Tuihsun A Si Thei

February 17

Tlawngkai Nihnih

 Tuihsun A Si Thei

 Siar:

Matthai 24:36-46

 Raalring in timtuah cia ringring in um uh, ziangahtile Mi Fapa cu nan rin lo laitak fang ah a ra thleng ding a si. – Matthai 24:44

Kumkhat Sung Baiblal:           Puithiam 21-22

          Matthai 28

 Kan dung kumkhat laiih ca ka siarmi sungah America ih TV pawl digital signal thawn an kai lo asile an TV pawl hna a ttuan thei nawn lo ding ti a si. Electric lam thil zuarnak dawr tampi ah thuthannak an taar ih converter box leinak hrangah acozah in $40 lethmat an pek.

 Mi tampi in an TV an ong tikah hnattuan thei dingin a ttulmi cu an tuah ko ding tiah ka zum. Ni khiah in raalrinnak pekmi thu parah kan raalring ttheu nain hmailam nikhat ni ih a cang leh ding timi thu parah timtuahnak kan nei ttheu lo.

Jesuh kha a dungthluntu pawl in a ratsaalnak ding ni an sut tikah, “Cuih ni cu Pa Pathian lawng in a thei” (Matt. 24:3) tiah a ti. Cuih ni le cuih caan cu zohman in an thei lo, van ih a ummi vancungmi in siseh, Fapa in siseh an thei lo, Pa lawng in a thei” (c. 36) tiah a ti. “Curuangah raalring tein timtuah cia ringring in um uh, ziangahtile Mi Fapa cu nan rin lo laitak fangah a ra ding a si” (c. 44) tiah raalring te’n um dingin a forh hngai.

Ziangtikah Jesuh a ra saal ding ti kan thei lo, ziangtik caan khal ah a ra thei. RBC ministry hram thoktu Dr.M.R. De Haan in a zungkhan sungah “Tuihsun a si thei men” timi ca a taar.

Nitin ttuan ding ih kan tumtahmi kan suai tikah tuihsun ah Khrih a ra thei ti kan thei maw? Amah tong dingah kan timtuah cia maw?

 

Khua a thimzet nain zing khawvang a nai sin,

Vancung ihsin Bawipa a ra cing thei men;

Khuathim sungah ruahsannak thluasuah a tthang vingvo,

Runtu Bawi Khrih a ra ding…tuihsun a si thei men

Comments

comments

Comments

%d bloggers like this: