Tlangsuak Upapawl Hnenah

Tlangsuak Upapawl Hnenah

Salai San Thum Kar

2012 June thla ih suah mi Muko mekazin sungih Sayakyi Thang Tthai ih ngan mi ‘Ram khat le phun khat si ttung holh dang hi a har ko’ ti mi ah Sethmuh Vuanzi U Soe Thein in, “Nan duh mi le nan tul bik mipawl pahnih thum in rawn rel khawm aula, ca in in rawn pe uh. Acozah bu (Cabinet) asilole  President hnenah ka lo thlensak ding in ti.  Asinan kanmah le kanmah kan sidan kan ruah tikah duhdan a bangaw lo ding ti kan theih cia ruangah zianghman kan simsal nawn lo,” tiah a ngan.

Himi thu thawn pehparawin tuisun ni tiang ruahreltlangnak a um thei hrih lo asiahcun zoih mawh ha a si dingih, zoha kan va mawhsiat nawn ding? Simsak theitu le relsak theitu in nan tulbik mi tla in rawn sim aula, tlunlamah ka rak lo thlensak ding ti rero khalih kan sim lo leh kan rel lo asiahcun kanmai santlaihlo rori a si dingih, zohman mawhsiat ding an um nawn lo ding. Cuiruangah Lairam aiawh Tlangsuak upapawl sawmaw khawm in, hmun khat teah tokhawm aula, a tikcu a tlai hrih lo asiahcun. Sethmuh Vuanzi U Soe Thein ih thucah mi hi dawithlunsal in ruahreltlangnak nei thei aula cu a duhum nasa ding.

Lairam hrangah ziang kan tulbik ti cu ka thei lo nan, kan Lairam hrangih kan tul tiih ka ruah mi cu, Lairam saklam leh thlanglam awl-ai teih kan tlawnawk theinak ding hrangah motor zinpi kan tul tiah ka hmu. Kan neih cia mi Tedim, Falam, Hakha motor lamzin hi State dang ih an neih mi motor zin thawn tahthim cun ziang tinak hman a si lo. A se tuk! Pinlong Conference tuah laiih kan aiawhtupawl ih an rak dil mi ah, Lamzin tha teih tuahsak ding ti a si kha! Lamzin thaten kan lo tuahsak ding an ti ruangih Kawlram sungih rak telve mi kan si ti hi hngilh lo sehla.

Cuiruangah Lairam in motor lamzin tha kan neihve ih, saklam Lairam le thlanglam Lairam awl-ai teih kan tlawnpopawk theinak ding hrangah Cikha, Tedim, Falam, Hakha, Matupi, Paletwa, Mindat, Kanpetlet tiang Highway motor zinpi Rampi Acozah in tuanvo la ih tuahsak ding planning pi cangsuak dingin dilnak theh  lut sehla. Kan ngah loih in tuahsak lo asikhalah thawng tlaknak leh cawhkuannak khal a si loih, kan rak ngah ih in tuahsak asile lamzin tha kan nei dingih kan hlawk a si mai lo sawm? Thil dangah thu a rualtlang thei lo asihmanah himi Motor Zin thuhla ahhin cun nan thu a rualtlang thei ko lo ding maw?

Zeizongza sersiamtu Pathian hmanin, ‘King uh, an lo onsak ding. Dil uh, pek nan si ding,” a ti a si kha!!!

(Visited 38 times, 1 visits today)

Comments

comments

Comments

%d bloggers like this: