DOAWKNAK ROPIBIK

DOAWKNAK ROPIBIK

Timothy Sui Lian Mang

«Cule nangmah le nunau lak le na cithlah le nunau Cithlah lakah ralawknak ka ret ding, na lu hma a baih ding ih, nang in a kedil hma na baih ve ding,” tiah a ti. – Sem.3:15

San i kipih doawknak hi sual a um tir ihsin Pathian le Setan karlakih doawknak maktak um mi a si. Hi doawknak hi doawknak ropibik khal a si ih, Pathian in tlolak a semsuah tir ihsi um mi doawknak a si. Milai sersiam hlan ihsin sual a rak um zo. Milai hi sual tawthawktu a si lo. Milai cu sual leitlun ih a luhnak dingih hmanrua men a si, sual cu milai sersiam hlan ihsin a rak um zo.

  1. I. Pathian Tlang ih Doawknak:

Curuangah Pathian Tlang ihsin ka lo hlawnthlak.”- Ezk. 28:16.

Profet Ezekial le Isaiah ih phuan mi thu hi hmai lamih thil thleng ding mi a si ih, a liam cia can ih thil rak cang zo thu khal a si cih, milai sersiam hlanih Pathian le Setan rak doawknak thu fianften an phuang.

Minung fapa, Taiar siangpahrang tahhla she awla, a hnenah hitin sim aw tiah Pathian in a ti. Nang cu Pathian hmuan Eden ah na um; lunghlu phunkim cu na ceiawknak a si: rubi, topaz le daimon, krisolaih, onik le jaspa, safaia, tarkois le beryl, emerald tla an si. Na dinnak le na tawdam cu sui ih tuah mi an si. Semsuah na si ni ah timlam cia na si. Nang cu kiltu Cherub hriak thih na si, cutawkah ka lo ret. Pathian Tlang thianghlim ah na um ih, lungto vam lakah na tawileng. Semsuah na si thawkin nan nuncan sawihnawm ding  aum lo, fellonak na sungih hmuh na si tiang na fel lai. Na sumtuahnak a tam tuknakah na kutv a hngam rupro ih na sual. Curuangah zarhbual na si tiah Pathian Tlang ihsin ka lo hlawnthlak. Maw nang hliaptu cherub, cuisine lungto vam lak ihta ka lo suah lawlaw ih, ka lo thiatbal.” Ezk. 28:12-16.

“Maw deirel arsi, zinglam fapa, ziangtin van ihsin na tlak! Leilung parah hlawnthlak na si ih, vei khat cu ram dang miphunpawl niam ah na rat. Asinan na thinlung sungih, “Van ah ka kai ding ih, ka laltohkham cu Pathian arsi tlunah ka cawiso ding; cule mipi khawmnak tlang parah siangpahrang ah sak lamih tlang thianghlim sannakbikah ka to ding. Khawdur sang tlunah ka kai ding ih, Cungnungbik bangin ka tuah aw ding,” tiah na ti.- Isa.14:12-15.

A tlunih Bible kan siar tikah khuahlanpi ihsin doawknak a rak um zo ih, Jesu in a ke hnuaih a ret thluh hlan lo hi doawknak hi a dai lo ding ti fiang. Hi Pathian Tlang ih doawknak hi cu vangcungmipawl lakih mawibik, thabik ih sersiam le hotu lubikih ret mi Lucifar in Pathian a donak a si. A duhhamnak, a iksiknak, a hngalnak cun Pathian do duhnak a thlen ih, a dungthluntu vancungmi ziangmawzat thawn van ihsin lei parih hlawnthlak an si. Hi doawknak a thawh ihsi hin Setan le Pathian karlakih doawknak hi tuisun ni tiang a um vivo. Lucifar in amai dinhmunih diremnak a neih lonak ruangah amah le amah cawisanawk a tumnak ihsin hi doawknak hi a thawk mi a si. A dungthluntu na si ve pang maw?

  1. II. Milai Donak:

“Cun Pathian in, “Kan bangpi le kanmah bangnak nei in milai tuah uhsi. Annih cun tifinriat sungih nga, van ih vanzuangpawl le rannung, leilung tlun hmuahhmuah le lei parih bawk i vak mi bawkvak kip tlunah thu nei hai seh,” tiah a ti. Cutin Pathian in milai cu amai bangpi in a rak sersiam; Pathian bangpi in amah cu a rak sersiam; anmah cu mipa ah le nunau ah a rak sersiam.  Cun Pathian in mal a sawm hai ih, Pathian in an hnenah, “Ci tampi zaih uhla karhzai uh; leilung luahkhat uhla uk uh. Tifinriat sungih nga, vanih vanzuangpawl le leilung parih vakleng thei mi thilnung ziangkim tlunah thu nei uh. Cun Pathian in, “Zoh hnik uh, leilung hmai vangdap hmuahhmuah parih um, ci nei thlai tinkim le thingkung rah mu nei tinkim in nan hnenah ka lo pe; cucu nan hrangah rawl an si ding,” tiah a ti.- Sem.1:26-28.

Pathian Tlang ih doawknak rak um zo mi cu a peh vivo ih, Pathian khawkhan mi tha zet cu Setan cun siatsuah a tum. Semtirnak bung thum thawhnak ah khan “ rul” a lang lohli ih doawknak a si cih tinak a si. Setan in Pathian sersiam mi milai cu bum tahratin Pathian khawkhan mi hlawhtlingter lo ding a tum. Cutin a sersiam milai nunaunu kha a bum ih, Pathian ih ei sen lo mi thing thei rah ei ko a tuah. A pasal Adam khal cun a nupi Evi thu lung in a ei ve. Setan kut hnuaiah an thleng tariai. Pathian le milai pehzawmawknak cu a cat. Cucu thlarau lamah mithi an si tinak a si. Hell ram feh ding an si thlang. Setan in Pathian khawkhan mi cu a siatter ngah riai. Asinan Pathian in Setan hnenah atu ah milai cu ka thuneihnak hnuaiah, ka ke hnuaiah ka retngah tiah na ruat ko, asinan an parih na thuneihnak, na nehnak lo thiatbaltu hi nunaunui sung ihsin a suak leh ding tiah Pathian in doawknak rung um vivo ding thu a phuang. Cucu kan Bible thupi Sem.3:15 ah kan hmu: “Cule nangmah le nunau lak le na cithlah le nunau Cithlah lakah ralawknak ka ret ding, na lu hma a baih ding ih, nang in a kedil hma na baih ve ding,” tiah a ti.

Doawknak cu a taw a thawkfang hi a si. Raldotu  Khrih a suak ding ih, rul cu lei vut a liakter ding. Setan in Pathian-ih milai cu a siatsuah ko nan, Pathian Fapa Khrih a rat tikah Setan thuneihnak a thiatbal leh ding. Adam hmaisa cu neh a si ih, Adam neta in a neh ding. Nunau ci ihsin mi pakhat a rung suak leh ding ih, Setan lu cu hma a baih ding. Khrih  a suah tikah Setan a neh leh ding thu Pathian in a phuan tikah Setan cun a tih tuk lawmmam, cui thutiam Khrih Jesu suak thei lo dingin a phunphun in Setan cun a kham. Zoh vivo hnik uhsi.

  1. III. Ci Tiam Suak thei lo dingih Donak:

Pathian thutiam Sem.3:15 famkim thei lo dingin Setan in a phunphun ih a khamdan hi maktak a si.

  1. Adam fapa Abel thahnak: Adam le Evi fapa pahnih Kaina le Abel hin midingfel le misual an aiawh. Pathian hnenah thil an hlan tikah Abel ta kha Pathian in a cohlan tikah Setan a lung  a phang ih, ci tiam hi Abel sung ihsin a suak pang ding ti phangin Kaina hmang in Abel cu a that.
  2. Leitlun pumpi siatsuahnak tilik: Semtirnak kan siar tikah leilung tlunih milaipawl cu an sual tuk lawmmam, an nun a bawrhhlawh tuk lawmmam tikah Pathian a thin a heng ih, milai hmuahhmuah hlohralter theh a duh. Setan in milaipawl a sualter vivo ti a lang. Pathian in tilik a tlungter. Asinan Pathian khawkhan cu siathloral lo dingin Noah le a suangkua mifel an rak um.
  3. Israel naute mipa pohpoh thah an si:

Suahlannak cabu bung khatnak ah khan Israel nunaupalw in naute mipa an neih asile that theh dingih thupek a si. Ci tiam that dingih Setan khawkhan a si nan a hlawhtling cuang lo.

  1. Khawse pawlh siangpahrang Saul in David thah a tum:

Tum hnih rori siangpahrang Saul sungah khawsia a lut ih David that dingin thirfei in a khawh thu Bible ah a lang. Atir ihsi mithat Setan kut a si ti cu a fiang. Ci tiam suak thei lo dingin Setan cun a kham, a do rero ko. Pathian in David cu a humhim ih Saul in a that thei lo.

  1. 5. Athaliah in Judah siangpahrang suangkua hmuahhmuah that theh a tum:

Setan thuneihnak siatsuahtu ding Khrih suahnak ding cu a fiang vivo, a fate vivo. Juda hrin, David sungkua ihsin a si ding ti Pathian in a phuang fawn. Setan Khrih suahnak dingih a theih mi sungkua hmuahhmuah cimit ko thah theh a tum thu le Pathian ih a hum thu IISan.22:10-11 ah kan hmu:

Atu ah Ahaziah nu Athaliah a fapa a thi ti a hmuh tikah a thawk ih Juda siangoahrang cikuanfg hmuahhmuah a rawtthat thluh. Asinan Ahaziah fapa Joash cu siangpahrang fanu  Jehoshabeath cun siangpahrang fapa an thah mipawl lak ihsin a hruaihlo ih, a kilkhawitu thawn ihnak pindan sungah a thup. Cuticun siangpahrang Jehoram fanu Jehosabeat, puithiam Jehoiada nupi in (Ahazia farnu a si) Athaliah ih hmuh thei lo dingin a rak thup. Cule a that ngah lo.”

Athaliah cu Ahab le Zezebel teih farnu a si. Mithat hmangf  a si. Setan khawkhan a hlawhtling cuang lo.

(5) Haman in Jew mi hmuahhmuah cimit ko thah theh a tum: Esther cabu sungah Israel thuanthu kan hmuh mi cu Israel mipawl kha sal an tannak ihsin Medo-Persia umnak ram hmun i kipah an tekdarh theh. Siangpahrang Ahasuerus cun India ihsin Ethiopia tiang, 127 ram then a uk ti a si. Leitlun pumpi tinak a si. Haman in siangpahrang Ahasuerus uknak ram sungih Israel mi hmuahhmuah cu cimit ko thah theh a tum. Setan a hlawhtling cuang lo lala.

  1. IV. Titsa ih Rung Cang Khrih Jesu Donak:

Sem. 3:15 ih Jesu suah ding thu phuan mi kha suak thei lo dingin Setan in lamzin a phunphun in  ado, a kham rero nan a hlawhtling lo ih, Jesu cu Bethlehem ah a suak thotho. A suah hnuah Setan cu a thin a phang tuk thlang ih, Pathian thil tum Kalvary thleng thei lo dingin a phunphun in a do lala.

(1)   Naute Kum hnih le a hnuai lam hmuahhmuah thahnak:

Herod in naute Jesu a suak ti a theih tikah naute kum hnih le a hnuai lam hmuahhmuah that dingin thu a pe. Asinan Jesu cu a that ngah cuang, Pathian vancungmi in Joseph kha Izip ram ih tlan dingin a fial.

(2)   Jesu Sualfawrhnak: Jesu cu a pitling thlang ih, a Paih hna tuan a tum thlang tikah Setan  athin a phang tuk lawmmam ih, ni 40 sung amah Setan rori in vawi thum sual a fawrh. Jesu in Pathian kamsuak thu hmang in a doneh. Setan in a tlansan.

(3) Nazareth ih Sinakok ah: Jesu rawngbawl a thawk pekte ah Sinakok ah thu a sim. Mipi an thin a heng tuk ih, Sinakok ihsin an suah ih khampi ihsin hlawnthlak an rak tum. Asinan Jesu cu mipi lak ihsin a fehhlo. Kalvary thleng lo ih thah kha Setan in a rak tum lala.

(4) Galili tili parah: Jesu cu a dungthlungtupawl thawi Galili tili parih Lawng ih an feh laiah tisuar, thlipi in a n lawng a nam ciamco kha Setan kut a sizia a langfiang. Jesu in a tisuar le thlipi kha a kawk ti a si kha.

(5) Peter lungthin sungah Setan in hna a tuan: Jesu in a Kalvary thilcang ding mi a nai thlang ti a theih tikah a dungthlungtupawl hnenah misual kut ih amah Jesu pek a si ding thu, an vuak an velh ding thu, an thah ding thu, a thawhsal ding thu a sim hai tikah Peter in Jerusalem lamah feh loin, zin dangin kan feh pei tiah Jesu tan vekin a ti. Jesu in, „Setan ka dungah feh aw,“ tiah a kawk. Kalvary thleng lo ding zawngin Setan lamzin dang a hawlnak a si.

(6) Kalvary ih Doawknak: Titsa ih rung cang Jesu rori donak netabik cu Kalvary ih donak hi a si. “Diabol cu Judas Isakariot sungah a lut ih,” ti a si. Jesu cu a zuar, an kai ih, Kalvaray khraws parah an thlai, a thi. A lu ah hling lukhum an khumsak. Cui hling lukhum cu Adam hmaisa in leitlunih a luhpi mi hling an si. Camsiatnak a hmuhsak. Jesu in cui camsiatnak hling lukhum cu rei lo te sung thlan sungah a luhpi ding, camsiatnak cu phum a si ding. Jesu cu Siangpahrang a si, camsiatnak nehtu a si.

Hi Kalvary Doawknak ah Setan  a hlawhtling maw? Jesu in ziangtin a au? „Theh a si zo,“ tiah a au a si kha! Mangbang auaw a bang lo, nehnak auaw a si. Vancungmipawl khan, «  Hi tawkah a um lo, anih cu a thosal zo, » tiah thu an than a si lo maw ? A sullam ziang a si? A thi mi Khrih kha nehtu Khrih a si tinak a si. Haman kha mithah a tumnak thing parih khaithat a si bangin Setan khal Khraws  ih thuthensak a si. Setan lu cu hmabaih a si riai. Jesu cu, « ..An nun sung hmuahhmuah thih ?ihnak salih tangpawl a runsuak theinak dingah..(Hewb.2 :15) thlan sungah a lut. Leilung tlunih mifim, mithiam, micak, milian le zokhalih neh theih lo ral netabik cu THIHNAK le THLAN hi a si. Jesu cun a neh, ziangtin a neh tile, thln sungah a luhcilh ih, thihnak khal amah rori in a luhcilh ih, a thosal. Thihnak le Thlan khal in Jesu parah thuneihnak an nei thei lo. Jesu in keimah i zumtu cu a thih khal le a thosal ding a ti kha. Thihnak le thlan ihsi a thawhsal hnuah cun, ““Maw Thihnak, na hmanrua cu khuiah a um? Maw Mithikhua, khuiah saw na nehnak

cu?” Thihnak ih hmanrua cu sual a si. Sual ih huham cu Dan hi a si. Asinan kan Bawipa Jesu Khrih zarih nehnak in petu, Pathian hnenah lungawithu um seh.”(IKor. 15:55-57) ti a si.

Hi doawknak lakih doawknak ropibik nehtu cu Pathian a si. Jesu a si. Jesu in Setan a neh. Thihnak thlentu, thlan umtertu Setan cu neh a si ih, thihnak le thlan khal neh a si zo. Cui Jesu cun kumkhawnak kan co theinak dingih thil tul mi hmuahhmuah in tuahsak theh zo. A tuantheh zo mi cu ka va lungawi ve tiih cohlan cu kumkhaw nunnak a si. Amah Jesu kha nitin nun ih rinsan le hman cu nehnak nun a si. Khrih hi kan ziangkim ih ziangkim a si.

(Visited 73 times, 1 visits today)

Comments

comments

Comments

%d bloggers like this: