Tipi Thuanthum Ah Lawng Ttaih Aw

March 10th, 2009

  Japan Tipi Thuanthum Ah Lawng Ttaih Aw

  Tuizingah Japan ram Tokyo khawpi thlanglam KM 120 hrawngih hla Tipi thuanthum parah Sumdawnglawng Pahnih an Ttaih aw ih. South Korea minung 7 leh Indonesia mi 9 an hlo tiah  Japan Coast Guard cun a sim. South Korea Flag tarmi lawng Orchid Pia leh Panama ram Flag tarmi lawng Cygnus Ace lawnghi  Izu Oshima tikulh kiangte ah an Ttaih aw ih. Cygnus Ace lawnghi Ton 10,833 ih ritmi asi ih. Orchid Pia Lawnghi Ton 4,255 ih ritmi a si.   An Ttaih awk veten Cygnus Ace lawng hnattuan pawlin Coast Guard pawlih hnenah an simcih ih. Asinan  Coast Guard Radar pawlin South Korea lawng Orchid Pia lawnghi an be pawp thei nawnlo ih  Radio signal an kuat khalah Orchid Pia lawnghin a sang nawnlo. Cu ruangah Coast Guard cun himi lawng hawl dingin  Lawngdang 6 leh Vanzam 2 a thlahcih. Hi South Korea Orchid Pia Lawngah hin minung 16 an to ih thirhlum Ton 5,051 ih rit a phurbet. Oschid Pia Lawnghi a pilhlo zo ih zum asi ih hawlsuak dingin theihtawp an suahlai rero. Japan ram saklam Kashima ihsin  South Korea panih  fehmi a si.  Panama lawng Cygnus Ace khalhi a siat veko nan lawng tum deuh asi ruangah a siat natuk loih a fehthei lai ih Himi lawngih sin mithi leh mihlo an um lo.  

China In US Thu Phanper Puh  

 Tui colhni tihni sun ah khan  Haina tikulh ih US Navy lawng USNS Impeccable cu leitlun Lawng fehdan vek diktakih a feh laiah. China lawng 5 hrawngin  an hringhro ih  an ter phahphah ih tthihnung zawngin an tibuai ruangah. US Cozah cun a lungawilo thu Pentagon ih China ralkap ai awhtu ih hnenah an thlenih. Himi thu ah China cun America ih thurel micu zum tlaklo leh thuphan thu asi tiah a tive.China Lawng pawlcu tipi thuanthum ih  leitlundan lawng fehdan diktak vekin an feh asi an ti.   China Foreign Ministry thupuangtu Ma Zhaoxu cun America thurel mihi cu thilzum tlak leh thu ngaithu ih ruah tlakding pakhat hman a umlo. Cu ruangah himi thu ah cun America hin thuphan tumzet a per asi ati. US cu an ram lawngcu tibuai nawnlo dingin leh hringhro nawnlo dingin China cu a simih. Tuihnu lamih hivek thil a thlengsal asi ah cun America hin a duhbik mileh a tumbik mi silo thilkhal a tuah a ttulding ati.  

Iraq Ah Bomb Puak

  Mizan ah Iraq khawpi Bagdad thlanglam ah thihcilh Bomb a puaksal lala ih Ralkap hotu pawimawh telin minung 33 an thiih midang 46 an hriamhma an tuar. Hi Bomb puahnak hmunhi  Abu Ghraib District ah asiih. Iraq ram rualrem nak thu relkhawm dingih feh Upa Mipawimawh pawl thahtum nak ruangih puahmi asi tiah an sim. Tui Colhni tihni sun khalah Palik laknak dinghmunpi ah Bomb a puakih minung 28 an thizo. Iraq ramhi tulai hrawngah a daideuh thlang tiih ruahmi asi nan tu naite hrawngih sin buainak phunphun leh ,Bomb puak, Mithat aw. tivek a tamzet salih.  BBC cun Iraq ramah hin rualrem nak leh daihnak ngaingai cu a umthei hrihlo asi tiah a puang,   Tui Bomb puakih mithi pawl lakah hin ralkap leh Palik ziang mawzat an telih Thuthangca latu ziang mawzat leh  Al-Bagdadiya TV ai awh tu khal a thitel.  Hi Bomb puahnak hmunhi  Abu Ghraib Town Hall sunag a si ih. Bomb tipuaktu hi Hall Inn sungah a luh leh luh lo fiangtei theinak a umlo.

  SriLanka Ah Bomb Puak

   Tuizing ah  Sri Lanka ram Matara Khawpi ah Bomb a puakve ih minung 10 an thiih midang 20 lenglo in hriamhma an tuar. Hi hriamhma tuartu lakah hin Minister pakhat a tel tiah Palik pawlcun an sim. Hi Bomb hi  Cozah Upa leh mipi tamzetin  Islam biaknak pawimawh an hmannak dingih puak asi,   Defence Ministry cun hi Bomb tipuaktu cu LTTE pawl an si ding tiah asim nan  LTTE pawl an si rori tiih thei fiangnak cu an neilo. Himi Bomb puahnak hmunih rak umve  Sri Lanka Oil Minister  HM Fowzie, in  Renters News Agency a sim nakah  Minister pawlin Muslim Biak Inn panih ke ih an feh laiah  hi Bomb hi a puakih cu ruangah Minister pawl thahtum nak hrimhrim asi a ti. Hi Bomb puakah hin  Post and Telecommunications  Minister Mahinda Wijesekara khalin hriam hma a puve ih. Asinan a bese tuklo tiah an sim. Thuthangca pakhat cun himi Bomb puakah hin Minister pathum ih hriamhma an tuar tiah a simnan BBC cun hi thucu a diklo tiah a sim.  

India PM In Biaknak Sakhua Sawisel A Thianglo A Ti

   Tuisun ah India ram Prime Minister Manmohan Singh cu Muslim nunau pawl tawngin an hmaiah thusim nak aneiih. PM Singh cun ziangvek sakhua leh ziang vek biaknak khalin midang biakmi Sakhua a hmuhsuam in a nautat ding asilo ati. PM Singh hi tui kandungih a lung an zai hnua ah  Public Function vekih mipi hmaiih a thu sim hmaisa bik nak asi.   PM Singh hin tui kandung zarh ah khan Belize President a rak kawmzo ih. PM Singh cun  Muslim pawlih tikcu pawimawhbik Milad-un-nabi ih an kawmnak hmunah hithu hi sim in.  India ram danpi in mitinkim maiduh zawng sakhua bethei dingih zalen nak dan a pekmi cu  zo hmanih tibuai theih asilo a ti. Midang sakhua biaknak sawisel tucu India ram danpi pahbal an si ati.  

Pathian cu Kancah nak a si

(Visited 47 times, 1 visits today)

Comments

comments

Comments

%d bloggers like this: