Turkey in Syria A Kap Thlang Ding

Surbungtlang Thuthang | Pu Sum

Tihni zanih Syria raldo nak Vanzam in Turkey ram sungih Akacakale khua  bomb hmangih a kah ruangah minung 5 an thiih, himi ruangah Turkey Cozah khalin  Parliament tonkhawm awknak zamrang ko cihin  Syria ram thilti dan an relkhawmih Syria  kap dingin Parliament ah vote lakcih a siih  Parliament Member 320 in Syria cu ralkap cahnak hmangih kahmai an duhih Member 129 in duhlo lamah an kut an thlirnan Member tamsawnih duhdan vekin Turkey cun Syria  kap dingin ralkap a thlah tum thlang a si.

Hiti vekih Syria in Turkey a kah ruangah Turkey cun Syria ram buainak  reh dingin NATO thlahlut a duhthu a sim salih,  himi thuah UN  Secretary General Ban Ki-Moon cun Syria ram thilti dan leh an ram buainak cu leitlun  ram tinkim leh mipi in kan thlir a si a tiih, US Secretary of State, Hillary Clinton khalin  Syria ram buainak leh Syria Cozah thilti dan zoh rero tikah NATO thlahlut mai ttha a tithu a sim.

Himi laiah Syria Foreign Minister, Walid al- Moualem cun  Syria ram buainak a sosan vivo nak sancu US leh a lamtang a thurualpi ram pawlin Syria ram siatsuah duhtu Tapung pawl ralthuam leh sumpai hmangih an bawm ringring ruangah asi tiah a puh veih,himi cingin Syria ram Cozah cun an ram buainak cu rualrem nak um dingih lamzin phunphun a hawl rero a si a ti.

Syria Foreign Minister, Walid al- Moualem cun US leh a lamtang Qatar, Saudi Arabia, Turkey leh France pawlcun Syria  ram siatsuah tumtu Tapung pawl ralthuam leh sumpai thawi an bawmih hleiah President  Bashar al- Assad hlawnthlak nakding lamzin an hawl rero tiah a simih, Syria Foreign Minister, cun Tapung misual pawlih ruangah an ramcu a tlase zetzo ih,  kandung naite ih Damascus khawpi ih buainak suakih nikhatih minung 300 lenglo an thih nak khal Al- Qaeda pawl thawi pehzawm awknak thazet nei Jabhat Al- Nosrah Tapung pawlih tawlrel suakmi a si a ti.

Relzo vekin Syria ram buainakah hin nikum March thla ihsin tutiang theihfiang cin miah minung 30,400 hrawng an thithlangih, himi ruangah Syria ram In hnen pawlcun Syria Cozah thilti daan hi zohliam men theiding a si nawnlo ih, langhngan zetih Opposition pawlhi bawm a ttul thlang a si tiah an tithlang. Qatar ram hruaitu, Sheikh Hamad bin Khalifa al- Thani cun  Syria ram buainak tireh theitu dingbikih ruahmi UN Security Council khalin zianghman  an tuahthei cuanglo ruangah Syria ram buainak tireh dingin NATO thlahlut maihi a cu  asi tiah a simih, cuti a silo len a kiangkap ram pawl rolh lutawk a ttul thlang tiah a sim.

Himi laiah mizan sun khalah Syria ram khawpibik sangtu Aleppo ah bomb cakzet voi 3 a puakih minung 40 an thiih midang 100 lenglo in hriamhma an tuar. Aleppo ih bomb puahnak hmunhi ralkap hotu leh  mi pawimawh pawl umnak leh khualtlawng suhso thlennak Hotel kiangah a siih,  bomb puakhi a cahzet ruangah a kiangkapih umnak In tampi cu umnak thlaklo in an siatbal.

(Visited 134 times, 1 visits today)

Comments

comments

One Comment

  1. wjames hrang says:

    NATO pawl in kawlram tla ra kap law law seh la a tha nan si.kawl pawl thluak hi mei thal mu lawng in a rem thei.

Comments

%d bloggers like this: