Tulai Leitlun Lehpannak Ih Langsar Pawl

Bawhlungsit le Boxing Thuhla

Lawrkhawmtu: Caleb L Ci Luai

Record Thar Thawn Spain La Liga Match 15 Nak Thlirsalnak

Zarhte zaan le Zarhpi zan pawl ih sitmi Spain La Liga Match 15 nak ah, leitlun hrang record thar tuahnak thawn team tum / tlunlam pawl cun nehnak an co hai. 1972 ah, West Germany rami football lekthiam Gerd Mueller cun, kumkhat sung ah a leknak team Bayern Munich le a ram West Germany hrangah match 60 lek in goal 85 a thun i, kumkhat sung ih ram le team hrang goal thun tambik sinak cu nei ringring tu asi.  Leitlun football lekthiam le a hleice in hmainawr thiam le goal thun thiam zetzet an suak nan, Mueller ih record khum le lan theitu an um thei lo.

Cutin kum 40 sung cu a um ringring. Asinan, cui record,kum 40 sung zohman ih lan theilo le khum theilo mi cu Barcelona le Real Betis an sitnak ah, Messi ih thunmi goal 2 culn a lan / khum ta asi cu !!!!! Messi cun kan dung zarh hmaisa ah goal 84 thun in Mueller ih record lan cu a rak nai zet. Zarhpi zaan ih an sitnak ah Mueller ih goal a bangnak goal 85 nak le a khum / lannak goal 86 nak cu a thunlut ta riai. Kum 25 lawng asi lai ah leitlun record a tuahnak thawn pehpar in le a record a lan/ khumnak thawn Mueller cun, “ Record ka tuah mi cu kum 40 sung a um ringring ih, tu ah cun leitlun ih football lek thiambik Lionel Messi cun a run luah ta asi.

Tulai milangsar Messi

Tuihnu puai a neihlai mi ah a thun thei bet vivo asi ah cun, leitlun ah a thiambik asi nak cu reipi a tang ringring ding” ti in a lawmnak tongkam a tongsuak. Culawng hman silo, Barcelona club hrang ih La Liga goal thun tambi rak si ringring tu Cesar Rodriguez ih goal thunzat goal 192 khal a zat zo. Nikum ah khan, Barca hrang ih leknak zate ih goal thun tambik sinak cu goal 232 in a record a rak tuah zo ih, tutiang ah Barca hrangah goal 283 a nei zo.

Real Madrid khal in an tummi Real Valladolid cu, Benzema ih goal 1 le Ozil ih goal 2 thunmi hmang in 3-2 in nehnak an co. Atletico Madrid khal in Deportivo cu 6-0 in an sawp ih, cutawk ah Colombia hmainawr Radamel Falcao cun goal 5 a thunlut. La Liga ih goal 5 thunlut neta bik hi Spain hmainawr hlun Fernando Morientes asi ih, 2002 kum ih Real Madrid hrang ih a lehlai ah a rak thun mi asi. Match dang ah, R. Sociedad 1-1 Getafe, Malaga 4-0 Granada, Osasuna 0-1 Valencia, Levante 4-0 Real Mallorca, Atletic Bilbao 1-0 Celta Vigo, Espanyol 2-2 Sevilla,  R. Vallecano 0-2 R. Zaragoza an si.

Barca cun points 43, A. Madrid cun poits 37, Real Madrid cun Points 32, Malaga cun points 25 hmu in hmai an hruai hai.

2 Nak Ah Inter Milan Kaiso Thawn Italy Serie A Match 16 Nak Thlirsalnak

Points hmu tambik le hmaihruai rero tu Juventus cun, Swiss mi an laithai Lichsteiner in Minute 50 nak ih a goal mi hmang in Palermo cu an neh ruangah hmai anhruai vivo lai. 2nd le 3rd nak ih um Napoli le Inter Milan cu Milan ah an sit ih, Fredy Guarin le Diego Milito tei goal 2 hmang in 2-1 ih nehnak an co ruangah ah, Juventus ih hnuai ah points 4 ih mal in an kaiso thlang. Mourinho a um nawnlo hnu ih an cangsiatnak  pawl cu tuikum ah an tuahthar sal ding ti in goal thuntu Milito cun a rel. AS Roma khal in, an captain Totti ih goal 2 a thunmi le a rual le 2 ih an thun mi thawn Fiorentinak cu 4-2 in an neh ve. AC Milan khal in Robinho, Gillet, Pazzini le El Shaarawy ih goalmi pawl thawn Torino cu 4-2 in an neh ve.

EPL Match 16 Nak Le Van Persie Thlirsalnak

Van Persie a rualpipawl tha pe lai

Tuizarh EPL lehnak ih mipi tambik ih an hngakhlap le thlirmi cu Manchester Derby asi. An hun sit taktak cu khat lam khat lam ball possession ngahtam ding in an tum. Cuti ih an sit rero lai, minute 19 nak ah Rooney cun mawitak in a thunlut ih, minute 29 nak ih a thunluh leh hnu cun Man U fan pawl ih au aw in bualrawn sung cu a khat thlang. Second half an vun sit ih Yaya Toure le Pablo Zableta in an goal ruangah an draw ding a bang ti in mipi ih an thlir rero lai ah 90+2 ah freekick Man U in an hmu. Van Persie cun ziangruangah Ferguson in a lei ti mipi hmuhtheih ih tarlangnak nei in, a sitmi bawhlung in Nasri ih ke a ngah hnu ah a kil mawizet ah Hart cang manlo in a lut.

Cuti ih an mantch a theh zawng ah Man City fan thenkhat field sung ah lut in le thil dangdang deng lut in meikhu thawn Etihad Studium cu a khat. Man City fan pakhat ih thil denmi ruangah Man U dungkham Ferdinand ih mitkil khal thisen a suak. Palik pawl cun zohfiahnak an nei rero lai. Ferguson cu, “ Hi can Man U manager ka tuan ih, tuini tluk ih ka thin phu khal a umlo., khatlam khatlam kan lek mawi zet ih, vanthatnak thawn points 3 kan hmu ngah cu ka di a riam nasa. Lektu zaten an cangtha zet. Fan pawl ih an thil den le an tuahmi cu a thalo zet mi asi” ti in match leh thluh ih interview nak ah asim. Mancini khal in, “ kan lektha zet nan kan vansia asi. Nasri ih a kekhai mi kha cu thiltullo tuk mi si in ka hmu. Cun, Tevez kha ding ding in a um lawk ih, a tlansal nak khan VPS hranga lamzin a onsak a bang” ti in a sim ve.

A dang ah, Torres cun goal 2, Mata in goal 1 thun in Sunderland inn ah nehnak an va co. Torres ih goal a thun leh sal ruangah a lungawithu le, hmailam khal ah hmainawr tihnung asi vivo lai ding ti in Chelsea Interim Manager Benitez cun asim. Arsenal khal in Arteta ih penalty goal 2 hmang in West Brom cu an neh ve. Asinan, penalty ngahlo sehla an draw ding cu a si mai ih, an hmaisawr pawl in goal an thun a tul ih an zuam sinsin a tul thu leh, penalty an ngahnak ah Carzola cu a tluhrim ( dive ) asi ti ih puhnak ah, “Amah Carzola ka sut ih, ka tlan rero lai ah in dai ngah ih ka balance aw thei nawnlo ih ka tlu asi” ti ih asim thu khal Manager Wenger cun asim.

Liverpool khal in West Ham inn ah Johnson, Joe Cole le Collins ( og ) pawl ih goal hmang in 3-2 in nehnak an co. Joe Cole cun tuitum ih goal an thun theisal ruangah ah a lungawi thu le, hmailam khal ah a zuam vivo tum thu asim. Gerard cun anmai lam ah rinlo pi in goal a thunlut ngah pang ve. Match dang ah, (Theih cia zomi cu asi nan), Newcastle United 3-0 Wigan, Everton 2-1 Tottenham, Aston Villa 0-0 Stoke City, Southamton 1-0 Reading, Swansea 3-4 Norwish,  Wigan 2-2 QPR ( QPR hin match 16 tian an leknak ah, nehnak a neih hrihlo ruangah Season tan ihsin nehnak hmulo reibik club ti in sinak thar an nei).

Leading Scorers
12 :      Michu (Swansea)
10 :      Robin Van Persie (Man U)
Demba Ba (Newcastle United)
Luis Suarez (Liverpool)
9 :        Jermain Defoe (Tottenham  Hot Spur).

Germany Bundesliga

Hmaihruai rerotu Bayern Munich cun Thomas Mueller le Mariao Gomez pawl ih goal pawl thawn 2-0 in Augsburg cu an neh ruangah hmaisabik ah an hruai vivo thei lai. Anmah naihbiktu Bayern Leverkusen le Dortmund team pawl cun an tummi an neh hailo ruangah ah Bayern Munich cun points 11 in a hlawih lai hai.

Pacquiao In Marquez Nehlo

Kan dung zarhte zan ah, Las Vegas ih MGM Boxing thongnak ah leitlun champion sinak neitu Phillipine mi  Pacquiao cun a tum Mexico thongthiam Marquez cu, poit bang aw ih an thongawk rero lai ah rinlo pi in, Marquez ih thongnak cu round 6 nak ah pacquiao cun dawllo in, ziang theilo in a tlu ih, point bangaw, knocked out in a sung ta riai. CT Scan an tuahnak ah Pacquiao cun zianghman cu siatsuahawknak a nei lo. Pacquiao hin a thong tamsawn ih, Marquez ih hmai ah thi cu a khat nasa.

Nazi 2 sung thongawknak an theh zawng, Pacquiao a tluk cun a zohtu mipi pawl cu thawm nei nawnlo in an zoh hai ih, Pacquiao tho thei nawnlo cun mipi tamtak an au ih, tamtak cun uinak mihmai thawn Boxing thongnak cu an suahsan hai. Phillipine ram cun an ramti hminthatu ih thongnak cu an ram mipi zate deuhthawn in an rak zoh ih, an ram pacangtha a tluk cun zohman tong thei khal an um nawnlo. “Tuitum kan thongawknak ah, Marquez cun a titha ih in neh asi. Ka lungawipi zet. Thongawknak hi ka bansan lo ding. Ka cawl hahdam ding ih, thathar in ka ra sal ding. Tuitum kan thongawknak ah tha in petu pawl ka lugnawi zet. Ka nehlonak parah lawngte ngaithiam ka lo dil hai” ti in Pacquiao cun a sim.

Comments

comments

Comments

%d bloggers like this: