U Ko Ni Thattu In A That Tertu A Phuang; Zo A Si

Salai V Bawi Lian

National League for Democracy (NLD) daan thiamsang U Ko Ni thattertu cu a thattu pa in a phuang. Hi tiih a phuannak palik pawl ih an ngan khum mi cu viber in palik pawl in an kuatawknak ah midang pawl in an raklaksak ngah ih cutin cathup cu phonlang in zatlang senpi hnen ah a thleng.

Palik pawl ih an ngan mi, mi kapthattu pa ih thuhla hi cahmai 5 a siih, mi dang pawl in online parih an rak ngah mi hi a dik a si tiin Naypyidaw palik bawi cun an thuhla thehdarh hrih lo mi, vantlang mipi hnen ih a thlen mi thu a nemhnget.

Cahmai panga ah cahmai pahnih hi a hlo ih cumi cahmai pahnih sungah ziang mi duhsannak in a that timi cu a rel ding tiah zum a um zet. Ziang ruangah a that timi hi theihfiang a silonan zumnak dangdang tampi a um. Muslim pawl humhim a tum ruangah Buddhist pawl in an that! Asilole Daan hrampi hrem ding ih a hmalaknak ruangah USDP pawl in an that!. Ralkap pawl in NLD party ih ram a hruai mi hi a hnget khoh lo tilang duhnak an tihrim! Ruah ding tampi  a um nan ziang mi ruangah ti cekci hi phuanlang a si hrih lo.

Zo In A Fial?

Ko Ni that dingih in fialtu cu Myint Swe a si tiin, kum 54 tluk upa Kyi Lin cun a sim. Mi thattu pa thuhla an tarlang dan ih a sim dan ahcun, Myint Swe thawn Mae sot ah a veikhatnak hrang September, 2016 ah an rak tongaw. Cumi ah “Kala pa that awla mawtaw kan lo pe ding’ tin in ti tiah Kyi Lin cun a sim.

Cutin a dung ka tlun ih naute a cawi laifang ah a dunglam ihsin ka kaap tiin a sim.

Myint Swe Cu Zo A Si?

Mandalay, Tampawaddy ihsi ra mi a siih 1988 kum rampi buainak ruangah Myawaddy, Thailand ramri Mae Sot ah a tlan. Myawaddy ah palik pawl in veikhat an rak kai dah zo nan, tui ca thuthup pholang mi ahcun a cipciar a tel lo.

Mi thattu Kyi Lin ih a rel dan ahcun Myint Swe hi kum 50 vuakvel mi siih, sam kir, aw neem te a si, a Sanlam pi 5 le inci 4 tluk ih sang a si. Darzuk serthiam a siih khuahlan hlawn thil khawlkhawm in a zuar thup theu.

A inn hnen pawl ih an sim dan ahcun hlawnthil pawl a zuar thup theu ruangah vei ziang maw tizat kaih rak tong dahtu khal a si. A inn hnen pawl ih an sim daan leh ahcun 1990 ah Myawaddy ah a tlawng ih cutin kum ziang maw tizat hmuh a si nawn lo. A nupi in a thizo tiah ruat in palik pawl thawn nasa ngaiten an hawl nan a thuhla zianghman an thei lo. Cutin a nupi in a mah hawlbawmtu palik pa thawn an neiaw ih tuhi Tampawaddy ah an um.

Tutiang nung dam in a um maw um lo ti hi zohman in an hliah hrih lo.

Mi Thattu Kyi Lin Teh Zo A Si?

Ca thuthup pholang miih an tarlang dan ahcun mi thattu Kyi Lin hi 2003 ah sakhuanak thawi pehpar mi khuahlan san thilpawl daansianlo ih a zuar thup ruangah kum 20 sung thawngthlak dingih cawhdaan an pek mi a si.

Mandalay Obo thawng inn ah Zephet tuanter in kum 2010 ah thawng an rak thlak. 2014 kum, President Thein Sein ih thawngtla pawl a suah mi ah kum 11 lawng thawngtla in a rak suak ngah ve.

Obo thawng inn ih a tanpi pawl cun, hlawnthil pawl a thupthiar ih ruthiam mangkheng a si tiin an ti. Budha lemzuk thuhla pawl a rel ahcun kan mangbang hiahia theu ti tlain a thawngtan pi hmin tarlang duhlo cun a sim.

A thok pek ih palik pawl thusuah mi ahcun Kyi Lin hi Shan ramkulh, Kyaukme ih um mi a siih, Chinese lole Shan hrinhnam a si tiin an ti. Asinan tu hi cathuppholang mi ahcun Bama (Kawl cit) Buddhist a si ih, Sagaing Division, Yinmabik pengkulh Sai Hlya khawte mi a si tiin a um.#

Ref- Irrawaddy, Agencies

(Visited 1,655 times, 1 visits today)

Comments

comments

Comments

%d bloggers like this: