Timtuahnak Le Ruahsannak

December 5

Nipi Ni

Timtuahnak Le Ruahsannak

Siar:

Luka 2:8-12; 21:25-28

Bawipai’ vancungmi pakhat cu an hnenah a rung lang ih Bawipai’ sunlawinak cu an parah a rung tleu.    – Luka 2:9

Kumkhat Sung Baibal:

–   Daniel 1-2

–   1 Johan 4

Kan fale nauhak an silai ahcun Christmas hlan Nipi ni netabik ihsin Christmas thlen ding zaan tiang zaanriah ei hnu ah zaantinte thinghnah kual le khuailul mei vangin Jesuh Khrih ratnak kan hmuak ttheu. Christmas carol hla sak in Jesuh Khrih suahnak thu Bible canghril tawi tete kan siar ttheu. Cuih caan cu Christmas hrangah kan thinlung timtuahnak caan hleice a si.

Asinan Christmas hmuahnak (Advent) cu cuvial lawngin a si lo. Kum zabu pali lai ih Christmas hmuahnak an ra tuah thoklai ah Jesuh ih suah cam Christmas lawm dingih timtuahnak lawng si loin Jesuh Khrih a vei hnihnak a rat saalnak kha ruahsannak thawn hngahnak tla a tel cih. Zumtu hmaisa pawl cun Jesuh Khrih rat saalnak ding thutiam parah ruahsannak le lungawi thinnomnak an nei.

Thuthangttha Luka in, “Bawipai’ vancungmi pakhat cu tuukhal pawl hnenah a rung lang ih Bawipai’ sunlawinak cu an parah a rung tleu,” a ti (Luka. 2:9). Luka in A rat saalnak ding khal, “Mi Fapa cu mero tlun in sunlawinak le a nasazetmi huham thawn a lang ding,” a ti (Luka 21:27). Hih thil cangmi pahnih in Pathian Fapa leilung ih a ratsannak thutlangpi an langter.

Latin ttong “advent” ih sullam cu “a ralai (a coming)” tican a si. Christmas hlan December thla Zarhpi Ni pawl hi Runtu Bawipa Jesuh Bethlehem ih a veikhatnak a rak ratnak kha sualsirnak le lungawinak thawn kan hmuah le kan lawmhnak caan sunglawi le sunlawinak thawn a veihnihnak a rat saalnak ding kha ruahsannak thawn kan hngahnak mangbangza tikcu caan a si. Khrih a rak ra zo! Khrih a ra saal ding!   – David McCasland

A veikhatnak Jesuh leitlun a rat lai ah,

A thuanthu cu tangdornak a si;

Asinan ra saal dingin thu a rak tiam,

Huham le sunlawinak thawn. – Sper

Khrih a rak ra zo! Khrih a ra saal ding!

(Visited 18 times, 1 visits today)

Comments

comments

Comments

%d bloggers like this: