UN Leh Arab League Palai, Kofi Annan A Baang

Syria ram buainak ih rualrem nak lamzin hawl dingih UN leh Arab League  in pailai ih an thlahmi UN Secretary General hlun, Kofi Annan cu himi palai sinak ihsin a baangih, Geneva ih thuthangca latu pawlin an kawmnakah Kofi Annan cun  Syria ram buainak ih rualrem nak um dingih a hnattuan miah Syria President Basar Al- Asaad a kawm nakah ram dangdang pawlin  rualrem nak suak dingin an tuah dingmi an tuah thatduhlo ruangih a lungawilo thu a simih, Kofi Annan cun a hnattuan mi a thupit tlukin  thlawptu leh ttanpi duhtu a neihlo thukhal a simih, Syria ram khawpi dangdang sungih nitin meithal leh bomb a puak rero ih, hihi  ramdang pawlcun an thlirliam menih, rualrem nak suak dingih  tuah duhmi ngaingai an neilo ih  aruah thu a sim. 

Kofi Annan cun rualrem nak suak dingih thuhla a ruahsuak mi pawl bawhzuipi ih ttanpi duh silo in UN  Security Council ah a maihmin salin  zianghman a tuahsuak theilo tiah mawhthluk  nak tongkam tiang a suak zik phahphah ih, Syria ram  buainak hi a reh theih hrihlo ih nitin minung ziangmawzat thahawknak leh thisen suah nak a thlen rero laiah UN  Security  Council Member ram pawl an lungrual thei silo a ti.

Kofi Annan ih bannak ca hi UN Secretary General, Ban Ki-Moon cun  hrehzet cingin a pawmsak thu a puangih, Ban Ki- Moon cun  ramcak, ramlian leh ram thilti thei pawlih lungrual lo nakin Pu Kofi Annan ih hnatuan nak lamzin an ti harsat cu pawi a tithu a sim. Tuikum February thla ihsi khan Syria ram buainak reh theilo mangbang in UN leh Arab  League cun  Syria ram rualremnak suak thei dingih lamzin hawl dingih  Kofi Annan hi palai ah an thlah ih, Kofi Anan hi Syria ram khawpi Damascus khal voi 3 a fehih, President, Asaad khal tongin  President, Asaad ih hnenah rualrem nak suak dingih thuhla a ruahmi point 6 pawlcu Syria President, Asaad hin pawmpi vekcun a rel aw nan a taktak ah a pawmpi in a thlun duh silo. himi cingin UN Security Council in  Syria ram buainak ih UN  rolh aw dingin  resolution  an tuah micu Russia leh China in veto power hmangin voi 3 rori an hlawnsakin  himi ruangah tutiang Syria ram buainak hi a sosang vivo a si.

(Visited 42 times, 1 visits today)

Comments

comments

Comments

%d bloggers like this: