US Ah Nunau Pakhat That Ding

Obama Thurawn Petu, Larry Summers A Baang Ding

US ram sumpai dinhmun tuahtthat nakdingih President, Obama thurawn petubik leh Obama khalin a rinsan bikmi Larry Summers cun himi hna ihsi tuikum  kum cemzawngih a banding thu a puang. Larry Summers hi US ram sumpai dinhmun a tlaksiat laikhal ah a tuahtthat danding tawlrel tu ah President, Obama khalin a rinsan bikmi leh mifim felzet a si tiih a fak zetmi a si.

Larry Summers hi ziangruangah himi hna ihsin a baangding tihi mipi thusuh awknak bik a siih,  himi hlanah US Budget Director, Peter Orszaq khal tuikum July thla ah khan a rak baangzo ih, Council of Economic Advisers Chairman, Christina Romer khal tui thlatir ah khan a rak baangzo.

Larrt Summers hi himi hna a ban hnuah Harvard University ah a ttuan dingih, Larry Summers cun sumpai thuhla ih US ram hotu bik thurawn pethei tu dinhmunih a dingban cu lungawi um a tithu a simih, hnadang thar a ttuanhnu khalah an ram sumpai dinhmun ih a tuah theimi a um a si ah cun a pumpek awk ringring thu a simih  President, Obama cu hna ttuanpi nuam a tithu khal a sim.

China in Pakistan Ram Ah Nuclear Power Plant A Bun Ding

China National Nuclear Corparation (CNNC) Vice President, Qiu Jiangang cun China in Pakistan ramah Electric Power gigawaat 1 pesuak theiding Nuclear Power Plant bun dingin  Pakistan ram thu neitu pawl biakfel thluhzo an si tiah a sim. Asinan khuitawk hmunciah ah an bunding ti leh himi thuih rualrem awknak an tuah dan pawlcu a relfiang duhlo.

China National Nuclear Corparation (CNNC) hin Pakistan ram Punjab Province ih Chashma ah Nuclear cah nak hmangih Electric Power tuahsuak nak hmun 2 an rak bunzo ih, himi hmun thotho ah  Electric Power Magawatt 300 pesuak thei  Nuclear Power plant dang 2 bunbet dingih  Pakistan ram thu neitu pawl thawn lungkim tlangnak an tuah fel thluhzo.

US Ram Thu Neitu Pawl Lung Rual Lo

Bob Woodward ih Cauk nganmi New York Times Thuthangca in a tarlang nakah Afghanistan ramih US ralkap pawlih raldo leh an hnattuan vivo danding thuah US ram hotu pawl an lung a ruallo tiah a tarlang.hi Bob Woodward Cauk hin President, hlun George W Bush in  Iraq ram a do tumdan leh a thilti tumdan pawlkhal a rak tarlang zoih, Himi Cauk sungih nganmi Afghanistan ramih US ralkap hna ttuan dandingah US thu neitu pawl an lung a ruallo ticu New York Times thuthangca cun a tarlangnan  Obamas War’ tiih a ngan micu New York Times hin a tarlanglo. Asinan Obamas War timi thuhi a thupten an thehdarh rero zo tiah a tarlang.

New York Times ih a tarlang nakah Afghanistan ram ih US ralkap hna ttuandanding thuhla ih US hotu pawl an lungruallo nak bikcu  Afghanistan ramah US ralkap 30.000 kuatbet ding thu leh Obama in hnakum tthalah Afghanistan ramih US ralkap pawl lakkir sal thluhding timi thuah a si.

Himi thuah Afghanistan leh Pakistan ram ih ttuanvo neitu US palai an retmi Richard Holbrooke khalin  President, Obama ih thilti danhi a pawmpi lo ih hleiah  Afghanistan ramih US ralkap hotubik General, David Patreaus khalin  Afghanistan ramih US ralkap pawlhi cuti lokmai ih laksuah theih asilo thu  President, Obama hnenkhal ah a simzo tiah a tarlang.

Asinan President, Obama hin a hnuai lamih hnattuan pawlih thuhi a bengkhawn tuk lemlo tiah a tarlang. Himi ih tlunah US Intelligence tumbik CIA khalin mipi ih theihlo dingin Afghanistan ramah Intelligence leh hnattuan tudang pawimawh minung 3,000 a ret tiah a tarlangbet.

Palestinian mi Pakhat Kap That

Mizanzing ah khan Isreal Cozah in mikhual colh hahdam nakding hmunih tuah a tumnak hmun  East Jerusalem ih Palestinian pawlih umnak hmun  Silwan ah Isreal ralkap pakhatin  Palestinian minung 1 a kapthat. Silwan ah hin Isreal leh Palestinian pawlhi an buaideuh ringringih, tui kandung naite ah Isreal pawlin Palestinian sungkua 22 umnak In cu siahbal sakin mikhual colh hahdam nak hmunih tuah an tum ruangah  buainak hi a sosang thar vivo a si.

Mizan zingah khan himi hmunah Isreal pawl leh Palestinian pawl hi lungto in an dengaw ciamco ih, himi buainak hmunih feh Isreal ralkap Motor cu Palestinian  pawlin lungto ih an rak den ciamco ruangah Isreal ralkap pakhat cun a thinthok in Palestinian  pawlhi a kapih minung 1 a thiih, midang 2 in hriamhma nazet an tuar.

US Ah Nunau Pakhat That Ding

Thaisunah  US Virginia State ih nunau pakhat Teresa Lewi kum 41 micu thihsi ih dawhthat a si ding. US Verginia State ah hin kum 1912 ah midum nunau pakhat Virginia Christian kum 17 micu Electric tohkhan ah toter in thah a sizo. cumi hnulam ah tui nunau hi Cozah court dan vekih nunau an thahsal hmaisa bikmi a si ding.

Hi nunau thih hngakih umlai nu Teresa Lewi kum 41  an thah nakding sanhi a pasal leh a pasal ih fa hmaisa cu Insurance sum dollar 3,50,000 cu a mai cothluh a duh ruangah an pahnih ih that dingin midang pahnih a ruaiih, hi thuhi  a mah khalin Court hmaiah a phalo.

Hi nunau in a pasal leh a pasal ih fa thatdingih a sawmmi minung 2 hi Rodney Fuller leh Mattheu Shallen Berger ansiih, Walmart dawrih a hmuh hmaisa bikih sin a ngaizawngih Saller Berger kum 22 mihi a mah in a ngaizwngih a fanu kum 16 micu Rodney Fuller kum 19 mi a ngaizawngter,  Cumi hnu kum 2002 ah  a pasal leh a pasalih fapa cu Pittsylvarnia ah  kahthat an si.

Afghanistan Ram Ah Helicopter A Tla

Mizansun ah khan Afghanistan ram thlanglam ah NATO ralkap pawlih to nak Helicopter a tla ih, NATO ralkap 9 an thiih, midang 3 in hriamhma an tuar. Helicopter tlaknak hmunhi International Security Assistance Force (ISAF) pawlcun an simfiang duh hrihlo ih, mithi leh hriamhma tuartu pawlih hminkhal an sungkhat pawl theihter hlanah cun puanzar an rem tilo,

Hi helicopter tla ih hriamhma tuartu pawlhi  Afghanistan ralkap 1 NATO ralkap 1 leh America  Civil mi 1 an si tiah an simih, hi helicopter tlaknak sanhi theihfiang nak a umlonan Tapung pawlih kahthlak micu a silo tiah an sim.

Tu ah hin Afghanistan ram sung Tapung pawl dotu ram ralkap 3.00.000 lenglo pawl bawmtu dingah ram dangdang NATO ralkap hi 1,50,000 an umbet. tuikum sungah Afghaisntan sungih Tapungpawl kut tuarin NATO ralkap 529 an thizo.

North Korea Ram Hotu Pawl Tong Aw Ding

North Korea ram Cozah nak kailai tu Workers Party hruaitu pawlcu an Lalpa Kim Jong il ih hoha nakin tuithla ni 28 ah tonkhawm awknak an neiding. Himi ttumah Kim Jong il hin a mah thlengtu ding a mai aiawh ih an ram hruaitu dingih a ruatmi hmin a puansuahzum a si.

North Korea ram Lalpa Kim Jong il kum 68 mihi a harhdam naklam a tthat tuk nawnlo ruangah a mai aiawh tu ah zoha a retding tihi leitlun ram tampi in an thlir ringring mi a siih,thuhla fiangcu an um hrihlo nan a mai fapa Kim Jong Un a retdingah zum a si.

Tui North Korea ram Lalpa Kim Jong il khalhi kum 1980 ih an  Party hruaitu pawl tonkhawm awknak ah  a pa Kim il Sung in a mai aiawh tu dingih a rak hrilmi a siih, kum 1994 ih a pa a thih ihsin tutiang Kim Jong il hin North Korea ram a run uk a si.

Comments

comments

Comments

%d bloggers like this: