Tuluk pawlin Jet Li an duhbik

Tuluk pawlin Jet Li an duhbik

Kan dung zarh ih Tuluk film star uar umbik hrilnak ah leitlun hmuntin kim ihsin tuluk pawl cun an uar zawng film star an hril ih, Jet Li cun vote 18.4 a ngah ih, mipi uarbik a si. Donnie Yen cun 16.1% a ngah ih, (2) nak a si.

Jackie Chan cu (3) nak a si ih, Bruce Lee cun (4) nak a co. Nunau ahcun Michelle Yeoh le Maggie Q cun vote bangrep ngah in mipi uarbik sinak an co veve. – China Press

====================

Na nu kha riahsiatter hlah, na hmailam caan kha na hrangah a riahsia tuk pang ding! – Turkey thufim

Pathian hi hmunkip ah a um ti a theih theinak cu, hmuntin ah ‘Nu’ timi an rak um hi a si.    – Judah thufim

Nepal ram in ram sung buainak a tong

Nepal cun ram sung uk awknak thuhla ah buainak nasazet a tong ih, lamzin zawhtu 150,000 leng lo an um ruangah dawr, tlawng inn, acozah zung, mawtaw le thil dangdang an khar thluh ti a si. Buainak cu Moist tapung rak tuantu pawl ihsin a suak na’n Moist pawl cun ‘Ram thansohnak dingah uknak ih kan tel ve a tul’ tiah an ti.

Nepal ram ih Moist tapung pawl hin kum (10) lai acozah an rak dodal zo ih, milai 16,000 an thih phah zo. 2006 kum ah acozah thawn daihnak an tuah ih, ram sung uknak ah dinhmun thatha an run co. 2008 ih hril awknak ah parliament seat tam sawn an co na’n Army Genreal parih an thu thensaknak ruangah thla (8) lawng ram an uk. Cumi hnu ah Moist pawl cun uknak ngaingai an co nawn loih, prime minister Madhav Kumar Nepal cu a sinak bansan dingin a forh. Moist hotubik Pushpa Kamal Dahal (Prachanda ti’n a laar) cun acozah in an zung an tlansan hlan lo cu hih buainak hi kan fehpi ding tiah a ti bet. Asinan Dahal cun, “Kanmah lawngin ram kan uk ding tinak a si lo, kan ram mipi pumkhat ih kan um theinak dingah uknak kan co ve a tul’ tiah a ti. Nepal khawpi Katmandu ahhin Moist mi 600,000 lai an um ti a si. – Reuters

Pakistan ah tapung raalkap (22) an thi

Kan dung zarh sungih do awknak ah Pakistan acozah le NATO raalkap pawl tapung raalkap mi (22) lai cu helicopter ihsin meithal le bomb in an kap that tiah thuneitu pawl cun an sim. Hih raalkap pawl hi March thla ih an do awknak ihsin ‘South Waziristan’ ihsin Orakai district ih tlan (relh) pawl an si ih, acozah cun NATO bomnak in a dawi vivo a si. – AFP

Thuthang zingzawitu pawl dinhmun him lo

New York Times tawlreltu pawl cun kan dung tlawngkai nihnih ni ah leitlun ah thuthang zingzawitu (journalist) pawlih dinhmun cu nikhat hnu nikhat a him lo deuhdeuh tiah an aupi. 2009 sungah leitlun ah journalist 70 lai cu misual pawl kutah an thi ih, vei khat ih thih tamnakbik cu Philippine ram ah a thleng ih, mi (30) lai an thi. New York Times buaipitu pakhat (reporter) David Rohde (2008 kum ih Taliban tapung raalkap pawlin Afghanistan ram ah thla 7 lai an renbet mi) cun, “Journalist si hi thil olsambik a si ih, thih olsamnak bik hnatuan khal a si” tiah a ti. A simbetmi cu, “US journalist cu thihnak tuar tambik an si ih, then (5) ih thenkhat (4) cu US ram mi an si” a ti. Thuthang zingzawi ih ramtin fehsuaktu le acozah duhzawng langter lotu cu hmuntin ah zokhal in tihzah an tum cuang lo tiah NYT cun a rel. Rohde cun, ‘Journalist pawl cu ram leng ih an tlan suah thei ahcun mi vantha an si ih, cuti cingin an dinhmun cu, an tlannak ram neitu pawlin nasazet in an rak buaipi ih, caan reipi cu zianghman tuah thei loin an um fawn’ tiah a ti. – AP

(Visited 77 times, 1 visits today)

Comments

comments

Comments

%d bloggers like this: