Thuthangca Pawl Censor Tuah Nawn Lo Ding

Burma Ram Feh Dan Ding Part XXXIV

Dr.Runbik Taithio

 

Thuthang Ca Pawl Censor Tuah Nawn Lo Ding

Tulai ah kan ram ihsin thuthang thatha kan thei vivo i, lungawi a um nasa.Tui a netabik tla cu newspaperpawl censor an tuah nawn lo ding ti a si. Cauk dang khal a tel ding. Himi pawl khal hi nikum August thla i President Thei Sein le Pi Suu Kyi pawl i tuan tlang an tum thu an rel ruangah a si kan ti thei ding.

Himi netabik dan hin ziang a ti danglam ding ti le kan thuthang ca pawl ah thu thatha an ngan thei ding. Asinan thuphan an ngan ahcun dan thotho vin a hrem ding. India ram i kum 19 sung thuthangca tuahtu ka si ruang ah democracy ram i thuthangca an tuah danpawl cu ka thei zet pam ding ti cu in theih pi ko ding. A tul kan ti mi mi kan ngan i, kan ngansual ahcun kan mah in kan tuar ding a si mai.

Tulai ih Mizoram i hminthang bik Vanlaini editor Pu K.Sapdanga ih tuhlan kum 15 lai i a tong mi  pakhat ka thei sal. Zianga si ti le Vai journalist hminthang  zet thawn an be aw i, cu pa cun Mizo journalistpawl hin thubuai ziang ti vek nan nei tiin a sut. Pu Sapa cun kum 1 ah vawi khat tal an neih can  a um ko a ti. Cutikah cu pa cun newspaper ngaingai nan si hrih lo a si hi, kan nih thla tin deuh thaw in thubuai kan nei ring ring a si si a ti.

Kei tla vawi khat cu nunau kaih (pawngsual) thu ngan ruangah thubuai ka nei dah. Cuvek a thlen tikah nunau pawl i hmin ngan lo ding kha kan rak ngan pang i, police thana i feh a tul i, bail lak a tul. Cui tlun ah vawi 3 lai cu court ah feh a tul i, a tawp ahcun nunau pa hnen i ngai dam kan dil ruangah thawngtlak ngaingai cu a tul ta lo. Tiduh mi cu censor a um nawn lo nan thuthangca ngan pawl hi an ralrin a tul thotho.

Himi um zia cu India newspaper tumpi pawl le Mizoram i thuthang ca pawl hi tthim theih a si lo.Kan nih cun sum kan nei lovi,shehne (lawyer) kan san thei lo.Cui tlun ah thudik sicing khal in kan ngan kan tthuat mi pawl hi baiakinn ah maw,Vanapa Hall ah maw, lammual ah maw kan hmu cingcing ding a si ruang ah thudik khal tampi kan ngan ngam lo. Vai pawl cu Calcutte le Delhi khua pawl cu a tum tuk ruang ah an ngan mi pawl hi an hawlawk hrim lo ah cun kum khat ah vawi khat hman an hmu aw lo ding.

Cui tlun i an journalist pawl an ral that nak cu thubuai an neih tik ah an company pawl in lawyer an san sak thei i, cuiruang ah an ral a tha,sum thawng sawm an cem khal ah an poi ti lo.

Burma ram khal journalist le editor tha tha,publisher milian tha tha an um ding ruang ah ral bawi pawl le hotu pawl khal in vawkpi lal len cun an cang ngam nawn lo ding ti in ruat phawt she la.Arab spring cu a zar kan to ve a si a ti thei thlang e.

(Visited 24 times, 1 visits today)

Comments

comments

Comments

%d bloggers like this: