Tikhingzang Khua Thar An Vat Thok

Tikhingzang khua sung an inn ta nauhak pakhat Vaithang a phurh lai. Zuk - Salai Lal Nun Uk | Chinland Today

Tikhingzang khua sung an inn ta nauhak pakhat Vaithang a phurh lai.
Zuk – Salai Lal Nun Uk | Chinland Today

Salai Lal Nun Uk

Tahan: Tikhingzang khua thar hrangah pacang za lenglo in tui’ ni August 31 hmun an vat thok tiah thuthang kan ngah. Hmaikum ihsin lawngin a hmun ahcun um ngaingai thei ding.

“Khua hung to ding cu hmai kum lam lawngah a si ding. Cozah lam ahcun kan sim theh zo. Khawthar tonak dingah hmun ram eka 150 kan dil” tiah Tikhingzang khawbawi U Thang Za Kap in a sim.

Tui’ khawthar an hung vatnak hi khawhlun in peng (3) a hlatnak Mwe Taung le Pha Taung karlak Tonzang peng ah a si.

Tikhingzang (a) le (b) khua hi Tuilai va le Gurung va karlak ih um a si ih Tikhingzang (a) khua cu August ni (12) ah tilian tih ah an khawpawh in an thawn aw theh zo.

“Tilian lai cu kan khawsungah tai cancan tidai a luang ut au. Cumi lak ah kan thilri kan thiar ih tui’ ni tiang kan thiar aw rero. Kan lo khal tidai in in laksak theh. Zianghman tuan ding kan nei nawn lo” tiah Tikhingzang (a) khua ih um pacang pakhat in a sim.

Tikhingzang (a) khua ah phun (7) tlawng tiang a um ih August ni 30 tiang tlawng an ong thei hrih lo. Tikhing zang (a) ah inn (137) an um ih Tikhingzang (b) lole Hakhalay ah inn(59) an um.

Tonzang peng sungah khua pum ten le a then a lang thawn tul khua (17) an um. Cu pawl cu Se Bauh khua, Hmau Lon khua, Tikhingzang (a, b) khua, Fai Dim khua, Hai Hit khua, Zolon khua, Song Pek khua, Val Bil khua,Shial Lub khua, Thing Pel khua, Hing Zang khua, Tah Zang khua, Kham Zang khua, Phaitu khua, Zakzang khawthar le khaw hlun pawl an si.#

 

Tikhingzang khua pawl an beunak camp August ni 30 ih hmuh dan. Zuk: Salai Lal Nun Uk |Chiland Today

Tikhingzang khua pawl an beunak camp August ni 30 ih hmuh dan.
Zuk: Salai Lal Nun Uk |Chiland Today

(Visited 305 times, 1 visits today)

Comments

comments

Comments

%d bloggers like this: