Tom Cruise tei Nupa Thenawk Thu Ah Ka Buai

Leitlun zuknung cangthiampawl hin vei tampi ka thin an ti bang theu. Par tin lawr rero men tla khi an bang ka ti theu. An duh le an then ih an duh le an nei leh sal men theu. Asinan, leitlun ih mi tamzet cu duhmi co lo le duhtu nei lo ih rak khawsa tla tamzet an um.

Tom Cruise hi leitlun mipa lakah hahio umbik le hmeltha ah hril a si deuh ringring. Falapawl hrang hahio umzetmi mipa a si ringring lai thotho. Tui a thainu Katie Holme thawn an neihawk ding ahkhan ziangtluk rei an nei aw pei timi ka rak ruah sak cia tho.

Tu ahcun thenzai an rel thlang. A thainu Katie Holmes sawn hin a innsangpa Tom Cruise hi a ning ti a sibik mei. A khawp neknek zo. Court ca ih an ngan khum daan vek asile rem theihlo thlengawknak ti a si. Asinan cukhal cu thuthangca ngantupawl in mipi siar phur dingah a ngan danglam deuh a si thei men.

Tom Cruise thuhla siar ih zingzawi deuh asi tikah nupi control hmangzet mipa a si. Cuhlei ah amah hrimhrim hi zuknung tuah le cang dingah tlanghra dan ih khual tlawng ringring a si lala fawn. Cuihlei ah mithen cun Tom Cruise hi a mipe (a pa lo deuh) titu khal an rak um lala fawn. 

A innsang nu khal cun a hlan hnakin ka hiarnak a cak deuh ruangah kum 30 sung ka innsangpa a laar zet ko nan khuitawk in kan thok ih khui tawk ah kan thuanthu a cem ding ti ka thei kerker cia ruangah kan thuanthu hi zingpit mero le laihang bangin ka cem tir duh a ti.

Tom Cruise hin an fanu kum 6 mite Suri Cruise hi biaknaklam ah nasazetih hruai a tum ruangah a innsangnu in le a duhlo ih cutin an karlakah nupa buainak a suak ti khal cun ngan thotho a si. Kan dung zarh tiang kha Katie in Tom Cruise hi I love you tiah phone sungin a ti lai ko nan, cuihnu ni 3 ihsin phone a phit ih biak a theih nawnlo ti a si.

Katie cun an neihawk ihsin tuini tiang lungawizet ih can a hman lo a tamsawn thu a sim. Cruise 49, Holmes 33 hi 2006 ahkhan Italian ah hlunghlaizetin an rak nei aw. Tui an thenawknak thubuai hi an fanu kum 6 mite Suri hin a thei hrih lo. A nulepa in theithiam lo dingah an zawl rero. Asinan, a nu in nasa deuh in court ah thuhla a sim tikah Suri khal court ih a din a tul lai men ding.

An neiawknak thuthlung ahcun Cruise hin kum tin $ million 3 lenglo a innsangnu pe dingah an lungkim aw. Ziangasikhalle tui an thenawknak rualremsalnak ding ahcun Tom Cruise hin a malbik $275 million a cem a tul ding. Katie le a innsangpa an hmuhawklonak thla teel a rei zo. Cruise ih birthday an lawm ding ni ah a innsangnu cun Cruise a then thu rorelnak court pawl ah a rak thlen ni a rak si ve.

Ziangasikhalle, mi nupa thu cu a zate theihkim a theih lo ding. Tui an thenawknakbik ih lang sawn cu, an fanu te kawhhran lam ih a pekawk tuk an phan ruangah le an nupa nunhlimnak le nuamnak a innsangnu in a lungkim thei nawnlo ruangah khal a si. Cruise zuknung cang ih a feh ringring ruangah a innsangnu umhar in a um. Sumpai hnakin nupa nunhlimnak a rak thupitzia tla Cruise in a thei sinsin ding ah ruat sehla.

An karlak ah fanau te an nei zo tikah thenawk hi nuam an ti ve hrimhrim lo ding. Asinan, an nupa karlak ah can reipi buainak le hmuhthiamawklonak a rak um zo ti cu a lang kerker a si. Hminthang sinsin duhnak le sungkua hrang sumpai tamsawn hmuh duhnak ruangah Cruise ih vah sukso a tam ruang khalah hivek in thenawknak zai an rel a si.

Khat lei ah a innsangnu Katie khal cun a innsangpa ih duhdawtnak le a taksa hiarnak ti famkim dingah a tling tawk nawnlo ruangah a sawl haal ti riamtu dang a hawl tum a si bik ko. Duhnak le hiarnak lakah an fanu te cu ziang theilo in an dung ih an hnawl mai a tuul fawn.

Kumkhua um tlang dingah khuanu in a rak remruat lo a si ding. An neihnak hi Cruise ih zuknung a can mi bangin “mission impossible” a si sawn ding a bang.

(Visited 135 times, 1 visits today)

Comments

comments

3 Comments

  1. Fiangzetin nan ngan ih ka hrangah hlawknak a si. CT ka lungawi.
    Rak ngan bet aw hi mi Katie hi a mah teh christian a si ve lo maw? An fanu biaknak lam ih nasa zet ih an kaihruai cu ziangahha a duh lonak? Biaknak dang dang maw an si? Na cangan dan hi siar a nuam thei zet. Ka lo suhmi kha na thei ko ding ka zum in rak ngan sak sal a w.
    Thanks

    Ma Mang

  2. Dear Ma Mang,

    CT ih ka thuthang post mi in rak siar sak ih ka lungawi.
    Cun, ka ngan ngah lo mi tiangin i sut ih ka lungawi sinsin.

    Na thusuhnak hi a hnuailam vekin ka lo sang sal.
    Tom Cruise ih nupi Katie Holme hi Roman Catholic a si.

    Curuangah malte an buai deuh.

  3. Dear ………………….

    Na Thuthang ngan mi kasiar ih angantu parah kalung awi zat
    Asi nan suh duhmi malte kanei ruangah inrak bawm dingin ka lo dil asi
    #A innsangnu cun Cruise a then thu rorelnak Court pawl ah a rak thlen ni
    arak si ve#…… hi mi thu hla hi Cruise si lo in Anupi Katie sawn in thu buai-
    Thenawknak thu suah in Court ah a khing ti nak si pei cu?…

    Lung Awi
    Stanley kio

Comments

%d bloggers like this: