UNO In Aung San Suu Kyi Suah Dingin Ngen

Russia In-India Nuclear Fuel Pe Ding

India Cozah ih Department Of Atomic Energy leh  Russia ih TVEL Corporation cun Nuclear Fuel lei awknak thuhla ih remnak thu an raktuahtlang zo vekin Russia cun India hnenah Nuclear Fuel cu a kuat lut thlangdingih, hi an sumdawn tawn awknak dinghi US dollar Million 700 manhrawng asi ding. India ram Hyderabad ih Nuclear Fuel Complex (NFC) ai awhtu pawlcun Russia ram Electrostal khua ih Machine-Building Plant ah India ih leidingmi Nuclear Fuel Metric Tonne 30 khal anrak zohfelzo, Tui  Nuclear Fuel an lakluh dingmi hi Tamil Nadu ih Kudan Wer Nuclear Power Plant nakah an hmangding tiah an sim.

UNO In Aung San Suu Kyi Suah Dingin Ngen

UNO Working Group cun  Burma ramih Opposition hruaitu Aung San Suu Kyi  lengsuak theilo ih Ralkap Cozah in an hrem ringring cu International Law leh Burma ram danpi kalh asi tiah a puang, UNO Working Group cun Aung San Suu Kyi cu a zamrang theibik ih suah dingin Ralkap Cozah thunei tu pawlcu an ngenbet, Aung San Suu Kyi hi  a liamcia kum 19 ihsin kum 13 sungcu lengsuak theilo in Ralkap Cozah in an hrengtar ringringih, Himi ruangah UNO cun a tuahdah tuklo mi  Burma ralkap hotu pawlcu dan pahbal ah a puan nak asi.

Burma ralkap Cozah in Aung San Suu kyi thawng a thlak ringring nakih a tansanbik mi dancu  State Protection Law 1975 vek asilen a zawnzawn in kum 5 hnakih tam thawngthlak theih asilo tiah UNO Working Group cun a sim. Washington ih um Aung San Suu Kyi ih Lawyer, Jared Genser cun  UNO working Group ih ngennak cu Burma ralkap Cozah cun zianghman ah a siarlo tiah a ti.1962 ihsin Burma ramcu ralkap thuneih nak hnuai ih ummi asiih tuah hin Politics ruangih Thawngtla minung 20,000 lenglo thawng Inn sungah an umlaiih himi pawlkhal zamrang tei suahdingah UNO Working Group cun ralkap hotu pawl cu a ngenbet.

Iraq Ram Ah Bomb Puak

Mizan sunah Iraq ram Baghdad khawpi ihsi Km 130 ih hla Jalawla khua ah thihcilh Bomb a puakih minung 25 an thiih midang 50 lenglo in hriamhma an tuar, Hi thihcilh Bomb hi Kurdish pawlih mithi phum nakhmun ih puak asiih   Bomb puahnak venghi Kurdish, miphun Shiite Muslim pawlleh Arab mi Sunni Muslim pawlih um khawmnak hmun Al-Qaida pawlih hmunpi asi. Jalawla khaw lalpa Mohammed Osaman cun hi Bomb hi mithi phumnakih minung tamzetnak hmunah Bomb paitu hin a tipuak asi tiah a sim.

Mizansun thotho ah Baghdad khawpi hnarih Abu Gharib Motor Worshop kiangah Bomb a puak thotho ih minung 8 an thiih midang 18 in hriamhma an tuar.

Israel Ram Politics Din Hmun

Israel ramih  Labour Party hotu Ehud Barak leh Likud Party hruaitu Prime Minister ding Benjamin Natanyahu cun Ttangtlang ih Cozah tuahtlang dingin rem awknak thuthlung an tuahthei zo tiah Israel  Radio cun a sim. Labour Party sungah Kikud Party thawi Cozah tuahtlang duhlo tu an rak um lawk ruangah can ziangmawzat sungcu an rak buailawkih a sinan an mah Labour Party sungah thu relrem nak an neih theisal ruangah Cozah tuahtu dingah an telsal ding a si.

Tui hlanah khan Yisreal Beiteinu Party leh Orthodox Jewish Shas Party pawlcun  Likud Party thawi Cozah tuahtlang ding an rak duhciazo ih. Party dangdang kawmkhawm aw in Israel Cozah tharcu dinsuak dingah beisei asi. himi laiah Kadima party cun Likud Party thawi Cozah nak tuahtlang dingih telcu a remtilozo ih, an Party hruaitu nu Tzipi Livni cun Likud Party thawi Cozah tuahtlang ding hnakcun Opposition lamih um a duhsawnthu a rak simzo.

US Vanzam A Tla

US Federal Aviation Administration in an simnakah Montana ih Buttle ah Vanzam Engine pakhat nei cu a tla ih Minung 17 an thi tiah a sim. Hi Vanzam tla hi California ih Oroville Airport ihsi zuangsuak mi a siih, Motana ih Bozeman ih vur tawlhnak hmun ih cawlh hahdam nakhmun ih fehtum asiih, Pilot hin Bozeman pandingih a sim hnute ah  Buttle ah ttum a tumih Airport Leilung ihsi Feet 500 ihsang ihsin a tla ih Vanzam hi a kangral thluh tiah mitih hmutu Steve Guidon cun a sim,National Transportaion Safety Board Investigator, Kristi Dunks in a simnakah hi Vanzam hi Swiss tuahmi Pilatus PC.12. asi tiah asimih a tlaknak sanbik khal an zingzawi rero lai tiah a sim.

Himi ih hleiah Japan ramih Narita International airport ah thilri phurtu Vanzam Federal Express cu a tlave ih a mawngtu pilot pahnih an thi, Hi Vanzam hin midang a phur tello ih  Airport thuneitu pawlin an simnakah Hi Vanzam hi Guangzhou Airport ih sin zuangsuakin Narita Airport ih a ttum laiah a cangsual ih a kangcih tiah an sim.

India Ralkap Leh Tapung Kap Aw

Jammu and Kashmir, Kupwara District ah India ralkap leh Tapung pawlcu nasazet in an kapawih India ralkap 4 leh Tapung minung 8 cu mizan ah an thibet, Jammu and Kashmir ih India ralkap leh Tapungpawl tuithla ni 20 ihsi an kah awknak ah hin minung 19 an thizo ih, India ralkap thi pawllak ah Major Mohit Sharma khal a telih a nihhi Hafrada Forest ah an kapthat asi.

India ralkap thupuangtu Lt, Col  JS Brar in a simnakah India ralkap leh Tapung pawl kah awknak hmunhi  Kupwara Dist, ih  Shamsabari bialah asiih hi tawkhmunih Tapung tamsawncu ralkap pawlin an kapthat zonan a hrekkhat cu hmun kerkawm mipi lakah an relh lai ih hi Tapung pawlhi Pakistan ihsin ralut ding an rualpi pawl rakhmuaktu leh rakbawmtu dingpawl an si ih Hafrada Forest ah an lut ciamco ih India ralkap pawlin an vahawl nakah Tapung pawlin Meithal Machine gun leh Automatic meithal thazetzet thawn an rak kap hmaisa asi tiah asimbet.

British PM In UK Ram Hrangih Tih Nung Bikcu Al-Qaida

British Prime Minister Gordon Brown cun Al-Qaida leh a thurualpi Tapung tamsawncu Afghanistan ihsin Pakistan ramsungah an tlanlut rero ih Al-Qaida hmunpi bikcu Pakistan ram thlanglam asi tiah a sim. PM hin a simbet nakah Al-Qaida pawlcun UK ramcu siatsuah an tumih UK ramsungkhalah umhmun an khuar reo tithu UK Cozah cun a theizo asi ati. Prime Minister Gordon Brown cun misual pawl do nakdingah UK Cozah cun nasazet in timtuah awknak a neiih, cumi hrangah Contest Two” an timi khal tlangzar asiding tiah asim. Al-Qaida leh a thurualpi misual pawlcu midang ralrinlo laifangih a thuptei mithah leh thihcil hi an biaknak sakhua ih an zirter awkbik mi asi ih UK rampi hrangih lenglam ralpi bikcu Al-Qaida pawlhi an si ati.

Al-Qaida Pawl Kut Ih Sin US Ralkap Him Nak Thupi Bik

US President Barack Obama cun Afghanistan ihsi US ralkap pawl lakkir saldandingah ruahman nak thazet tuah a tul a ti. President Barack Obama cun Afghanistan ah hin US ralkap hi kuatbetsal hmannungna a lakkir sal nakding lamzin thazet tuahdingah White House in a ngaihtuah thatzet a tul ih, Cumi thucu a reihlanah White House in a puangsuak koding ati. Obama cun Al-Qaida leh a thurualpi misual pawlin US ram leh hmundangih US hmun pawimawh an siatsuah lonak dingah  ralring zetih thilfehpi a ttul dingih. Afghanistan ih ralkap an kuatbet naksan cu Al-Qaida leh a thurualpi misual pawl nuaicimit tuding an siih himi ah US ralkap pawlih himnak dingcu thupi bikih ruah asiding ati.Tu ahhin Afghanistan ah US ralkap hi 34,000 an umih himi sungah 17,000 cu tui kandungthla ih Obama ih thupeknak ih kuatmi an si,

UN Human Rights In Israel SawiSel

UN Human Rights ai awhtu Richard Falk cun Israel in Gaza a siim nakih  Gaza mipi dinhmun a zohfiang hnu ah Gaza ih UN Human Rights report cu  Geneva ih UN Human Rights Council ah a pharh thlangdingih himi thu ah Israel ramcu nasazetin a sawisel. UN Human Rights ai awh Richard Falk cun Israel in Gaza a siim nakcu dankalh timen lawngsilo in  International Court hin Israel hi thubuai tuahsak tlak asi ati. Richard Falk cun himi thu zingzawitu dingah Independent Inguiry din a duhthu khal a sim ih Israel in Gaza pannak lamzinpi a phihsak ringring mikhal nasazetin a sawisel. himi ruangah Israel khal UN Human Rights ai awhtu Richard Falk hnen ah hin an lung awilo zetdingah zum asi.  Himi laiah International Red Cross Society leh UN Human Rights Commissioner, Navi Pillai khalin Israel cu Gaza mipi parah a kut a thlak natuk a ti.

Pathian Kan Cah nak.

Comments

comments

Comments

%d bloggers like this: