Tthan A Cu Zo

August 20

Tlawngkai Ninga 

Tthan A Cu Zo 

Siar:

1 Korin. 3:1-17 

Ka u le ka nau tla, thungai in kan ti asile nannih hnen ahcun thlarau mi pawl hnenih ka sim vek cun ka sim thei lo. Hih leilung ih tisami bangtuk Khristian zumnaklam ih nauhakte bangtuk in nan hnenah ka sim a ttul a si.    – 1 Korin. 3:1 

Kumkhat Sung Baibal:

–          Saam 105-106

–          I Korin. 3 

Laksawng zuarnak dawr ah birthday card pawl ka zoh rero ih hnihsuakza pakhat ka hmu. Card pakhat parah hiti’n an ngan: “San khat ah veikhat lawng na nauhak ding, asinan pitling thei loin na um ringring thei.” Peter Pan ih hnihsuak a sai vekin thil hrekkhat cu duh an nungzet nain an tthang thei dah lo.           

Pitling thei lo ih um rinring cu a remcang thei lo lawng si loin, cohlan a theih lo. Zumtu pawl cu kan pitling tengteng a ttul. Hrintharnak kan ngah ih Khrih thluntu kan si hnu cun thlaraulam ah nauhak vek si ringring ding kan si lo. Bible in, Amah bang sinsin ih tthanglian pitling dingah in sawmngiar.           

Paul in Korin kawhhran hnenih ca a kuat lai ah kawhhran sungah buainak tampi a um. Paul in thlaraulam ih an nauhaklai ruangah a si a ti.  Nannih hnen ahcun thlarau mi pawl hnenih ka simvek cun ka sim thei lo, hih leilung mi bangtuk Khristian zumnaklam ih nauhak vekin ka lo sim (1Korin. 3:1) a ti. 

Zumnaklam ih nauhak sinak in ziangti’n kan tthanglian thei pei? “Kan Bawipa le in Runtu Jesuh Khrih zaangfah lainatnak le Amah theihnak sungah tthang vingvo uh” (2Peter 3:18), tiah Peter in in ngen. Himi cu Pathian Ttongkam ruatthuknak le thlacamnak ih pumpeknak sin a si (Saam 119:97-104; Tirh. 1:14). Harsatnak a tongtu Korin kawhhran ih zumtu pawl vekin kannih tusan zumtu pawl khal Khristian nun ah tthanlen pitlin kan cu zo.  – Bill Crowder 

Bawipa bang sinsin dingah tthang ding ka duh,

A duhdawtnak tamsin midang ka hmuter ding;

Galilee ih a tuah vekin mah le mah el aw in,

Ka Bawipa biak ding ka duhbik.     – Gabriel 

Zumnak kan phun nung tikah

thlaraulam ah tthanlen pitlinnak a um.

(Visited 24 times, 1 visits today)

Comments

comments

Comments

%d bloggers like this: