Tlang Hrap Kai Thei Ding in

Šianglianuk Ķianghrol

Virginia Phunsangtlawng ih zirhliahtu mithiam pawl in, mi tamsawn in tlang hrap an zoh tikah a hrap dan taktak hnakih hrap sawn ding in an hmu ttheu, a hleice in an bangcauh can lole thil rit an phurh can ah cutin an hmu cuang, timi an hmusuak.

Tlang ih a hrap lam an zum dan an relter tikah, degree 10 ih hrap mi kha degree 30 ih hrap, degree 5 ih hrap mi kha degree 20 ih hrap a si an zum thu an rel. A hraplam taktak an sim tikah, cutluk ih an hisap sual an zum lo thu an rel cio fawn.

Cuvek thotho hi kan nun ah a thleng ttheu. Thinharnak in in delh can le kan bangcauh can ahcun buainak tenau tete hman khi tum zet in kan ruat ih, cinfel harsa kan ti zet ttheu. Kan nun tlamtluan ih harsatnak kan ton tikah, tlang hrap tawhram ah to in, kei ih kaisuah thei ding ci a si lo, a hrap tuk lawmam tiah kan bei a dong ttheu.

Cumi cu Pathian Ttongkam ihsin thazang kan lak a ttulnak a si. Pathian Ttongkam cun, kan ttulhai mi theitu le cat bang lo ih in kilkhawitu Pathian lam ah hoi ding in in kaihruai. Isaiah cun, “Nan hmu lo maw? Nan thei dah lo maw? Bawipa cu kumkhua ih a hmun mi Pathian a si. Leilung hmuahhmuah tuahtu a si. Anih cu thabang le thacem in a um dah lo; A ruahnak cu theih ban ding rual a si lo. A bang mi le thacem mi pawl cu an tha a cakter sal,” tiah a rak ngan (Isaiah 40:28-29).

Hupphurhnak le ttihnak ruangah kan ton mi harsatnak pawl kan pahtlang ngam lo can ah siseh, cawlhsan kan tum can ah siseh, thazang petu kan ttul. Isaiah thotho in, “Sikhalsehla Bawipa a rinsantu cu an tha a tlung sal ding. Muvanlai vekin thlapharh in an zam ding. An tlan khalle an tha a bang lo ding; an feh rero khalle thacem in an sawn dah lo ding,” tiah a rak ngan (Cang 31).

Curuangah, kan ton mi harsatnak tlang hrap kai thei ding ah Bawipa cu in bawm ding in a man cia ringring timi hi kan thazang lak hramthoknak si hram seh.

Sirhsan: Theih lo mi cangantu ih “A Difficult Hill.”

Comments

comments

Comments

%d bloggers like this: