Upat Hmaizah Tlak

March 26

TlawngKai Ninga

Upat Hmaizah Tlak

Siar:

Filipi 2:19-30

Amah cu Bawipa ih sungah kan unau a si ih lungawi aipuang te’n rak cohlang uh. Amah bangtuk minung cu hmaizahnak pe uh. -Filipi 2:29

Kumkhat Sung Baibal:

–   Joshua 22-24

–   Luka 3

Super Bowl XLII den puai hlante ah, Walter Payton NFL ih pekmi Man of the Year timi kum khat sungih a tthabik ih lektu laksawng cu Arizona ih Catholic Pathian hnattuantu pakhat a simi Cardinal Kirt Warnar in a ngah. Amah thawn lek tlang mi lakah bualrawn sungah siseh, bualrawn lengah siseh, pehtlaihnak le cangvaihnak ah a ti tthabik. Warner cu pumpek aw theizet mi Khristian a si ih, “Pathian in midang thinlung dengkhawng theimi mangbangza nunnak i pek” a ti. NFL lektu zate laksawng pek an si cio nain anih ih danglam hleicetnak cu midang hrangah pumpeknak le nun hlan awknak a neihmi a si.

Hnattuantu inn ah upatnak thawn va leen cu thu thar a si lo. Paul in Filipi mi pawl hnenah Khrih ih hnattuan dingah pum a pe aw mi pawl hmaizahnak pek ding thu a sim. An rualpi Epaphroditus khal Khrih hrangah hna ttuan in midang a riannak ah natnak thizik a tuar thu khal a sim (Filipi 2:30). Ziangti’n an let kir? “Amah cu Bawipa ih sungah lungawi aipuang tein rak cohlang uh, hmaizahnak pe uh” tiah Paul in a ti (c.29). In Runtu pa ih hnattuannak ah pum a petu pawl  thuhla kan ruah tikah, anmah cu ttihzah upat le lomtlak mi an si.

Thlarau hrang hnattuantu pawl hnenah lungawinak na langter lo ding maw? An co ding tlakmi upatnak pe aw.

Upat ding timi cu ttihzahnak langter a si,

An ttul mamawh tuah sak, midang thapek;

Tuahnak le ttongkaa in duhdawt a si.

Pathian hnattuantu kan sunloih tikah Pathian kan sunloih a si.

(Visited 25 times, 1 visits today)

Comments

comments

Comments

%d bloggers like this: