Ttong Hi A Thupi Maw?

May 3

Tlawngkai Nikhat

Ttong Hi A Thupi Maw?

Siar:

Thufim 15:1-7

Biaknaklam ah ka taima a si a titu nan um maw? Nan hmurkaa nan uk thei lo ahcun nan zumnak parih nan taimaknak cu santlai lo a si ih nanmah le nanmah a bum awtu nan si.   -Jeim 1:26

Kumkhat Sung Baibal:

–   1 Siangpahrang 14-15

–   Luka 22:21-46

Khristian innsang pakhat ih tleirawl pakhat in, “Ka nu cun kawk le camsiat hi ttong ttha lo ti’n a ruat lo,” a ti. Ttong mawi lo ti ih ruahmi lak ihsin a nu ih a cohlanmi ttong pawl a rel tikah mi tampi in zumtu ih ttong dingah a mawirem lo an timi ttongkam tampi a um hrih.

Kan dung kum rei lote ihsin miseenpi ih ttonglam dinhmun hi a ttumsuk nain cumi lakah kannih zumtu pawl khal ttonglam ih ttumsuk ve ding cu a ttul lo. Kan nunzia raalring in, (Efesa 5:15) kan ttongkam in ziangti’n Pathian kan sunlawih thei ding, ti ruat sawn ding kan si.

Fiang te’n theihthiamnak kan langter ahcun kan ttongkam in Pathian lung kan awiter thei a si. “Mifim na si ahcun na ttong sup aw” (Thufim 10:19); “a lei le a kaa a kil theitu cu harnak in a luat ding” (Thufim 21:23).

Thu harsazet pawl kan rel hmanah zaangfahnak ttongkam le a tthalam zawng ih ttong ding hi a thupizet. “Thulehnak awkam neem in thinhennak a daiter, asinan ttong hrang in thinhennak a suahter sin” (Thufim 15:1-2).

Pathian ih faate kan si vekin ttong ttha lo cu hrial ding a si. Paul in, “Nan biak awk tikah ttongkaa hrang hmang hlah uh,” (Efesa 4:29) tiih nun in simmi in ttongkam dik hmannak ding tahfung in pek.

Kan nunnak a kilkip in Pathian ttihzah upatnak pe dingah Pathian lungawitertu le cohlan tlakmi ttong hmang aw.   – Dave Branon

Ttong cu thluasuah pakhat a si thei,

Camsiatnak pakhat khal a si thei;

Sim hnik! Ka rual, ziangvek ttongso na hman!

Tthat sinnak maw siat sinnak hrangah? – Anon?

Kan ttongmi in zo kan si ti a langfiangter.

(Visited 41 times, 1 visits today)

Comments

comments

Comments

%d bloggers like this: