An Ti Hlehle Tuk Timen Hlah!!

AN TI HLEHLE TUK TI MEN HLAH

January Van

Company hnattuan ka si vekin ka baang thei zet. Mipa (innsang pa) ka si ruangah maw.. duattu tthatak koppi (nupi) ka neih ruangah si maw cu thei hlah, hnattuannak ihsi inn ka thlen cun tak ka kholh ih zaanriah ei cut hlan sung cu ka zau huahhi ttheu men. Kan fapa te caa a zoh lo caan ahcun kum (7) mi ka fapa te cu zaanriah ei hngahlam ah tiin ka lehpi ttheu ih caan ka hmang. Ka nupi hi rawl suan thiam zet a si ih innsang hna khalah tlamtling zet ih ttuan thei a si. Kan fapa te Tlawng a thlah, a hmuak, caa a zohpi phah ih hlei ah ka dangduh hmeh tuahbawl a thiam ngaingai. Hivek koppi (nupi) tthatak ka neih ngah hi leitlun ih mi vanneibik ka si ti cu zo ih sim le reel ttul loin ka hmufiang aw zet.

Nikhat ni simnem hrawngah towel fengin ka nu cu tak kholh ttheh ah a ra suak ih “Papa Papa zoh hnik ka ke zaphak hi. Hminsin vek a dumte a um. Ni dang ah ka hmu dah lo na’n mitu te tak ka kholh ttheh zawngah ka hmu” tiin thin bahlah zet le hnoh-aw ceem in thuthang caa ka siar rero laiah i ra sim. Thuthang ka siar laifang a si ih lak le lawh ah a Ke khal von zoh lem lo’n “ziang dang a si zik lo ho khaw, phan ding um lo maw” ti’n ka rak sawn lohli. Ma’i koppi (pasal) ti takah kan nu cun i rinsan ve zet ih a ttong a peh leh saal. “Silo Papa, ni dang ah ka hmu dah lo ngai ho khaw.. ka taksa ah ziang a um si pei?” a ti hrih hlehlo. Ka thinlung thupte sungin nunau daan si ko. Thil fate tak te khal ti hlehle in tum zet ih reel an hmang ih ti ruahnak thawn “kan zoh leh ding maw ka duat” tiin ngaihvensak loin ka um san.

Zarhhnih hrawng a rei ah kan nu cun sibawi a hmuhawknak cahlap te i hmuh ih ka hnattuan khungkhai deuh thawn amahte’h a titheimi cu amahte’n rak tuah ko seh tiin ngaihsak man loin ka um lala. Thlahnih hrawng a rei cun kan nu cu dam loin sizung ah a um. Vun cancer a nei ti a si ih cu’i a vun cancer cu a liam cia thlathum hrawngih i rak hmuh rero mi, a Ke zaphak ih dum fate ummi cu a rak si. Sibawi pawlin sizung ih tuamhlawm le ngaihvensak a ttul ih sizung ih a um a ttul an ti ruangah kan nu cu sizung to in a um.

Hna ka ttuan le a ttul, kan nu’i kiangih um le ka duh. Duh vekin thil a cang thiam si lo. Kan fapa te Tlawng thlah/hmuah a rak ttul. Company ihsin Tlawnginn ah, Tlawnginn ihsin inn ah, inn ihsin sizung ah tiin ka kahtlang rero cu a si. Nikhat hnu nikhat caan a liam vivo ih kan nu cu a nat a roh sinsin. Sibawi pawlin hitawk hmun ahcun thih lawng hmabak in a um. Khuaisak a ttul ih kan khuaisak a si hmanah rei a dam lo ding. Tuluk ram ih sizung pakhat cun sii thawn thlahnih sung cu dam dingin a tuahsak thei. Cuih sii cu a man a khung ngaingai. Rei deuh a dam na duh asile cuih sizung nan pan a ttul tiah in ti. Company ihsin thil thupi zet tuah dingah khualtlawn a rak ttul fawn. Ziang ka tuah ding ti ruat thei nawn lo khop in cau in ka um. Ram dang ah kan nu fehpi bang sehla thlahnih lawng a awh dingih a thi thotho ding fawn. Ka hnattuan thupit ter ding asile sumpai tampi ngahnak ding cu a si ko na’n cuih ka ngah dingmi sumpai hmuahhmuah in kan nu’i nunnak a runsuak thei cuang ding si lo.

Hnattuanpi pawl hnenah ka nu’i thuhla um zia cu ka ruah hai ih a tam sawn cun ram dang ih kan nu fehpi lo dingin in sim. An simmi khal a dik ve tho. Thi thotho dingmi parah sumpai tampi le ka caan ka va hmang ding a si tikah ka ngah dingmi sumpai hi thupi sawn ah in ruahsak cio. Zaankhat cu thu tampi ruat ciamciam in thinlung tthencatnak ka tuah. Cucu dam sung nun tawite ah (caan malte sung a si hman ah) ka nupi le ka fapa te thawn nuam zet ih caan hman ding hi a si. Cuti’n sibawi pawl ih simnak vekin nikhat ih tingtel sumpai cemnak ding hmun, Tuluk ram ahcun kan sungkua in kan va feh. Nitin teih kan nu thaw’i caan hmantlang hi a nuam in sunglawi ka ti tuk. A dam sung caan hmuahhmuah cu nuam zet le aipuang zetin kan hmang khawm ih sumpai ziangzat khal ih lei theih lo a si zia ka hmu sinsin. Hmanseh caan a rak tlai tuk zo. Thlahnih cu rei lo teah a rong kim ih ka nupi cun kan fapa te thawn in tansan ta.

Tawkfang caan a hong reiin thiang riahri le fai kelki teih ka hmuh ringring mi, kan inn cu baal an kai thlang. Rem thlepthli teih hmuh hahdam zetmi, innsung thilri pawl khal ti reihreih ah an cang. Kan takkholhnak room sungih Ha tthuahnak tivek retnak donte pawl khal pawl mengmeng ah an cang. Mileng pindan tlunlam ka hon zoh tikah maimom burang vek tla hmuh ding an um thlang. Khuitawk in ka tuah thok dingih ziangti’n ka rem ttha ding ti khal ka thei cawk lo. Kan pafa ih ei ding ti le rawl ka suan tikah a thaw thei si lo. A thaw lo ti men lawng silo, keimah hman in ka ei thei lo ih ka fapa te khalin a ei thei ve lo. Kan nu cun a nunnak a liam hlan teah nangmah le kan fapa te ih duhmi ei-in pawl cu cumi dawr ah ka lei ttheu. Cunah na lei dingih cuti’n khati’n na suang ding, ciite cuhmuah na phulh ding, a tii cu hmuah na tuah ding tivek in caa thawn felfai takin i tanta. Ca sung um vek cekci’n ka thlun ih ka suang, ka tuah ko na’n cu cing khalin kan nu’i kutsuak vekin a thaw thei cuang lo.

Hnipuan sawp dingin thil sawpnak cet sungah hnipuan pawl ka thun. Satpiaphut zianghmuah ka thun ding, ziangmi button ka hmet ding tivek khal ka thei lo. Ngaite cun kan thil sawpnak cet hi a thar lai ah kan nupa ih kan leimi a si ih a hman daan khal kan rak simzirhawk rero mi asina’n tu ahcun a hman daan pakhatte hman ka thiam nawn lo. Hmun phiah a rak ttul. Hnawm ruhnak cet tivek ka hmang thiam fawn lo. Kan phartlang pawl an baal tuk fawn. Ka daih aw lo rori cu a si. Kan nu in ziangtluk in so innsang a rak thianfaih ih fai vengveng le tleu perpi ih a ret ringring thei! Thaw zetzet in rawl in suansak ih ka taksa khal a rak ti hmianghmi ringring na’n tu ahcun nikhat hnu nikhat ttawl deuhdeuh in ka hmu aw vivo. Innsang ih Nu a thupit zia hi awww… ti ruangro phah in.

An ti hlehle tuk ti men hlah.

(Visited 52 times, 1 visits today)

Comments

comments

Comments

%d bloggers like this: