Tuluk Cun Thlengawknak Lam A Pan Thei Pei Maw?

Tuluk rampi ih a vei 18 nak National Congress of the Communist Party of China (Tuluk Communist Party ih a vei 18 nak Rampi Congress) cu kan dung zarh Tlawngkai Nilini, 8.11.2012, Nov thla sung a si ding, ah an thok. A hmun cu Beijing khawlipi, Great Hall of the People innpi (Hall) ah tuah a si. Atu ih congress pi ih a thupit hleicenak cu Tuluk Communist Party ih lubik president Hu Jintao cu a bang thlang dingih hruaitu thar, president thar, an hril ding a si. Cun Central Committee khal a thar in an hrilsal ding. A kaitu mipum cu 2270 an si. Himi ahhin Xi Jinping le Li Ketiang pawl cun Hu Jintao le Wen Jiabao cu neh in 2013 ihsin National People’s Congress ah Presidency asilole Premiership, president dinhmun, la thei dingin a zum umbik an si.

Atu vekih Tuluk ram uktu thlengawknak caan hi leitlun pi hrangah thil thupi zet cu a si. Ziangahtile atufang ahcun Tuluk hi leitlun ih mipum tambik ram a si ih, economy (sipuazilam) khalah a pahnihnak an si. Tuluk rampi a thlengawknak ah mangbangza in an thangso nan sipuazilam ahhin state-controlled timi acozah ih hrenbeknak hi a um hrih thotho. Soisel a hlawh hrih thotho.

Cun zalennak thawn pehpar in milai cavo (rights) pawl khal cu a tlaniam thotho ih Tuluk ramsung ah nitin deuh thaw in basic rights (milai ih ngah hrimhrim dingmi canvo pawl) dil in sandah an piah ih daan le duun lo ih zung lamih thiltimi pawl khal an pholang. Cuvek a tuahtu pawl cu hrem a tong thei ringring fawn.

Curuangah atu president thar cun milai canvo pawl cu thaten a tithar thawhsal a tul. Cumi lawngah Tuluk cun kumzabi 21 ah atu hnakin a thangso sinsin ding a si. Cuvek a si lo ahcun Tuluk mipi le leitlun mipi hrangah siatnak a pe ding. Curuangah Tuluk pawlih ukawknak le kaihhruaiawknak ah thlengdamlam taktak ti a um thei pei maw ti cu thusuhnak pakhat a si.

CNN, NewsNow (China News), BBC, Google (The 18th China Congress)

Comments

comments

Comments

%d bloggers like this: