Tlang Ttong (Common Language)

August 30

Tlawngkai Nikhat 

Tlang Ttong 

Siar:

Tirhthlah 17:22-32 

Pathian nan biaknak hmun pawl tla ka zoh ih biakttheng pakhat parah “KAN THEIH LOMI PATHIAN HNENAH” tiih nan nganmi ka hmu. Cuti ih nan thei lo nacing ih nan biakmi Pathian cu atu nan hnenih ka phuanmi hi a si.     – Tirhthlah 17:23 

Kumkhat Sung Baibal:

–   Saam 129-131

–   1 Korin. 11:1-16 

Mino hnattuannak in tlawngta pawl cu Jamaica ih mino zirhnak hmun ah an va leeng. Cutawk ih umtu pawl cu daan thlun lo ruangih an dawimi pawl le innsang ih nunsim theih lo ruangih rak apmi tlangval hoklak pawl hlir an si.    

Nunphung mizia a bang aw lomi mino nauhakte pawl hrangah an thilti daan cu thil ol-ai a si lo. Ziangti’n an biak aw thok ding? Ziangti’n an peahtlai aw ding?        

A rei hlan ah tuah daan ding an thei ngah. Tikcu caan rei lote sung bawlungsit puai an tuah. US tlawngta le Jamaica tlawngta ti’n leknak nuamzet an tuah sak.        

Bawlungsit an vun thawh vete’n pakhat le pakhat karlak ih dawnkhamtu pawl a hlo thluh ih an nel-aw mai. An paih zawng a bang awmi bawlung an sit ttheh in pawlkomnak le biak awknak olzet in an nei thei.        

Tirhthlah 17 sungah Paul in a tthen awmi mibur pahnih pawlkom awk saalnak le hruangkham pawl ziangti’n siatbal ding timi thu a tarlang. An thinlung lutzet vemi Pathian biaknak thu in hram a thok. Cuti vekin kan innhnen le hnattuanpi pawl thawn ttong hram kan thok asile thil ziangkim hi a cang thei ve ding a si.        

Pathian ih duhdawtnak thu theih a ttulzetmi pawl thawn kan pehtlaih awk thei ih thuthangttha kan sim theinak dingah duhthusam bang awmi thu rel tlang ding hawl thiam uhsi! Cule hruangkhammi a cim ding.   – Dave Branon 

Pathian ih thlarau ka innhnen ah a thleng thei,

Rundamnak laksawng pe in;

Lamzin on ding ka tiar ahcun,

 Awkam tthate ih biak awknak in thokin.   – Hess 

Pathian ih duhdawtnak cun hruangkhammi a siatbal thei.

(Visited 33 times, 1 visits today)

Comments

comments

Comments

%d bloggers like this: