Tuukhal pawl

August 2
Tlawngkai Nili

Tuukhal pawl

Bible Siar Ding: 1 Korin 9:7-14

Jesuh in, “Johan fapa Simon, i duhdawt maw?” ti’n a sut saal.
Simon in, “A si Bawipa, ka lo duhdawt cu na thei,” tiah a let.
Jesuh in, “Ka tuu pawl kilkhawi aw,” tiah a ti.
– John 21:16

Na hmuitinmibik cu hminthannak le vantthatnak a si ahcun – hlawhleeng (full-time) ih Pathian hnattuan cu na hrilnak saangbik a si lemlo ding. Mi thawng tampi in mi ih theih loin ramthar mission field ah le leitlun hmuntin ih kawhhran tumpi le fate ah anmah le ti thei tawkin Pathian hna an ttuan cio. Ziangruangah cuti’n pumpe in Pathian hna an ttuan ti asile Yahweh Robi in a ko hngai ih A tuu pawl khal dingih a fial ruangah a si.

Tuukhal Bawibik Yahweh Robi ih kawhnak aw thei in, “Aw, siseh” tiih thulehnak neih thei cu tonteh dah kel lomi ttuanvo mawhphurh cohlannak le thuthlunnak neih a si. Pastor pawl cu an tuurual pawl ih thlarau nun harhdam le tthanglian pitling dingih cawmdawl dingah ttuanvo le thuneihnak hleice neitu an si. Cuti ih an ttuan cingin anmah le innsungsang in mizapi ih cosaan duhmi sinak neih cu an duh ve ko ding. Himi pawl ai ah annih cun Tuukhal Bawibik ih thu kha an thlun sawn a si.

Tuukhal in an tuurual hrangah ttuanvo an nei, asinan tuurual khal in an tuukhal hnenah ttuanvo an nei ve. Kan Pastor pawl hrangah thla kan cam sak thei, awkam in siseh, ca in siseh thazaang kan pe thei. An Pathian hnattuannak hrangah sumsaw in siseh, tikcu caan le thazaang suah in siseh kan bawm thei. Riahsia le thanau ko soisel loin an thathawhnak dingah lomnak le thangthatnak in tha kan pe thei. Cumi pawl tlunah Cungnungbik Pathian ih hnatuantu an sinak ruat in an parah duhdawtnak langter le upat sunloihnak kan pe thei a si.

Kan tuukhal pawl in tuah ding hna an nei – ih kannih tuu pawl khal in kan nei ve.

Yahweh Robi, Na tuurual pawl cawmtu dingih ttuanvo na pekmi
tuukhal pawl thapetu si thei dingin in bawm aw.

Tuni ah ka Pastor le a innsungsang hnenah
ziangti’n so duhdawtnak ka langter thei ding?

@ Ava Pennington

(Visited 19 times, 1 visits today)

Comments

comments

Comments

%d bloggers like this: