Tuar Thiam A Har

Šianglianuk Ķianghrol

Steve le Sarah timi, nupa duhdawt aw zet hi an rak um. Asinan kum 10 tiang ah fa an nei thei lo ih, an neihawknak kum 11 a thleng thlang. An neihawknak kum 11 kimcam luan hlan ah fa neih an beisei zet. Ziangahtile fa an neih thei lo ruangah an rualpi le innsang sungkhat pawl in tthenawk an forhfial rero thlang. Asinan an karlak ih duhdawtnak hriphang hngetkhoh zet ruangah tthenawk ding cu an ruat ngam lo.

Thla tampi a liam hnu, ni khat ahcun, hnattuannak ihsin Steve a ra tlun lai ah a nupi cu mipa pakhat thawn lamzin ih an feh liam lai a hmu. Mipa cun Sarah ih hngawng in a kuah phah ih, an hlim hmel zet fawn. A lehhnu zarh khat lenglo tiang in, cumi pa le a nupi cu hmun dangdang ah a hmu kop rero fawn. Siimlam vei khat cu Steve a ra tlun lai ah, cu pa cun Sarah cu mawttaw thawn an inn kotka ah a tthum ih a biang ah a hnam ta ti a hmu. Steve cu a thinheng in a riah a se zet nan a nupi hnenah zianghman a sim lo.

Ni hnih a liam hnu, hnattuan ih Steve a buai zet lai can, rial tithawl (glass jug) thawn tidai a suah lai fang ah phone a ra awn. Phone cu a vun kai ih khatlam ihsin, “Hello duat, ka lo tiamkam cia vekin tui siimlam cu nan inn ah ka ra ding,” tiah a run ttong. Steve cun phone cu a thlak. Mipa aw a si ih a nupi thawn a hmuh tlang ttheu mi a si ti khal a zum hnget. Mipa dang hnenah a nupi a hloh zo a si timi ruat in a thin a ling thutthi. A kut ih a ken mi rial tithawl khal a tla ih a kuai darh thluh.

Cutikah a nupi cu, “A remcang thluh ko maw?” tiah sut phah in pindan sungah a ra tlan lut. A thinhengnak ruangah a nupi cu a rak tul ih a tlu. A cangvai nawn lo. A hung tho nawn lo. Cuvete’n rial thlalang kuai lakah a tlu ti a vun mangsuak. Thlalang tum zet pakhat in a sun. A nupi ih thawthawt, a tha caih, a lungtur pawl a thei nan man, a rei hlan ah a cangvai nawn lo. A thluak a buai zet lai ahcun a nupi ih kut ah ca-ik pakhat a hmu. A vun la ih a vun on tikah a sungah cakuat pakhat a hmu ih a thir dukdi. Hiti’n a ngan aw:

“Duhdawt mi Ka Pasal,
Ka thinlung umdan hi kaa ih ka rel thiam lo ruangah ca in ka ngan mi a si. Zarh khat lenglo sung sibawi ka rak tong zo ih, himi thuhla hi ka lo theihter hlan ah a felfai ka duh fawn.

Sibawi in faphir ka von thu a nemhnget ih, kan fa cu tu ahcun thla 2 an kim thlang. Cumi sibawi lala cu kan neihawk hnu ihsin pehtlaih theih nawn lo in a hlo mi ka ttapa a rak si. Paisa pia khat hman cem lo in keimah le kan fate pawl in zohkhen ding ah thu in tiamkam.

Tuini ah kan inn ih zanriah ra ei ding khal in in tiamkam fawn. Ka kiangih na um ruangah ka lungawi.
Na duhdawt mi nupi.

A kut ihsin cakuat cu a tla. Sangka king awn a um ih, a nupi thawn a rak hmuh tlang mi pa a rung lut hnu ah, “Hello, Steve, ka ra thleng dik tiah ka ruat. Na nupi ih ttapa Max ka si,” a rung ti. Vei le khat ah Max cun thisen tili lakih um a farnu cu a hmu thutthi. Zato ah a tlanpi cih ih Sarah cu lungcimit in a um. A pum sungih naute pahnih cu an hloh ta.

Steve in kimcangte’n thuhla rak zingzoi sehla cun . . .

Hram: www.moralstories.com ih “Truth”, submitted by Kristie, USA

Comments

comments

Comments

%d bloggers like this: