Tuisan Milai Thuanthu Thlengawknak

Tuisan Milai Thuanthu Thlengawknak

Hre Mang

Kan san thuanthunung kan zoh asile leitlun milai thuanthu cu mangbangza in a thleng aw rero. Laimi pawl kan thleng aw ve lo asile santiluang ih fen hlo mi, lole dungah tantami kan si ding ticu a fiang zet. Leitlun thuanthu a thleng aw mi ah santiluang in a thleng mi le milai in tumcawp tuahcawp in a thleng aw mi tiah phunhnih in then theih asi. Leitlun santiluang in a thlengmi pawl cu milai in bet theih lo kham theih loin a thleng aw mi asi. Cu rualrualin, milai tumtah vekin bet mi kham mi le tuansuahmi ruangah milai thuanthu a thleng aw mi khal a um ve. Ziangvek pawl a thleng aw aw ih ziangvek pawl kan thleng aw ding timi kan ruahnak in bawmtu dingah malte zoh thlang hnik uhsi!

Khuahlan lai ah leilungpi hi a pheng demdem asi tiah an rak zum ih an rak sim. Asinan leilungpi cu a hlum asi tiah an run hmu suak sal. Sankhat hnu sankhat hmuhnak theihnak a kau vivo, milai khawruahdan tla a thleng aw vivo. Hlanlai ah Laimi pawl hrinkhat le hrinkhat an rak do aw aw ih hmunkhat ah an um tlang thei lo. Tuisan ahcun Laimi lawng si loin Kawl pawl thawn ram dinkhawm ah um tlang, nun tlang, khawsa tlang in kan um. Culawng si loin khuahlan pipu pawlin an rak theih dah lo mi ramah kan laimi thawng tampi kan um zo. Laitlang ah motor pakhat hman kan tuah thei hrih lo nan leitlun mifim pawlin vanzam, lawng, rocket thlapi par kainak tiang an tuah in an zam zawk rero zo. Ba le busul, thanthe thawn a thang lian mi pawl in ar sa le sa citiantian cabuai parah hung in thaithawh a kiltu mi tampi an si zo. Hlanlai ah Bible hi mi menmen siar theih a rak si lo, an rak siang lo, tong dangin a rak um lo. Asinan tu ahcun leitlun tong citintian in a um zo ih milai zo khalin siar theih asi zo. Thuanthu a thleng aw mi rel cawk le ngan cawk khal asilo. 

Cuvek milai san thuanthu lakah kan nun vekin miphun pakhat in dam ve dingin ziangvek pawl hi a lotheihlo in kan thleng awk ve a tul?

Khuahlan ramtawihsan (hunting age) ahcun sakap theithei an rak lal ih mipi in an thu an rak ngai. Lungto san (stone age), hrin lal san (tribal chieftainship) san pawl ahcun anmah le mibur ih zirin hruaitu le lal, uktu an rak nei cio. Laimi lak khalah mahte hrin hnam cio an rak uk aw aw. Mirang pawl in Chin ram an rak uk tikah meithal thawn thahrum hmangin an rak uk ih laimi lakah an kut hnuai um mi uk tla an rak ret. Cutin kawlram ram dinkhawm uknak hnuai ahcun democracy, ralkap uk, le tu ah semi-civilian government, para military uknak in kan ram cu uk awk, kaihhruai awk asi. Ziangvek uk awknak khal suakin mibur, pawlkom le cozah uk awknak thleng khal sehla a thupi zetmi cu mipi pawlin ziangtin anmah lakah hruaitu, uktu, an hril, an thlun ih ziangtluk tiang senpi vangtlang mibur pawlkom kumpi cozah thatnak hrangah an pek awk timi a si ih mibur, miphun, rampi thansohnak khal cumi parah tampi a hngat awaw asi.

Laimi pawl hi pupa san lai ahcun kum 18 kim mipa hmuahhmuah cu miphun ralkap an rak si. Sikhal sehla tuisan minung pawl cu miphun, khua le ram kilhimnak hrangah tuanvo liangparah suang nawn loin pulpak, mai hrang cangcai khawrh lungput an nei theh thlang. Miphun thuanthu tuahthat ding tuanvo cu kawl kumpi cozah, miphun dang kut ah ap theh asi zo.

Pupa rirai bia pawl biaknak an thleng tikah riria be nawn lo in khrihfa kawhhran sungtel sinak cu a tawk ah an rak ruat. An ruah vekin rirai biaknak tanta in khrihfa an can tikah an zum taktak khal a rak si theu. A rei vivo tikah khrihfa sinak a dal vivo. 1970-80 hnu lamah Khrihfa si lawng a tawk lo, pianthar, hrinthar a tul, tiah nasa ten thangphawknak a rak thleng. A rei vivo tikah pianthar, hrinthar sinak a dal vivo, milai nunnak a tuahtha tuk nawn lo. Piangthar ti aw pawl nun tampi cu zumlo tu le biaknak dang pawl hnak hman in ningzah thlak tampi a um zo.

Khua hlan ah, sim zo bangin, leilungpi cu a pheng demdem asi tiah an rak zum. Asinan mifim pawlin an hmuhsuak tikah a dik lo asi tiah an simsal. Laimi pupa pawlin thlawng an rak nei dah lo ih fim zirnak timi cu tappi kawm, zu in le puai tuahnak hmun, le tlang hnatuan, lo thlawhnak hmun, mibur pawlkom awknak ihsin an rak zirh aw aw. Puithiam pawlin khuavang bia le raithawi tahratin in pol an sim ih fimnak phunphun tongkam an tong suak theu. Tuihlan kum 20-30 lai ah Pathian thusim hrekkhat pawlin Bible tlawngkai a tul lo tiah an rak au rero theu. Asinan santhar sanah Pathian thu ah siseh leitlun thu ah siseh fim zirnak phunphun ah zir a thupitzia hmuhsuak vivo asi.

Thleng tulmi pawl khaikhawm :

1. Milai tuanto: “Milai pakhat ih tuanvo” tiah kan ruahmi hi santhar minung pawlin kan thleng, pupa lungput vek miphun hrang, senpi vangtlang hrang, Pathian rian in milai rian, tuanvo liangpar suang in lungput thar kan neih, kan mihlo lungput kan thleng a tul. Kan mai thuanthu, kan bulpak, insang, khua le ram miphun, leitlun thuanthu thlengtu ding kan si tiah thuanthu liangpar suang lungput kan neih a cu.

2. Fimnak lungput: Laimi pawlin santhar fimnak leitlun lam le Pathian thu zirnakah siseh kan lungput kan thleng a tul. Mifim mithiam pawl lamhruainak le kaihhruainak hnuai ah ziangtluk kan thum aw aw, kan hngat aw aw ih Pathian pekmi fimnak cu dodal loin bulpak nun, insang, mibur, venghnen, senpi vangtlang, pawlkom, cozah le kumpi lairelnak khalah kan hman thiam asile a tlan rero mi leitlun milai thuanthu lakah san man in kan tlan cak ve ding asi sawn. Fimnak parah kan lungput kan thleng awk a tul tul tuk zo. Asinan Pathian tel lo leitlun fimnak le Pathian tel lo leitlun atnak hi tih an nung veve, milai thuanthu tuahsiattu an si veve fawn.

3. Mibur hruaitu tha: Khuahlan sakahsan, lungtosan, hrinhnam lalsan pawl vek sinawn loin mibur pawlkom sihcih awknak ah hruaitu kan hrildan, kaihhruai awkdan khalah santhar fimnak, Pathian pekmi lamhruai awknak ah kan tuhlut awk thiam a cu zo. Atsan lai vek in kan hrinpi, kan insungsang milesa, rualpi tha, lamtang, lungrualpi, khawkhat, hrinkhat, hnampi, thurualpi timi parah hngat aw nawn loin leitlun khawmual, leitlun pumhuap in khua a ruat thiam tu, kan miphun, mibur le pawlkom thawn a pehpar mi ziangkim dapkim in khua a ruat, lai a rel, khua a khang, a pe aw tu, le hnatuan thiam le kaihruai theitu pawl kan hawl thiam, kan upat thiam, kan thlun thiam, kan support thiam, kan hman  thiam asile santhar thleng awknak lakah cak zetin kan tlan cak ve dingih a thleng aw rero mi milai san thuanthu in in siatsuah lo ding, kanmah sawn in milai san thuanthu cu kan thleng thei sawn ding asi. Kaihhruai awkdan kan thleng a tul.

4. Leitlun huap pawlkom: Khuahlan san ahcun khawte pakkhat, doctrine pakhat, tlangkulh pakhat, vengkhat, hrin khat, tvp in milai sihcih awknak rak tuah asi theu.  Santhar leitlun huap milai sihcih awksan asi vekin mibur pawlkom din le hnatuan tikah kan tumtah mi thawn a pehpar tu milai pawl thawn kan sihcih le pehzawm thiam a thupi sinsin. Pawlkom rikham kan thleng a tul.

5. Pehtlaihnak tha: Laitong in casiar ding a mal tuk, leitlun fimnak zir ngah thei dingin mirang ca tal siar thei a tul. Mirang ca siar tik khalah sumdawn lam, politics lam, tvp khurbing pakhatkhat lawng si loin mibur, miphun pakhat cun kilkip ah fimnak kan zir ih kilkip ihsin kan buuk tawn thiam a thupi. Lihawng kawr ih tlaklabeu fate in a umnak cu tipithuanthum ah a ruat vek silo dingin kilkip fimnak khuaruat thiamnak thawn miphun pakhat kan thanso theinak ding hrangah pehtlaihnak tha, senpi vangtlang in anmah thawn a pehtlai mi kilkip thu hla pehtlaihnak tha an neih thei a thupi tuk. Radio, News Paper, le pawlkom pehtlaih sihcih awknak, tongkam ah siseh thansohnak, thu tha hla tha thawn pehtlaih nak tha nei thei dingin kan bungrua le canpual tha pawl kan hmandan kan thleng a tul. Kan pehtlaih awkdan thleng a tul.

6. Biaknak thuken tlamtling: Khrihfa sinak ihsin pianthar nak ah, pianthar nak ihsin Bible thurin zirhmi vekin nitin milai nun kilkip ah nunpi thei dingin thlengawksan asi. Bible in a zirh mi cu biaknak pawlkom sungtel sinak si loin milai nun kilkip, a bik takin kilnga a zirh asi: 1) Pathian thawn bulpak pehzawmnak, 2) Mahte uk awknak, Thlarau Thianghlim ukmi nun, 3) Insang le venghnen, midang thawn pehtlaihnak, 4) Society le cozah kumpi, pawlkom, le 5) sersiammi parah milai tuanvo, tvp, milai nun thuken kimcang nunpi dingin zumnak thurin, zirh awknak, le nunpi mi thleng awk san asi.

7. Hlawhtlinnak tiah kan ruah mi: Khua hlan pupa sakahsan, khuangcawi san vek sin awn loin le leitlun khawvel mi pawl in hlawhtlinnak cu sumpai lennak in cuai an thlai theu vek si loin Laimi khrihfa pawlin hlawhtlinnak tiah kan ruahmi kan thleng a tul. Pathian in in sersiam vekin Pathian ih tumtah mi bulpak, insang, mibur, miphun pakhat parah tuah famkim asi dingmi, Pathian hmin sunlawinak hi hlawhtlinnak tehfung ah kan hman thiam ding a thupi. A dik maw, dik lo maw sumpai ngahnak, lalnak, hlawknak pawl hi miphun siatsuahtu asi. Pathian duhnak le tumtah sawn hi kan miphun, mibur, pawlkom, insang le bulpak thansohnak le hlawhtlinnak tehfung si dingin kan thleng awk a tul.

Nang, na thleng aw ve ding maw, tantami na si ding maw, mihlo na si ding maw, milai thuanthu thlengtu lakah na tel ve ding maw, hirl ding na nei! Pathian in amai tumtah tuansuaktu ah lo thleng hram seh!

(Visited 120 times, 1 visits today)

Comments

comments

Comments

%d bloggers like this: