Tikcu Caan A Thok Hlanah

June 22
Tlawngkai Ninga

Tikcu Caan A Thok Hlanah

Bible Siar Ding: Saam 90:1-17

Tlang pawl na tuah hlanah le, leilung pumpi na seemsuah hlan ihsin
Nang cu thawhnak le cemnak nei loin, a kumkhua in Pathian na si ringring.
– Saam 90:2

Tikcu le caan pawl hi an liam rang nasa. Kan neihmi caan sungah kan control theimi zianghman a um lo. A caancaan ahcun caan ih sal vek kan si ti’n ka thinlung in ka feel ttheu. Asinan caan in Pathian cu a control thei lo. Kumkhua a nungmi Pathian – El Olam – cu tikcu caan a hramthok hlan ihsin a rak um cia zo. A Maksakzetmi “KEIMAH (I AM)” Pathian cu kumkhua in a um ringring a si.

Pathian cu tikcu caan ih lenglam ah a um, ziangahtile Amah ih sersiammi a si ruangah. Kannih in kan kum le caan cu van ih a her reromi Ni (Sun) zoh in kan tah ttheu. Asinan Pathian cu Ni le thlapi a sersiamtu a sinak le cumi heel in a her reromi leilung khal tlolak sungah a thlaitu a si. Sun, zaan, thla le kum pawl cu a sersiammi in tah an si.

Pathian cu kumkhua a hmunmi le tikcu caan um hlan ih um zo a si ruangah, kan rundamnak hrangih a khuakhannak cu Adam le Eve a hmaisabik Eden duum ih an sual ihsin thokmi a si lo. Pathian hrang ahcun khuakhan lairelnak neih hmaisa a ttul lo. Amai’ lungtho tein kan sual aiawhtu dingah A Fapa Jesuh a run thlah. Thuphuan 13:8 ah, “Cuticun leilungtlun mi hmuahhmuah in sahrang cu an bia ding; asinain leilung seem hlan ihsin nunnak cabu sungih hmin khum ciami pawl cun sahrang an bia lo ding; cuih nunnak cabu cu thah a simi Tuufa (the Lamb) ih taa a si,” ti’n a um.

Eden duum thuanthu cu kum zabu tamzet a liam zo, asinan Pathian cun kan ttulsammi cu a hngilh lo. A tikcu caan a kim a ti tikah Kumkhua Pathian – El Olam – cun a rundamnak a hngak rerotu leitlun ah a khuakhannak cu a phuanglang a si.

El Olam Pathian, nunnak sunloih thiamtu ka si theinak dingah tikcu caan na tuahmi hi hmang thiamtu si dingin in bawm hram aw.

Tuni ka tikcu caan ka hman thiamnak ihsin
Pathian ziangti’n upatnak kan pe ding?

@ Ava Pennington

(Visited 26 times, 1 visits today)

Comments

comments

Comments

%d bloggers like this: