Tu Hnu Kum 10 Thlirnak

USA ih um mi, a hleice in Indian State sungih um Chin mi pawl zoh in hmailam kum 10 tikcu can ih kan dinhmun ding thlirnak hi neih a tha ve zet in ka thei. Mah hmuhban tawkte le tontehmi tete ihsin ruah khawm hnik sehla. Cozah le mipi karlak, sungkua, nu pa karlak, tlawngta pawl dinhmun le hnatuannak dinhmun pawl hi a hleice ngan hmaisak kan tum ding.

Tu kan dinhmun ahcun Indiana State sungah Chinmi zaten 6000 ihsin 7000 kar lak kan um dingah ruat sehla. Tu lai fanghi state dang ihsin ra cer le Malaysia, India lam ihsin ra thleng thawn mipi cu kan pung rero. Tu hnu kum 10 ahcun a malbik mipum 20,000 kan um dingah kei mah bulpak cun ka zum. Mipum 20,000 lakah cozah hnen ih vote pe theitu mi 10,000 cu a malbik kan kim thei ding. Himi mipum hi Falam mi lawng si loin Chinmi zaten huap a si.

Chinmi pawl cu a bur(Kawhhran) ih um khawm hi kan nunphung a si ruangah tu hnu kum 10 khalah a bur ih kan um hi kan thlah lo ding. A bur ih kan um ih kan tangrual thiam cun cozah hnen ihsin bawmnak khal kan ngah awl ding. Ziangah a bur ih um ruangah bawmnak kan ngah thei ding tih a sile cozah hril awk canah vote pakhat te ngah ding in heh le heh an zuam. A bur kan um thei cun dollar tampi ngen in vote cu zat kan lo pek ding ti tiang in cozah sawn kha kan kam ngam ding a si.

Democracy ramah democracy um tu dan hi kan Chinmi cun kan fiang ngaingai hrih lo nan tu hnu kum 10 ahcun 100 ah 80 cun kan fiang thluh ding. Mipi thu kan neih dan le kan dinhmun a bang awk zia kan fiang hmaisa khal thil tul mi a si bang in thu dik hawltu hrangah lamzin kau zet a um timi khal kan fiang ding ka duhsak zet. Cu tikah kan mah sung ih peng khat le peng khat parah kan buai/ hnaksik sawn ding timi hi a phan um zet mi thil pakhat a si. Cumi cun kan thansonak ding khamtu khal a si.

Tu hnu kum 10 ahcun nupa then aw ih a tam sinsin ding. Ram thangso ih um kan si bang in rual dawh a na, hnatuan a tul ding ih nupa karlak khal rualremten um a har zet ding. Nupa khal lak a buai cun sungkua thekdarh awknak hram a si. Nu le pa a dangdang ih kan um cun kan fate pawl khal an vak vai ding ih hngaktah fa khal an tam sinsin. Kham theih lomi mirang nun (living together) kan hmang sinsin ding ih nauhak tete naupai khal an tam vivo lai ding. Himi dinhmun pawl hi riahsiat za ngaingai a si. Ziangtin kan kham ding ih ziang tin kan zirh aw ding timi hi tu ihsin kan ruahtul bik mi khal a si.

Tu lai fanghi laimi inn lei kan tham vivo. Hna kan tuan thei ih bill pek kan huam aw zet lai. Nupa hnatuan khal kan tam zet. Sum suak sum lut zo in sumpai hmandan a thiamtu kan tam nan tu hnu rei lo ahcun sumlut zoh loin sumpai hman kan thiam zet thlang ding. Thil tha, thil mawi kan duh sinsin ding ih a bak in kan lei ciamco ding. Tu hnu kum hra ahcun leiba sam thei lo ruang ih inn lawnsak sal khal siar theih in kan um hnuaihni tlang ding tiah ruahnak ka nei.

Tu kum sungah Indianapolis tlawngkai zaten mi pum 1200 lenglo an si ih high school theh suaktu mi 80 lenglo an um. Tu hnu kum 10 ahcun high school thehtu a let a let in an tam ding. University kaitu khal an tam sinsin ding ih company tam sawnah Chinmi kan din hmun a nget ding. Hnatuan sang khal a ngahtu an tam sawn thlang ding. Asinan himi tlawngta lakah ramkhelh lam ih larsar cu kan suak thei hrih lo ding. Ramkhelhnak tiang kan lar ban ding cunt u hnu kum 20 tal kan um hrih a tul ding tiah ruahnak ka nei. USA rampi hi kan do ih kan lak a tul lo. Asinan kan umnak state le khua le ramah dinhmun hnget, cozah lam siseh company lam siseh kan ngah thei vivo cun kan phun le hnam, suahsemnak ram tiang in kan that hnempi ding a si.

Himi dinhmun kan tlen tikah kan tanrual thiam locun kan miphun cu kan hlo sinsin in kam thekdarh sinsin ding. Ka fim ka thiam timi lungput kan neih vivo cun mahte tuahduhnak le hlawknak kan hawl ringring ding ih kan suahsemnak kan ram hrangah mi tha hnem khal kan si dah lo ding. Kan khua kan ram hrang ih mitha hnem kan si lo cun kan suahsemnak cu thangso loin a niam vivo lai ding.

By- Salai Mithli

(Visited 80 times, 1 visits today)

Comments

comments

3 Comments

  1. Kan Laimi cu thiltha le fimnak cangkannak tam zet zir ding kan nei nan,
    cu pawl hnakin sualralnak le atnak zir hi kan phur zawng a rak sisi.
    Laimi cu kan aa ciamci tuk lai e..

  2. Rual,

    Na thlir fuh nasa… Sau deuh hrih sehla a poi lo nan..hehe

    Lal

  3. ca tha tak si ee.., nan, kn nih laimi cu kn thangso zik dekdo hmg ti awk zawn ah hotu then khat (titsaphoh) an um cing2 zel bawk si, CHIN kn za ten cu sim hlah.., Falam mi le saw vial te hman lgrual thei ta hlah, hotu tha ten kn neih hnget seh la cu.., kn thangso ve rero nan si lawm.

Comments

%d bloggers like this: