Times Square siatsuah tumnak palik in an kham thei

Times Square siatsuah tumnak palik in an kham thei

Kan dung zarhpi ni zinglam (US ah zarhte ni zanlam) ah New York khawpi ih Times Square cu misual pawlin siatsuah an tum ih, mawtaw thawn bomb an phurmi cu palik pawlin an kham thei.

New York khawpi sung Manhattan vengih Times Square hi ram dangmi pawl hip khawmtubik a si ih, tapung cangvaihnak um thei ringring a si tiah New York Mayor Michael Bloomberg cun a sim. Micheal cun Sept. 11, 2001 ihsin New York khawpi sung hmun pakhat khat cun tapung pawl kut kan tuar thei timi hi kan ralrinbikmi a si tiah a ti bet.

Times Square bulding hmai ah mawtaw hring (dark green) pakhat cu a ra ding ih, a sung ihsin meikhu a run suak thok ruangah a kiangkap ih um pawl cun ‘meithal zian’ rim (gun powder) a nam ruangah palik pawl hnenah an sim. Mawtaw sung ihsin ‘petrol 19 liters bawm (2), nazi le battery (2) veve, propane gas bawm (tank) pahnih, wire tom le meisa muatnak thilri pawl laksuah a si.

Palik thuneitu pawl cun cuih bomb phuah tumnak cu a hlawhtlin ahcun Times Square buliding hmailam hmuahhmuah a siatsuah thei ding tiah an ti. Zarhpi tiang zohman in ‘Kanmai’ tuah’ an ti lo na’n tlawngkai nikhat ni ahcun Pakistan ram ih ‘Taliban tapung’ pawlin “muslim martar pawl hrangih phuba laknak (avenge) a si” tiah Arab website cun a run ngan. – The Star

Bangladesh in Raalkap (9) thawng a thlak

Kan dung zarhpi ni ah Bangladesh acozah thuthennak sangbik cun ‘ramri kil himtu raalkap (border guard)” mi (9) cu kum (7) thawng tla dingin thu a then sak. Hih raalkap pawl hi kum 2009 sungih raalkap bawi (army officer) mi (74) rori nazi (33) sungih an thihnak ah theihpitu asilole telpitu ti’n acozah cun a puhmawh a si.

Bangladesh acozah cun ramri kilhimtu dingih raalkap a retmi pawl cu nasazet in zohfiang a tum ih, 2000 kum ih India raalkap (16) an thihnak thuhla khal a zingzawi rero na’n India acozah in a ngaidam ruangah thil tha lo zianghman a cang suak lo. – AP

Iran in a ram sung kilhimnak tuah thar

Iran acozah cun kan dung tlawngkai nikhat ni ihsin a ram sung kilhimnak ding le ahleice-in ram dangdang in nuclear bomb a tuah ti ih an puhmawhnak, a tuahnak hmun ti ih an puhmawhnak ram cu kilhim dingin bomb le meithal thatha a tuah bet vivo.

Tlawngkai nikhat ni ah  tipi thuanthum le ramleng ihsin bomb (cruise missile) pohpoh rak kham theitu ding meithal pawl a bun thok ih, cucun boruak ih bomb cu a ratnak lamzin ah minute pakhat sungah vei 4,000 rori a rak kap man ding ti a si. Iran cun 2008 ihsin boruak ih vanzam kap theitu meithal pawl a khawl rero zo ih, leitlun ram tampi in an mawhsiat vivo ruangah kilhimnak lam ah tan a la ti thei a si. – Reuters

India in ram sung himnak ding buaipi thok

India acozah cun kan dung zarh ihsin a ram sungih khawpi hminthang hmuahhmuah cu tapung cangvaihnak lakih himter dingah palik le raalkap tampi a thlah ih, mipi tamnak hmun le lamzin hmuahhmuah ah security pawl a um ter.

US ih Times Square siatsuah tumnak thuthang ruangah Australia, Canada, New Zealand le Britian khalin kilvennak cu a hlan hnakih tha sin in tuah an tum ih, India khalin October thla ih ‘Commonwealth Games’ a hohanak dingah ram dangdang ihsin sport a phunphun lektu mi 8,000 hrangah himnak um dingin a timtuah aw.

Kan dung April thla ah Bangalore khawpi ah bomb pahnih a puak zo ih, February thla khalah Pune khawpi ah bomb a puak. Pune ahcun mi (16) an thi ih, ram dangmi (5) an thi. 2008 November thla ih Mumbai khawpi sung Hotel ih tapung cangvaihnak ruangah mi (200) hrawngin thihnak an tuar ih, India cun Laskar e-Toiba (Pakistan ih um) pawl cu a puhmawh. India cun New Delhi khawpi ih milai 16 million kilvennak dingah palik le raalkap 5,000 lai a thlah zo.

Thailand buainak an cawl hrih

Zarh (8) sung rori Thailand mipi angki sen (Red-Shirt) pawlin lamzin an zawh hnu ah Prime minister Abhisit Vejjajiva cun mipi tam sawn hih lamzin zawhnak hi a khop ngaingai thlang ih, colhter a cu zet zo ruangan cabinet ministry cun lamzin thar a hawl lohli a tul dingih palik pawl khal mipi parih thuneihnak pek an tul thlang ding tiah a ti.

Abhisit cun, ‘Lamzin thar ka ti tikah, raalkap uknak kan tul’ tinak cu a si lo” tiah a simfiang. Thailand mipi cun Bangkok khawpi sungih dawr le hotel tampi cu khar dingin a aupi ih, cucun mi (27) ih nunnak le US$ 10,000,000 tiang a hloral ter ti a si.

Abhisit cun mipi pawlin a sinak bansan ding le hril awknak thar tuah dingih an dilmi cu, “tui’ dinhmun ahcun hril awknak kan tul loih, a tikcu a rung hersuak mai ding” tiah ramdang ih thuthang ngantu pawl a sim. Abhisit cun lamzin zawhtu lakih telve nupi nu le nauhak pawl cu nasazet in ralrinnak a pe ih, mai’ umnak khua ciar ih tlung sal dingin a forh hai.

Lamzin zawhtu lakih hotu pawl cun ‘kan ram hi raalkap uknak ih nan fehpi a si hmanah kannih cu kan tlung lo dingih, hitawk ahhin kan thi lan ta ding’ tiah an ti. Asinan lamzin zawhtu pawl cu ni tampi an au zo ruangah tu dinhmun ahcun ‘bansan’ an tum ih, ziangtikah an thok sal ding ti cu an rel thei lo. – AP

Comments

comments

Comments

%d bloggers like this: