Tipi Thuanthum Sungah Lawng Taih Aw

February 17,2009
By- Khuang Lian Sum
 
Tipi Thuanthum Sungah Lawng Taih Aw
 
Royal Navy Nuclear Tipi thuanthum sung lawng pakhatcu.  Atlantic Tipi thuanthum sungah French Nuclear Submarine thawn an ttaih aw ih, HMS Vanguard, leh Triomphant Taih awk nakhi  tuithla tirlam ah khan asinan  thunei tu pawlin an rak puangzar duhhrihlo asi. Hi lawng pawlhi ralthuam thazetzet thawi thuammi an siih. traffic an sual pangih an hmu awlo veve ih zumasi. Himi thu ah hin  British Defence Ministry cun ziangthu hman a relduhlo ih a ngaihdan khal zianghman a relsuak duhlo ih Nuclear ralthuam thuhla ih danding lai pahbal nak zainghman a umlo ti lawng a relsuak.
 
Israel In-India Ralthuam Pe Tam
 
Leitlun ram dangdang lakih sin Israel cu India hnenih ralthuam phunphun Supply tambik asi zo ih. Russia hman a hlaihzo asi. A liancia kum 10 ihsin Israel cun India hnenah ralthuam phunphun dollar billion 9 man Supply nakding thurthlung a rak neizo tiah  Jerusalem Post thuthangca cun a tarlang. Israel Defence thu puangtu cun Israel leh India cu misual do nakleh ralthuam hmandan khalah an thurual vivo dingih a beisei thu a sim.
 
A liamcia kum 40 sungih sin  Russia cun India hnenah kumtin ralthuam phunphun dollar million  875 man hrawng a rak zuarlut  ringring. India hin nikum Nov, 26 ih misual pawlin Mumbai khawpi an siim ihsin Israel hnen ah tipi kap tluan kilhim nak leh zohfiangnak  Aerostat Radar System dollar Million 600 man a leizo ih. Ralpawlih Vanzam leh Missile pawlkhal hlapiih sin rakhmu fiangthei dingin hmunpawimawh remcangah a bun vivo tum.
 
Pakistan Leh Al-Qaida Ceasefire Tuahding
 
Pakistan Cozah cun a ramsungih  Swat phairuam ih umhmun khuar Al-Qaida leh Taliban Tapung pawlcu  ni 10 sung Ceasefire tuahpi dingah a puang cingding tiah zum asi. Al_Qaida leh Taliban pawlcun  Pakistan Cozah thawi Ceasefire an tuahtlang dingthu hi an puang zo ih. Pakistan Cozah hin Tapung pawlhi  rualremnak tuahdingin vawi tamtak thu a rak relpizo nan a rakhlawhsam ttheu ih Pakistan Cozah hin ralkap cahnak hmangih Al-Qaida leh Taliban pawlhi neh thei  a zumlo ruangah Ceasefire tuahpi a tum asi ding tiah politics thlirtu pawl cun zumnak tumzet an nei. Himi ;laiah America cun Pakistan in Al-Qaida leh Taliban pawl Ceasefire tuahpi a tumcu an duhlo zetih  Ralkap  thlahdah awksungah Tapung pawlhin ralthuam hriamnam tamzet an lasuak mantheuih  Minung khal Training an zirhter thluhman theu tiah an sim.
 
Himi Ceasefire an tuahtlang tum ruangah Taliban pawlin an kaihmi  Chinese Engineer Long Xiaowei, cu tuikan dung colhni sun ah an suahsal tithu Taliban thupuangtu Muslim Khan cun asim.  Muslim Khan cun  Ceasefire tuahlaiih Al-Qaida leh Taliban pawlin meithal kanret laih Pakistan ralkap pawlin inkap pang asi ahcun Pakistan ramcu zangfah nakleh dimdawih nak umlo in Taliban leh Al-Qaida cun a kut a thlakdingih an hmalam zinzawh ding cu a thimzet ding tiah a sim. Himi laiah Taliban pawlin an kaihmi America mi UN hna pawimawh tuantu John Solecki,  cu a umnak leh a dinhmun thei asilo ih.  Taliban pawlcun nazi 72 sungih an thah dingthu an puangsuak.
 
Pakistan ramih Swat ram phai ruampi cu tuihlan ah cun Pakistan ram a tlawngtu ramdang mipawlih fehnak leh pal ringring mi ramnuam leh ram mawizet asi ih tuah cun Al-Qaida leh Taliban Tapung pawlih umhmun khuar nak asi ruangah khualtlang pawlin anpal ngam nawnlo. Hi Swat ram kiangkap ah hin Al-Qaida leh Taliban Tapung pawlcun Islam dan khauhzet  Shariah Law anti mi cu hmanter thluh an tum nakhmun asiih. himi kiangah tuikan dungnaite khalah Poland rammi leilung lam zirmi mi pakhat cu an kai ih a lu an tansakzo.

Comments

comments

Comments

%d bloggers like this: