Ti Thuknak Lamah

Ti Thuknak Lamah

By- Timothy Thian

 Hi thu hi Mission rawngbawlnak lam hawi zawngih sim cun Ti Thuknak lam timi cun Mi Hlo tamnak Hmun leh Harsatnak hmun, a thim lai tak tak lamah tiin nun zirnak kan hmang thei tla a si ding.

Ziangkhal si sehla, a Mission lam zawng si lovin, thudang deuhvin ka nunih zirnak ka dawn dan vekin rel ka tum. Hi thil hi Zisuh leh Peter lakih thleng mi a si.

Zirnak (1):   Hi caanah hin Peter cu Zisuh’i dungthluntu hnget si hrih lovin Nga kaihnak hmangih pumcawmaw mi a si laifang a si. Pumcawmnak hrangah zan var suur a vawrh. Mi taima leh hnatuan mi a si. Zangzel hi Pathian lam thil a si lo. Asinan, Pakhat hman an kai lo. Gennesaret tili ih nga kai ring ring pa a si vekin Nga um dan leh tili um dan khal thei zet ding. Sihmansehla, kha mi zan cu a hlawhsam tariai. Zisuh a tel kher kher lo ruangih hlawhsam an si hran lo ding. Cu tivek sisehla cu, zum lotu, Zisuh theilotu mi hlawhtling an um lo ding. Unau, Zisuh tel lo khalin sum hawlnak thu-hla ah siseh, thil dang dangah thiam zet mi (Expert) na si men thei.. Si khal a theih, a si mi khal tampi an um. Asinan, Hlawhsam caan a um hokhaw. Na pawrh-aw sual pang kei. Beidawn, hlawhsam leh tlaksiat hi mithepkar sung thil hokhaw.

Zirnak (2):   Peter cu a va vantha ve! Zan var ngakaih tumtu Ngakaih Expert pa a hlawhsamih a um lai takah Zisuh thawn an tawng-aw riai. Peter ih Lawng cu Zisuh in thusimnakah a hman sak. A siang ve mai! A va ropi ve! Zisuh hrangih siangtu leh ongawtu pawl cu mi vannei an si. Mi tamtak Thuthang Tha hmangih thlawsuah an dawnnakah Peter ih Lawng cu hman a si. Unau, na neih mi na siang ve maw! Tak takah cun, “Lawng dang rak hmang mai hen, mi zanvar ngakai lo kan siih phur vak lo laiih, in dil hmaisa lo bet lai,” tiin Peter kha phunnawi thei a si. Asinan, cuti vekin a ti lo. Pathian lam thil hi ziangtik hmanah va hmuhsuam pang hlah. A teltu leh tirhsiangtu lamih a tangtu si tum sawn cu. Cu cu thlawsuahnak lamzin a si.

Zirnak (3):   Zisuh hi a tlunih thil tha a tuahtu, Amah a duhsaktu leh A duhdawtu pawl ziangtik hmanah a hngilh dah hai lo. Hallelujah! A thusim a theh ve ten, Peter ih tul mi Nga a tawlrel pi. “Nga kaih kha a tha lo. Ra mai, i thluh mai aw,” tiin Zisuh’n a ti ve lo. Nga a kaih thei dan ding a sim sawn. Zisuh’i duhdawknak leh ngilneihnak hi a va ropi em! Unau, na thilti miih na beidawn kha Zisuh’n a lo theih sak hokhaw. Thin phang hlah, beidawng hlah. Amah naihtu na si ding a thupi sawn.

Zirnak (4):   Ti thuknak lamih a suur vawrh dingah Zisuh’n Peter a fial tikah, “Bawipa, zan varin kan vawrh nan pakhat hman kan kai lo,” ti cingin, “Bawipa na Thu vekin ka vawrh ding,” tiih Peter tawngkam kha a va mak em! Zisuh’i lakah a nun kha a “Zawi Thlep Thlep” rori a si. Mi tampi cu kan kaa cun “Pathian, Pathian,” kan tin an, kan nun sung muril tak tak hi A lakah a zawi lo nasa. Nun zawi – Nun kekkuai hi Pathian lawm mi a si.

Zirnak (5):   Nga tamtak an kai tariai! An Lawng hmanah a tlem lo, an suur khal a siat phah. Pathian sunlawizia an hmu. Cu tikah, Peter cun, “Bawipa, kei misual ka si, in tlansan aw,” a ti. Miin na sual tuk-aw in ti hnakin kan zual zia Pathian lakih hmufiang tahratih a lakih kan tlukluh ding hi a va thupi em! Taksa zawngih hlawhtlinnak nasa tak a co. Cu hnakih sunglawi sawn cu a Nun tak takih Zisuh a tawnnak kha a si. Unau, taksa ih kan hlawhtlinnak hnakin Nun sungrilih Zisuh kan tawn fuh ding a thupi sawn hokhaw.

Peter cu a hlawhsamnak hmun – Ti thuknak Lamah hlawhtlinnak a hmu. Cu lawng si lovin Nga kaitu dinhmun ihsin Zisuh dungthluntu leh Minung kaitu si dingah Zisuh cun a nunnak a thleng sak a si.

Unau duhtak, hi Thucah na siarnak vekin Pathianin lo malsawm hram seh… Amen.

 

Comments

comments

Comments

%d bloggers like this: