Tlangpar Ralkap Thihnak; Remdaihnak An Kham

ruak vui
Chin ralkap 2 tel in, tlangparmi ralkap 23 nunnak an liam tik ah, Kawl ralkap pawlin remdaih thuruahnak fehpi laimi a dawnkham, tiin tlangparmi hriamhrei kai pawlkomh in a ti.

November 19 sun ah Kawl ralkap in pukpi in Laiza kiang Kachin Independence Army ralkap zirnak inn an kah hi, ‘timtuah ciamciam mi’ a si tiah United Nationalities Federal Council cun November 20 ah catluan a suah. Kawl ralkap in remdaihnak an duh taktak lo hmang tiah UNFC cun a zum.

“Himi hin zumhnak tuahnak, napi in a dawn” tiah UNFC in catluan in a sim. Kawl ralkap in timtuah ciamciam hnu in KIA zirnak inn hi an kah ih, remdaihnak an duh taktak lo a si ding tiah a ti.

KIA captian Mong Gwang cun, “Kan thin an hengter. A san cu, buainak na deuh a ra ding tinak a si” ti, The New York Times cun a ngan.

Shan MP Saw Than Myint cun, November 19 ih Kawl ralkap tuahmi kahnak hi kahdaihnak tuah duh haiseh tiah Kachin an namhrimnak a si ding tiah a zum. KIA in Kawl ralkap an zum hai lo ruang ah, kahdaihnak an tuah thei lo.

“Himi hi cohlang awk tha a si lo ih, remdaih tuahnak ihzuam rero laimi tlamtlingter lotu a si thei” tiah Shan MP cun a ti.

KIA: Kawl Ralkap In Thuphan An Sim

UNFC le KIA in Kawl ralkap thilti hi timtuah ciamciam hnu in an tuahmi a si an ti lai ah, Kawl ralkap in tmtuah cia in tuahmi a si lo a ti ve. Kawl ralkap simmi hi thuphan a si tiah KIA thusimtu La Nan sun a sim.

November 19 ah Col. Than Aung, Minister of Border Security, Kachin State in Myitkyina ah a sim ih, Kawl ralkap in pukpi kha ‘ralrin peknak’ hrangah an kahmi a si, a ti.

“Nunnak a liamnak par ah a poi kan ti ih, remdaihnak fehpi rero laimi a kuhkah lo ding kan ruahsan” tiah ngaihthiam dilnak thu pakhat hman telh loin a sim.

Mansi kiang ah KIA in cozah ralkap an kah ruang ah, ‘ralrin peknak’ in an kahmi a si tiah Col. Than Aung cun puhmawhnak thu a sim lehlam.

Hla Maung Shwe, Myanmar Peace Center director, remdaihnak fehpi rero laimi hrangah, timtuahnak tuanvo latu cun, “Tatmadaw in an lehnak men a si. Ti sualmi a si” tiah Kawl ralkap tta in a sim.

La Nan cun Mansi kiang ah ralkap in lamzin an tuah thu kan theih lo ih cutawk ah KIA khalin an kap hai fawn lo tiah a ti. “Thuphan a sim” tiah La Nan cun a ti.

Khun Oo Reh, UNFC General Secretary cun, ‘timtuah ciamciam hnu in’ an tuahmi a si, 2015 hrilawknak a um hlan ah, daanhram remh a si lo ding an ti hnu le ASEAN tonawknaknak an theh hnu ah, ziangah acozah cun hi bangtuk mi cimpam in kahawknak hi a tuah si pei tiah a ti.

“Timtuah ciamciam hnu in an tuahmi a si ti kan zum ih, atu laifang caan ah, hiti an tuahmi hi kan khawruah a har rori ko. Zumnak lam kan tuah lai ah, hivek thil an canter hi, a mak ko” tiah UNFC General Secretary nih a sim.

Ref;  Globalchinnews.com

Comments

comments

Comments

%d bloggers like this: