Tuah Lai Ding Maw Tuah Zo?

November 30

Tlawngkai Nihnih

Tuah Lai Ding Maw Tuah Zo?

Siar:

1 Korin. 15:1-11

Ca Thianghlim sungih nganmi vekin Khrih cu kan sualnak ruangah a thi…  Ca Thianghlim sungih nganmi vekin, ni thumnak ah thawhter saal a si.    1 Korin. 15:3-4

Kumkhat Sung Baibal:

–   Ezekiel 37-39

–   2 Peter 2

Kan dunglam kum rei lo ahkhan, “WWJD” timi Christian Community sungah a lang ciamco. “Jesuh in Ziang A Tuah Ding? (What Wound Jesus Do?)” timi ih cafang tawi WWJD cafang pali thulmi, tthi le faute ngel khih tivek pawl Khristian pawl in an duhzet. “Jesuh in Ziang A Tuah Ding?” timi cu duhhrilnak kan tuah tikah Jesuh ih thinlungput le ruahnak ah ziangti’n a um pei? timi thukzet ih in ruattertu manneizet raalrin peknak a si. Ruuntu Bawi hrangah ka nung ding ti’n a hmin sunlawiter kan tum tikah kan Bawipa Jesuh Khrih ih zohtthim ding in ret sak ciami thawn kan thinlungput le kan thuhri-sahcatnak tuah daan cu a kalh awk lo ding a thupizet.

Asinan, Tubaite ah, Biakinn pakhat sungah cumi thawn mallai a danglam deuhmi catar ka hmu. Hiti’n an ngan, “WDJD – What Did Jesus Do?” Jesuh in Ziang A Tuah Zo? timi a si. Hih thusutnak cu a thupizet, ziangahtile kan rundamnak tthum awknak a si. Pathian Fapa ih a tuah zomi lakih a saangbikmi cu, 1 Korin. 15:3-4 ah Paul in, “Ka pom ngahmi atu nan hnenah a thupibik tiah ka phuan sinmi cu himi a si: Ca Thianghlim sungah ngan in a um vekin Khrih cu kan sualnak ruangah a thi; an phum ih Ca Thianghlim sungah ngan ih a um vekin, nithum hnu ah thawhter saal a si,” a timi hi a si.

Jesuh in ziang a tuah zo? Kan natnak le kan sualnak zate a phur ih kan ai ah cawhkuannak a tuar. A thi nain thihnak neh in a nung saal. Thinglamtah parah kan hrangih a tuah ttheh zomi kan pom ngah hlan lo “Jesuh in Ziang A Tuah Ding?” timi thu cu kan ruat thiam baan dah lo ding.     – Bill Crowder

Kan tuahmi kip ah Jesuh thlun in,

Cumi cu man neimi tumtahnak a si;

A hmaisabik ah A hnenih kan zumnak kan tthum ahcun,

Sual ih khat kan nunnak cu in ruunhim ding. – Sper

Kan tuahnak ruangih rundam mi kan si lo

Khrih in A tuah ttheh zomi rinnak sawn in a si.

(Visited 26 times, 1 visits today)

Comments

comments

Comments

%d bloggers like this: