Tuluk Ram Macau Ah Chinmi Tam Vivo

http://www.dreamstime.com/-image1809977
Hih hlan ahcun tuluk ram Macau ah Chinmi an rak tlawng phah hmang nan hnattuan ih um ngaingai cu an rak um dah lo. 2012 kum cem lamah Chinmi cu Macau ah hnattuan dingin kan rak thleng thok.

Singapore Thuthang ca pawlah 2010 lam in Singapore ih hnattuan hmuhtonnak neicia pawl Macau ah an duh thu an rak tarlang ttheu nan Kawlram mi an duh thu cu an ngan tel dah lo. Philipino le Indonesia an duh thu lawng an ngan ttheu.

An khawm

July 20, 2014, colhni an khawm lai zuk.

Macau ah kan Chinmi hnattuan ding ih a rak thleng hmaisabiktu Salai Chinsuh cun, “Tui hlanah mi pahnih khat Hongkong ihsin visit an rak um phah ding a zum um. Asinan, an rak um lan lo kan ti pei cu. 27 October 2012 ah ka ra thleng. Macau pumhuap in Chinmi keimah lawng ka si.” tiin a sim. Macau ah mi inn hnattuan dingih a thlah hmaisabiktu kan Chinmi cu Saya William Van Ro Tiam a si. Hnen um ih a rak feh hmaisabikpawl cu (Mawi Shu, Vul Cuai Par, Siangem Par, le Lal Nei Par) an si thu, Hi tei lakah Mawi Shu le Vul Cuai Par khi amah hnu ciah ih feh an si thu Salai Chinsuh cun a sim bet.

Macau feh pawl hi Visit(Alangte ih tlawng) in tuah a siih a hmun an va thlen hnuih inntek va hawl cop a si. Myanmar ihsin Bangkok ah an zam, Bangkok ah Transit a siih khami Bangkok ah khualtlawng an si theihternak ah $500 an hmuh. Cumi $500 cu Agnency in an kenmi a siih a hmun an va thlen hnu ah an khirhsal.

Salai Chinsuh cun, Tulai ih feh pawl hrangah thu hnih ih feh a theih , inn hnatuantupawl hrangah work permit le visit ih feh a theih thu a sim. Macau ahcun a tlangpi thu in kum 1 contract a si. Singapore le Macau a danglamnak cu, Singapore cu Inntek inn luh hlan ah thisen zohfelnak neih a si. Thisen, Zun/zin le X’ray check-up tuah a si. Asinan Macau ahcun inntek inn luh hnuih thisen zohfel a si. Inntek an bangawk lo vekin thisen an check dan khal a bangaw lo. Mihrekkhat inntek cu Ek tiang khal check ter an um thu, Singapore ahcun Thla 6 veikhat (Kum khat veihnih) medical check-up tuah ringring a sinan Macau ahcun cuvek a um cuang lo thu a hmun hnattuan tu Mai Thiante Khawrua cun CT hnenah a sim.

Thlahlawh hi a tlangpi thu in 3500yuan a si. Off day lak lo le 3900 tivek a si. “A nomnak pakhat cu hi nah kan thleng in inntek ding kan hawl fang si. Cun kan duhmi kan hmu in kan try out ih kan um thei ding len kan um, kan um thei lo ding len agent ah kan feh sal ding kan ti i kan feh si ko. Cun salary cut ti um lo. Off cu zarhpi tin si ko” tiin a hmun hnattuan pakhat cun a sim.

Tucun Chinmi an tam vivo tikah Chin Miphun cu Pathian nung biak miphun kan siih Pathian biakkhawmnak nei tlang dingin pawlkom an din ih a hoha-tu bikah Salai Chinsuh le Mai Thar Tharte (Ram Nei Thar) an si. 29 June 2014; 16:53 PM ni in an din thok thu khal a hmun umtu pawl hnen in theih a si.

Salai Chinsuh cun himi hlanah voihnih thum lai rotnak a rak nei phah theu na’n an rak hlensuak thei lo. An din thok ni ah mi 10 an si. Mipa 3 le nunau 7 an rak si. Nunau a leng hnatuan hi mi 3 an si.

Tuhi a veithumnak an khawmnak a si ih khawmtu sungtel mipum 20 an kim thei ih mipa pali an um thu, park ih an khawmawk thu le hmaizarhpi general meeting an neih ding thu pawl Mai Thiante cun CT hnenah a sim.

A rak feh hmaisa pawl cun harsatnak an rak tong tam zet. Cumi lakih harsa pakhat cu agency ngaingai a rak um lo ruangih thinhar an rak tuar deuh hi a si. Cun, an rak harsatnak bik cu visit ih ra an si vekin permit a cem tikah China ah an va relh lawkih Cutin Macau visa China an la salih Macau an luh sal thu khal Salai Chinsuh hnen in kan thei.

Macau hi Asia ramih khawpi lianbik cazin ih tel pakhat a siih Gambling tamnak bik khawpi khal a si. Casino tamnak ram pakhat a siih motor hnakin Bike an hmang tam sawn.
Lawrkhawmtu => Mai Daidim

(Visited 898 times, 1 visits today)

Comments

comments

Comments

%d bloggers like this: