Tihaal Taktak

June 27

Nipi Ni 

Tihaal Taktak 

Siar:

Saam 42 

Zukneng in zo tidai a ngai duahdo vekin, Maw Pathian, Nangmah ka lo ngai duahdo a si.    – Saam 42: 1 

Kumkhat Sung Baibal:

–   Job 8-10

–    Tirhthlah 8:26-40

 Na ti a haal ngaingai dah maw? West Africa ram Mali ih um ka naunu Kathy ka va tlawng dah. Sunhnu veikhat cu khurkhua zoh le cuan dingih kan feh rerolai ah khuasat lam 100’F (38’C) tlunlam tiang a kai ih ka dang hmuah a caar ttheh. “Pakhatkhat in ka duh,” ka ti tikah Kathy in tidai thianternak rak ken a hngilh thu i sim ih ka bei a dong nasa. Hlat deuhdeuh kan feh tikah tihaal ih thih timi hi ziangvek a si ding timi thu ka ruat deuhdeuh.           

Netabik ah Kathy in, “Khuitawk ah kan feh ding ti ka thei zo,” a ti ih ramdang mi pawl ih hnattuannak zung ah i fehpi. Inn sung kan lut tikah thil mawibik ka hmuhmi cu tidai daiternak water cooler a si. Cahnah ih tuahmi khuat fate in tidai cu khuat khat hnu khuat khat ka in rero. Ka taksa sungih tidai a cemnak a reituk ih a ai-rawl dingin tidai tampi in ka ttul.             

Saam cangantu in taksa ih tihaalnak cu thlaraulam tihaalnak thawn a tahtthim: “Zukneng in zo tidai a ngai duahdo vekin, maw Pathian, Nangmah ka lo ngai duahdo a si (Saam 42: 1)” a ti. Saam cangantu in nasatak ih a haalmi cu Pathian, a nungmi Pathian a si (c.2).            

Hih leilung ih pek theih lomi haalmi pakhatkhat na nei maw? Diriam thei lomi cuih haalnak cu thlarau in Pathian a haalnak hi a si. Na di a lo riamter theitu hnenah va tlan aw. Tihaal pawl cu an tihaal a riamter ih rilrawng pawl cu rawll ttha in a cawm hngai a si (Saam 107:9).    – Cindy Hess Kasper 

Thudik ka haalnak cu ka di i riamter,

A Ttongkam, a nungmi sang thawn i cawm;

A zaangfahnak ruangah dangcar ih tihaal ka thei nawn lo,

Tawp nei lo a thukmi tikhur, ka ttulmi i pek. – Sanders 

Thlarau tihaalnak cu a nungmi tidai Jesuh lawngin a riamter thei.

 

Comments

comments

Comments

%d bloggers like this: