UN General Assembly Presiden In Israel Le Palestinian Remralsal Duh

UNO Secretary-General Ban Ki-moon in United Nations Secretary General pi ah Palestine pawlih ram an nei theinak ding le Israel pawlin himnak hrangah a netabik thurelcatnak cu nei a cu zo thu 29 November 2012 ni ah a sim. Ban Ki-moon in British sanlai ih Palestine pawl hrang thu tuahsak dah zomi cu lakir in, “Kum 65 liam zo ahkhan, United Nations General Assembly pi ih thurelcatmi 181 nak ah Palestine le Israel ram pahnih ih ramri an tuahsak dah. Asinan atu tiangah cumi relcatmi vekin a um hrih lo. Curuangah an ramhnih ih duhnak a net a thleng thei dahlonak  a si,” tiah a sim. Himi ramri an ṭhensak ni hi 29 November 1947 ni a si. UN General Assembly President, Vuk Jeremic, khalin, “Tuni ahhin Palestine pawl hrang ram um dingin kan ret hrih ahcun leitlunpi ih palhnak nasabik a si ding,” tiah a sim ve.

Mr. Jeremic in, “UN Charter lungkim tlangnak ah, remlonak ruangih doawknak um lo ding le, rampakhat miphun phunkhat in ramdang le miphundang pawl thawn rualran zetin an um tlang thei tiah a um. Bangran ten mai sinak zahumnak dingah le canvo ngah dingah mahten tuah theih a si. Tu dinhmun vek a si ahcun, Palestine million tampi cu farah zetin, Middle East ih um harsat bawmnak camp pawlah an um hrih ding,” tiah a simbet. UN cazin ahcun Palestine raltlan pawl hi million 5 an si.

Mr. Ban Ki-moon in, ” Israel le Palestine hruaitu pawl, atu ihsin nunnak thar, ruahnak thar cu remdaihnak thawn fehpi thlang uh, ti’n lo sawm ka duh. Atu ah tha a  petu kan um. Cun leitlunpi hruaitu  hmuahhmuah, anmah pawlih kumkhua daihnak ding hrangah ramthuhla politic zawngin a cangthei patawp in tanpi hram uh ti’n lo forh ka duh. Mr. Jeremic cun, “Israel le Palestine pawlih kinlan pakhat ih an tong-awsal theinak dingah atu hi tikcu caanṭha a si. 1947 kum ih thurelcatmi tluk tal cu kan tumtah a si,” tiah a simbet. Hi General Assembly pi ah UN ih thlahmi Palestine palai Riyad Mansour, le atufang ih UN Security Council Presidet le India palai Hardeep Singh Puri pawlin thusimnak an nei hrih.

Atufang Palestine ram hi Palestinian National Authority hmin pu in President Mahmoud Abbas in a hruai. Palestine ram ih ramṭhen pawl cu West Bank, Gaza le East Jerusalem pawl tla an si. Palestine pawlin an ram cu UN ih member tlamtling si thei dingah kan dungkum ah dilnak an thehlut ih, ram 193 in General Assembly pi ah an rautkhawm nan relcat ngaingai thei lo. Israel le Palestine in September 2010 ah hmaiton in kinlan pakhat ah thu an reltlang thei dah.

Tukum Nov thla buainak a thok ihsin Palestine pawlin Gaza ihsin Israel cu an kap ih, Israel in vantlun ihsin an ruulsal ve. Buainak a thokih ni 8 a  rei hnuah Palestine mi 158 (mipi 103 tel in) an thi ih, a malbik ah mi 1,269 nasa taktak in hliamhma an tuar. Palestine rocket pawl ruangah Israel mi 6, ralkap 2 le mipi 4, an thi ih, mipi tamtuk tel in mi 224 in hliamhma an tuar.

Comments

comments

Comments

%d bloggers like this: