Tuksumza Zalennak

July 4 

Zarhte Ni

 

 

 

Siar:

Galati 5:1-6, 16-21

 

Asinan ka u le ka nau tla, nannih cu miluat si dingih kawh mi nan si. Sikhalsehla cuih luatnak cu nan taska diriamternak ah canter hlah uh. Cuhnak in duhdawtnak thawn pakhat le pakhat rian aw in bawm awton uh. – Galati 5:13

 

Kumkhat Sung Baibal:

–   Job 28-29

–   Tirhthlah 13:1-25

 

A hmang thiam lotu hrang ahcun zalennak cu ttihnungza a si. Curuangah misual pawl cu thawnginn sungah an khum. Kil lomi zalennak khal ram meikang vek a si.

 

Khristian nun cu a langfiangzet. Zumtu pawl cu Daan ih camsiat le cawhkuan, Daan ih suahpimi sualnak huham sung ihsin an luat zo. Ttihnak, thinphaannak le sualnak cu ngaithiamnak, luatnak le daihnak in a airawl zo. Thinlung sungah zalennak a ngahtu hnakih miluat an um thei nawn ding maw? Kan palh ttheumi cu zalennak hi mai’ zawn lawng ruat in a hleifuan in nunnomnak ah kan hmang. Pathian ih in kiltermi thilri cu mai’ taabul ah tuah in nomnak sungah kan riilbah.

 

Zalennak dikzet ih hman daan cu duhdawtnak thawn pakhat le pakhat rian-awk le bawm awkton hi a si (Gal. 5:6, 13). Thlarau ih hnattuannak parah kan tthum aw ih kan thazaang cu Pathian duhdawtnak le midang bomnak ih kan hman tikah tisa hiarnak cu Pathian in in khamsak ding (cc. 16-21). Kan zalennak cu siatbalnak ah si loin tundinnak ah hmang uhsi!

 

Ramri nei lo zalennak cu mei-hlio vekin ttih a nung nain tthate’n kan kil thiam asile mi hmuahhmuah hrangah thluasuah  tumpia si.

 

Khrih cu luatnak pe dingah A ra,

Kan ai ah thihnak tuar in;

Atu cu luatnak thar thawn kan um,

A duhdawtnnak le zaangfahnak sim dingah.

 

Luatnak cu kan nunnomnak tuah dingih pekmi a si lo,

Pathian lungawi zawng tuahnak dingah a si sawn.

Comments

comments

Comments

%d bloggers like this: