Thutiamkam, Thutiamkam

August 21

Zarhte Ni 

Thutiamkam, Thutiamkam  

Siar:

Seemtirnak 12:1-4; 21:1-7 

Sarah cu nau a keng ih Abraham a tar zawngah fapa a hring. Pathian ih a sim ciami tikcu caan a thlen in fapa an nei.     – Seem. 21:2 

Kumkhat Sung Baibal:

–   Saam 107-109

–   I Korin. 4 

Mi pawl in, “Thutiamkam, thutiamkam,” ti’n thawpi suah phah in an sim asile a um daan cu mi pakhatkhat in a thutiamkam a pelh ruangah an hrum-ainak a si ttheu. A vei a tam deuhdeuh asile riahsiatnak le thinbangnak a karh deuhdeuh. 

Pathian in a thukammi a pelh ti’n na ruah caan le na tuar caan a um dah maw? Himi cu ruah lopi in atu le tu a rak um ttheumi lungput a si.     

Pathian in Abraham hnenah, “Miphun tumpi ah ka lo tuah ding” (Seem 12:2) ti ih thutiamkam a neih le Isaac a suah hi kum 25 rori a rei (Seem. 21:5). Cumi caan sungah Abraham in Pathian hnenah fa a neih lo thu a sut man (Seem. 15:2) hlei ah a nupi ih salnu hnen ihsin fa a rak nei (Seem. 16:15).           

A nunnak suk le so hmuahhmuah ah Pathian in Abraham hnenah fapa a pek ding thutiamkam cu a theihter cingcing ih, rin-umzet in a thu thlun ding le Amah zumfek ih rinsan dingah a forhfial ringring (Seem. 17:1-2).           

Bible sungih Pathian thutiamkam pawl kan sim tikah hnangamnak, raaltthatnak, le kan ttulmi ngah dingin kan nunnak cu Pathian ih thutiamkam ah le A kut sungah kan ret aw. Kan hngah rerolai ahcun Pathian in a hngilh si pei maw aw, tiah kan ruah caan tla a um. Sikhalsehla rinsan ringring aw, a ngaingai a ra can theinak ding cu A thukammi parih kan tthum awknak parah a um. Anih cu rinsan tlak a si ringring. A thutiamkam a hngehnak cu kan thinlung sungah a si ih, a kim ding tikcu caan cu A kut sungah a um.    – David McCasland 

Bawi Jesuh a thukamnak bangin ka zum,

Zum sualnak ttihnung thlisia kha hrang hmanseh;

A nungmi Bawipa Pathian thu in ka neh ding,

Pathian thukam cia bangin ka zum.    – Carter 

Pathian ih thukammi hmuahhmuah cu a fimnak, 

a duhdawtnak le a huham ruangah a kim saal ttheh zo.

(Visited 19 times, 1 visits today)

Comments

comments

Comments

%d bloggers like this: