Tonzang Peng

1069425_598942460140608_1232898006_nSalai Chinsuh

Tonzang Peng cu Tedim Peng ih saklam ah a um. India ram Manipur Ramthen thawn an ri (ramri) aw. 1360.36 skuaza miles a kau. Khua 101 a um ih milai 25700 hrawng an um. Tlang le kuam thuk a tamzet ih hmunrawn malte lawnglawng a um. Tlangzim sangbik cu Lauhkhopum a si ih tipithuanthum ihsin pi 8764 a sang.

Innbuk Tlangtluan le Thang Tlangtluan tla cu hitawk in an thok a si. Peng a laifangah Run Tiva a luangsuk. Tuisa Va, Zankong Va, Vongkai Va le Tuikui Va tla cu Manipur ramri an si. A keuhmi thingkung pawl cu: far, sokhlei, thil, le a dangdang tuthing tla an si. Kawl rawn naih ah tlawr, cing le maurua tampi an keuh.

Milai pawl cu Lothlo an tambik. Mau ram an vat ih fangcang an cing. Vainim, be a phunphun, aalu, rathe tla an cing. Hmuan ah epal, thawphat, laphak, khawfi, lingmaw le pukung tla an cing. Tonzang ram ah pupat tampi a suak. Mi malte in acozah hna an tuan. Cun, sumtuah khal malte an um.

Ngamngai khaw kiangah inn saknak tha lungtlep a suak. Tonzang khua le Tedim khua karlak ah mawtawpi lamzin a um. Tonzang in Cikha khua tiang mawtawpi zin a um nain, thal tikcu lawngah hman a theih. Tonzang khua in Tuimui khua, Selzang khua ah mawtawte a feh thei. Khawte lak zin cu kezin lawng a si. Khat le khat biakawknak ah carek, telefon le thirhri zung tla Tonzang khua ah a um. Tonzang khua ah acozah sizung pakhat a um.

Cun, khawte lam ah Taihne sizung 1, Rural Health Centre 4 le Sub-Rural Health Centre 20 a um. Tonzang Peng ah Phunhra Tlawng 2, Phunhra Tlawngkhuai 2, Phunriat Tlawng 6, Mulun Tlawng 18, Phunli Tlawng 57 tla an um. Tonzang cu Tonzang Peng khawpi a si. Tipithuanthum ihsin pi 4739 a sang. Milai 6800 hrawng an um. Hi khua ah Phunhra Tlawng 1, Phunli Tlawng 3 le Acozah sizung pakhat a um.

(Visited 197 times, 1 visits today)

Comments

comments

Comments

%d bloggers like this: