh ih feh an rak si ih, 1995 ah India ram ih Madan Kataria cun a rak dinsuak. Kataria cun, “Milai vei khat kan hnih (laught) ahcun kan taksa, thinlung le thlarau tiangin a thathnempi ih, kan danglam thluh thei a si. Cun, kan taksa ruakpum a danglam ahcun kan hrangah leilungpi khal hi a danglam thei a si” tiah a ti. – dpa

Kut Bul Black Belt Zuamawknak Ah Tel Ding

Massachusetts (USA) fala pakhat Radziewicz 32, Suahthlak ihsi kutbul, cangvai tha theilo cu tumruhnak nasazet thawn hmai thla ih Peobody ih Mccorry’s Martial Art zuamawknak ah a tel ve tum thu thuthangca ah a tarlang ter. A zirhtu McCorry cun Radiziewicz vek ih kuatthiam le cangvaih thiam a hmuh hrih lo thu khal a rel tel bet. Radiziewicz hi mi maksak pakhat a sinak cu kum 23 a si ah a ke thawn mawtaw mawng theinak license a rak ngah thei.

(Visited 96 times, 1 visits today)

Comments

comments

3 Comments

  1. nan thu thang lak nak source a hman ding ti cu ka zum ko nan khaw hmin leh state nan ngan mi hi ka thei thiam lo Arizona state ah Los Angeles a um lo ih California State sawn ah a si. thu nan ngan le fiangfai deuh in ngan thei tum uh la a duh um zet.

  2. Hre Uk, Los Angles says:

    Los Angeles ah ka um ih ka khua Los Angeles (City of Angels) cu Arizona state sung ih khua ah in ret sak cu pawi ve si. Thuthang la tu le ngan tu pawl khal hi an ti sual can cu a um ve kei cu mi nung si sung ah cun.

  3. Salai Biak Chawn says:

    Si ngai…
    Siartu pawl hnen ihsin ruahnak thatha kan ngah ih, lungawi um zet..
    Arizona state le Los Angeles khawpi timi ka ngan lai ah, website ih thlah dingin ‘Words’ ah ka paste sal tikah manhlap deuh in kan rak copy ih, cafang pahnih thum (a karih um) a rak hlo pang a si ding. Cun, rem sal dingin tikcu a um lo ruangah a ngantu le website ih thlahtu kar ah information pek awknak can a um nawn loih, Arizona state sungah Los Angeles khawpi a rak um pang mi a si.

    upatnak thawn…

Comments

%d bloggers like this: