Tlawngta Pawlin An Nulepa Hnen ih Ngen Mi

Tlawngta Pawlin An Nulepa Hnen ih Ngen Mi

10995676_1574211462843015_6504641206475614834_n

– Uk Lian

Duhthlannak Neih Ter Ding

Nulepa ih duhmi siloin a zirtu ding tlawngta ih thiam thei dingmi le phur zawng subject hril ter ding. A zirtu ding ih thiam theilo mi nulepa in zir tengteng ding ih nor ding a si lo. An zir hmanah rei an daih thei cuang lo. Curuangah nulepa siloin a zirtu ding tlawngta cun a zir dingmi subject le a si duhmi degree a hril sawn ding mi a si. Cutik lawngah hlawhtlinak ngaingai hmuh a theih.

Doctor le Engineering Lawng Si Ter Tum Lo Ding 

Nulepa tamzet ih uarbik mi pakhat cu an faate doctor le engineering si ter ding rori a si. Kan fa le te in doctor le engineering line a tlin maw timi tla kan theih a tul. Cun, himi degree pahnih lawng degree um mi tla a si lo. Hnatuan tha an hmuh thei nak ding lawng ruatin nulepa hin fa le te an sinak lo ding tiang si dingah kan nor mi cu thildik a si thluh lonak zawn a tampi. Degree le an sumpai lakluh thei daan ding lawng ruat loin an sinak ding ngaingai an si ngah ding mi timi sawn kha an hrangah a thupi mi a si.

Ca An Thiam Lo Deuh Tikah 

Tahthimnak ah an rel theu ih, nupinu pakhat cu tlawngta vekin zingkhat te cu, zingah a tho ih tlawngtapawl ih dinhmun thei dingah tlawngta nauhak pawlih um daan vekin a um ti a si. Cunu ih asim mi cu tlawngtapawl ih dinhmun hi a rak ol hrimhrim lo asi a ti. Cuvekin, cathiam lo le hlawhsamnak a um tikah nulepa in thazang an peknak hnakih tamsawn in an kawk theu tikah khak tuar vekin an ruahawk caan tampi a um theu. An zirlai an thiam lo tikah, an thiamlonak san theih sakih bawm sawn ding a si. Kawknak in thok loin thinnau lo ding in theitawk bawm sawn ding an si.

10478602_665779543527330_780509503598880947_n

Fa le te Caan Pek le Duhdawt Daan Thiam Ding

Nulepa in fa le te hnen ah cat loin, ca zir uh, zuam uh tiih nor le nun sim ringring lawng siloin, an zirlaica theihpi le an thlennak theih pi ding a si. Duhsaknak lawng a tawk lo ih duhdawtnak lawng khal a tawk lo. Falete hnen ah duhdawtnak le kan duhsaknak kha ziangtivekin kan tilang timi a thupi. Nulepa in fa le te hrang caan pe in an room rori ah umpi thei nulepa paziat an um pei timi ruah tlak a si. Curuangah nulepa in fa le te sim le duhsak men lawng tawk loin an duhdawt zia tuahnak thawn ziangtlukin an langter timi a thupi sawn a si.

Nulepa Thuneihnak Hman Thiam Ding

Nulepa hin nulepa an sinak hi thuneihnak zawng lawnglawng in hmang loin fa te hnenah thuruah ngam ding zawngin fanau biak thiam zir sawn ding a si. Fa le te pawlin nulepa hnenah an duhmi hman an rel ngam lo ahcun nulepa pawl sawn riangri siangpahrang vekin kan um tinak asi thei. Fa le te in nulepa ziangtin an hmu timi tla theithei ding in nulepa pawlin thusimnak caan pek thiam ding. Thuronawk thiam ding. Nulepa thuneihnak hi fa le te hnenah a khohkhah zawng siloin an hrang lamzin dik zawh theinak ding lilawn pakhat vek ih don sak sawn ding an si.

Cazoh Caan ah Hnaihnok Lo Ding

Nulepa tamzet cun fanaupawl ca an zoh lai ah tilh an fial ih an cazoh lai thinlung pe theilo ding khawp in hnatuan ding pe an um. Cun, ca zohnak caan ih caan tam deuh an hman tikah zum loin tongpa kawk ih kawk tu tla nulepa an um. Hivek caan ah nulepa cun an zir ngai maw zir ngaingai lo timi thaten a zohfel hmaisa hnu ah a tul daan in nunsimnak a nei sawn ding mi a si.

Nulepa le Faate Karlak

Ramdang ah tlawngkai, nunphung dang thlun kan sivekin, nulepa le fate in zir dingmi tampi kan nei veve. Nunphung dang lakah kan um tikah nulepa le fate karlak a siatlonak dingah biakawknak nei aw ringring ding kan si. Lai lam ih fa le nau zoh dan vekin zohawk a theih nawn lo. Upat aw ton ten nunkhawsak tlang ding kan si sawn. Kan nuambik le kan harsatbik caan khalah sungkua tlukih in hnem theitu an um lo vekin kan karlak a that ringring ding mi a thupibik miangmo a si.11059340_1574211542843007_413161407899482944_n

(Visited 691 times, 1 visits today)

Comments

comments

Comments

%d bloggers like this: