Tidamnak Rawl

March 22
Tlawngkai Nili

Tidamnak Rawl

Nannih pale pawl lakah nan fapa in ngasa lo dil sehla rul a petu nan um pei maw?
– Luke 11:11

Bible Siar Ding: Mark 7:24-30; Luke 11:5-13

A tanglam bangin thusuhnak a suak: “Rundamnak le Minaa damternak hi mi hmuahhmuah hrangah a si maw?” ti’n. Hite pahnih hi mi hmuahhmuah hrangah a si, a zumtu le ka covo a si ve a titu pawl hrangah. Canaan nunau nu in a fanu khawsia polh mi dawisuak ding a duh zia thu kha na ciinglai maw? Jesuh in a hnenah, “Rawl cu fale pawl kan pek hmaisa pei. Fale pawl ih rawl uico pek cu a dik lo a si,” a ti (Mark 7:27). Damternak le runsuahnak pawl cu Bawipa ih sim daan vek asile “fale pawl ih rawl a si”; curuangah nang tla Pathian fahniang na si ahcun nangmai’ covo rori a si ve.

Canaan nunau nu in Bawipa hnen ihsin a ngah duhmi ngah ding rori in a tumtah ih, “A si ko, Bawipa! Sikhalsehla faate pawl ih hlah taakmi rawl ttilfuan cu cabuai hnuai ih uico pawl in an ei ve ttheu ko a sisi,” tiah a ti (c. 28). Jesuh cu cuih nunau nu ih zumnak a hmuh tikah mak a tituk ih a hnenah, “Cuti ih i leh thei ruangah inn ah va tlung awla na fanu sung ihsin ramhuai cu a suak zo ti na va hmu ding,” a ti (c. 29).

Tuni ah zumtu Pathian faate mi tampi cun Khrih thiisen ih tlenzomi an sinak sungih an covo a simi tidamnak hi an el, ih an hnong a si. Culai ah misual pawl cun an nor ih cabuai tangih a ttilfuan pawl la in a taksa thinlung thlarau rundamnak an co ngah. Canaan nunau nu cu inn ah a tlung ih a fanu khawsia polh minu cu a rak dam zo ti a hmu. Tuni ah tidamnak rawl a um – nunnak le damnak – Pathian faate hmuahhmuah hrangah a nungmi le huham thawn a khatmi A Ttongkam thawngin.

Pathian Thu in na taksa ruangpum parih natnak ziangbangtuk khal a dawisuak thei a si. Tidamnak cu Jesuh Khrih sungih na nunnak ah na covo hrimhrim a si. Jesuh cu kan rawl, kan nunnak, kan damnak le kan ziangkim ih ziangkim a si. Na sualnak cu thukzet hmanseh, na sualsir in A hnenah na ra pan ahcun na sualnak a lo ngaidam ding, a lo thianghlimter dingih a lo damter ding. A Thu cu a zum ih a cohlangtu hmuahhmuah hrangah thlarau le nunnak a si (John 6:63). Amah in nunnak thar a lo pe ding. Jesuh Khrih ih nunnak, Pathian Fapa in minung pawl ih nunnak cu a thianhlimter thei ih an thinlung, an taksa, an thlarau a zate’n sersiam thar ah a thlengh sak thluh ding a si.

Zumnak nung thawn Pathian sungih veikhat tonghthamnak co ding cu kan thinlung, kan taksa le kan thlarau rundamnak le tidamnak hrangah a ttulmi umsun a si.

@ Smith Wigglesworth

(Visited 20 times, 1 visits today)

Comments

comments

Comments

%d bloggers like this: