Thuthang lawrkhawm…SBT

13th September, 2009

Venezuela In Russia Vanzam Lei Ding.

Ni 10 sung Asia, Europe, leh Africa rampawl a tlawnhnu ah Venezuela President, Hugo Chevez cun  Russia ralthuam Missile Km 300 ih hla kapban leh Raldo nak Tank T-72 leh T-90 pawl an ramin an leiding thu a simih, Hi Missile leh Tank pawlhin an ram a thlencingding thu khal a sim.
President, Hugo Chevez cun hi an leidingmi ralthuam pawlcu ramdang kahnak ding leh donak ding a silo ih an ram humhim nakding lawngih hman dingmi a si a ti. Missile hi zianghmuah an leiding ticu a simduhlo. Colombia in an ramsungih US Ralkap pawl um theinak a pek ruangah  Venezuela ramkhal in an ram kilhim naklam ah timtuah awknak a neithar ih ruah a si.

US In Afghanistan Ah Ralkap Kuat Bet Tum

US Ralkap hmunpibik Pentagon thupuangtu Geoff Morrell cun  Afghanistan ramih US ralkap kuatbet dingih ruahhman nak an neih micu  Defence Secretary, Robert Gates in a pawmpi zamrang a zumthu a sim. Geoff Morrell cun  Afghanistan ih US ralkap kuatbet dingih ruahman nak an  neihnak sancu Al-Qaida leh Taliban pawlin Bomb an puah ringring ih mipi tamtuk an thih ruangah  ralkap tamdeuh kuatbet a ttul a si a ti. An ruahman nakvek a si le ralkap 3,000 kuatbet an tum.
Himi laiah US ram mipi tamzet cun Afghanistan ramih an ralkap kuatbet dinghi an duhlo nasa ih, Senator, Carl Levin cun  Afghanistan ramih an ralkap an kuatbet hi ttha a tilo thu a simih tui a umcia pawlkhalin Taliban pawl dolo in Afghanistan ram mipi tthanso nakding lamzin phunphun hawlsak sawn haisehla a duhthu a sim.

Australia Ram Luh Ruk Tum Kai

Mizansun ah  Australia ramih luhruk tum minung 83 cu Australia Palik pawlin an ram thlanglam tipi kapah lawngthawn an kai.Hi pawlhi an lawngthawn  Australia Palik pawlcun  Asmore tikulh ah tihni sunih sin an hmucia ih Australia ram an luh veten an rakkai a si tiah Australia Home Affairs Minister, Brendan O’ Connor cun a sim.
Tihni sun khalah Australia ramih luhruk tum Afghanistan mi minung 56 cu Indonesia ah an kai zo, Australia ram thu neitu pawlcun  tuikum sungah a thauptei an ramih lutru hi minung 1,000 lenglo an kim an zumih, tukhal ah a thuptei luhruk tum tikcu remcaang hngak Indonesia ah tamzet an um tiah an sim.

US In North Korea Thawi Biakawk Rem A Ti.

US State Department Thupuangtu Phillip Growley cun  Nuclear ralthuam thuhla ah North Korea thawi biakawk nak neihcu US in rem a tiih, Asi nan a tikcu caan cu bikhiah nak a um hrihlo a ti. Hi biakawk nak dingthu hi leitlun ram 6 Britain, France, Russia, Germeny, China leh US pawlthawi Nuclear ralthuam thuhla ih biakwknak an neih zo theu mivekih biakawk nak hi neih a si ding tiah a sim.
North Korea in tuikum May thla ih Nuclear ralthuam a test ruangah leitlun ram dangdangin an sawisel zetih, cu ruangah  Nuclear ralthuam thu relnak ah North Korea hi a telduh nawnlo ih, Asi nan tu ah an ram i leh in tirawl an harsat duahdo thlang ruangah US thawi biakawk nak neih hi a runduh sal a si.
Himi laiah US cun Iran ih duhdan vekin rualrem awknak hawlih Iran thawi biakawknak neih a duhthu khal a simih, US Assistant Secreatry Of State for Public Affairs, P J Growley cun  Iran thawi langtlang zetih biakawk nak neih a duhthu a simih, Asinan Iran in biakawk nakding thu a duhdan vekih ruahman nak a tuahcia mi ram dangdang hnenih a kuat zomi pawl vekih biakawk nak neih dingcu US cun a pawm theilo ding a ti.Biakawk nak neih ding thu ah Nuclear ralthuam leh a thilri  thu ih baklo thudang telter cih ih biakawknak neih dingcu US cun a pawmlo ding a si a ti.
Growley cun Iran Nuclear ralthuam thuhla ah  Britain, France, Russia, China, leh Germany thawi thurel nak neih cing a beisei thukhal a sim. Hi an biakawknak ding thu ah Iran in US duhdan vekih biakawk nak neih a duh a si ah cun tuithla cem zawngih UN General Assembly neih hlanih biakawk man an beisei a si.

9/11 Kum 8 Kimnak Ni An Hmang

Kum 2001 September 11 ih Al-Qaida pawlin  Vanzam thawi an ttaih siat sawprawp thluhmi New York ih World Trade Center leh Pentagon, Pensyllvania tluk sawprawp nakhmunpi Ground Zero ah  himi ni hngihllo nak leh tuarnak tikcu caan cu hman asiih, Petagon ah hin US President, Barack Obama leh Defence Secretsry, Robert Gates in an hmanpi ih Pensyllvania ih himi tikcu caan hman nakah hin US Secretary Of State, hlun Colin  Powell khal a telih,  Ground Zero ah Vice President, Joe Biden in a telpi a si. Himi rualah  Afghanistan ranih an khawpi Kabul kiangih US ralkap pawlih umnak hmunpi Bagram Base khalah 9/11 hngilhlo nak tikcucaan hi an rak hmangve.

Taiwan Preident Hlun Damsung Thawng Tlading

Taiwan President hlun Chen Shui Bian cu i ruk thuhla ruangih thiamlo coter a si ruangah  Taipei Court cun damsung thawngtla dingin tuisun ah hremnak thu a pe. President hlun Chen Shui Bian hi kum 2000 leh 2008 karlak ih President a ttuansungah khan  nawhthuh US dollar Million 15 lenglo a la tiah Court cun a sim.
A mai rualah a nupi Wu Shu Chen khal himi thu ih thimlo coter ve thotho a si ruangah damsung thanwgtla dingin Court cun hremnak a pe thotho, ih an nupa in damsung thanwgin ah caan an hmangding a si. President hlun Chen Shui Bian cun an puhnak cu thudiklo a siih, Politics ih a mah phumhlo an tumnak a si tiah a simve ih Taiwan ram roreltu Kuomintang Party cu  China Cozah hnenih tlaktlum a duh ruangah keimah in  diklo zetin ka tuar a si a ti.

China Leh US Ttuan Tlangding

US Secretary Of State, Hillary Clinton cun  China leh US cu misual donakah hna an ttuantlangding thu a simih, Hillary Clinton cun leitlunih ram ropi leh thilti thei pahnih US leh China in misual donak leh thildang ziang tinkimih hna kan ttuan tlang theiah cun tthanso nak lamzin tampi a suah a beisei thu a sim.
Hi thuhi China Congress hotu Wu Banggan in US a tlawnnakih a simmi a siih, China leh US rualpi tthat awkleh pehtlaih awknak ttha neihcu Obama ih Cozah cun a duhbik mi a si tiah Hillary Clinton cun a sim.  Hillary Clinton cun China leh US cu minung diknak covo thuhla ah sawisel awknak neih phahphah ttheu hman sehla himi in ram 2 hnattuan tlangnak ding lamzin a kham cuanglo ih, China leh US cun Iran leh North Korea ram 2 Nuclear ralthuam tuahtum thu leh leitlun tikcu hlumcak tuk leh sumpai dinhmun tlaksiat nak do nakding thukhal ah ttan tlang vivo leh hna ttuantlang vivo beisei a si a ti.

Australia In Japan Leh South Korea Ah Gas Kuat Ding

Australia ramih US Oil Company Chevron cun  Japan leh South Korea ah  Gas dollar Billion 60 man hrawng a kuat lut thlangding. Australia ramih Chevron Gorgon Project ihsin  Japan leh South Korea in Gas an leinak ding thuthlunghi, Japan , South Korea leh Australia in an tuahih, Hi an thuthlung tuahmi vek a silen Australia Cozah in  Japan ih Osaka Gas Company  hnenah  kum 25 sung kumtin Gas tonne Billion 1 leh 3,75,000 a kuat ringring dingih, Himi sung thotho ah  Tokyo Gas Company hnenah Gas tonne Million 1 leh 1,00,000 a kuat ringring ve ding. Chevron hin South Korea in GS Caltex hnenah kumtin Gas tonne 5,00,000 khal a kuat ringring ve ding.
Australia Prime Minister, Kevin Rudd cun  Japan leh South Korea thawi Gas ih sumdawn tawnawk nak an tuah theicu a lungawi thu a simih, Himi in Australia ramih sumpai lakluh nak a titam dingih  tuihnu lam kum 25 sungah Australia cun Japan leh  South Korea ram 2 hnenah Gas dollar Billion 70 man a kuat thei a zumthu a sim. Australia hin kandung thla khalah Gas dollar Billion 50 man ih sumdawn tawnawknak thuthlung  China a raktuahpi zo.
Himi laiah Australia Cozah in ramdangih Gas kuatsuak a tum ruangah Environmentalist pawlcu an lung a awilo zetih, Cozah in Gas laksuah a tumnak hmun  Barrow Island cu a siatbal thluh dingih ramsa phunkim tamnakbik hmun a si fawnih  a khawro thluhding ti an phanthu an sim.

Iraq Bomb Puak

Tuizingah Iraq ramih Kurdish miphun pawlih um tamnak hmun Wardek khua ah thihcilh bomb a puakih minung 18 an thiih midang 20 lenglo in hriamhma an tuar. Hi bomb puah tupa hin a mawtaw thawn bomb cu phurin mipi punkhawm nakhmun a panih mipi lakah a bomb a tipuakih a mahkhal a thicihve tiah Palik pawlcun an sim. Himi ih tlunah  thihcilh bomb tipuak tumtu midang pakhat khal a mawtaw thawi mipi an panlai ah  Kurdish ralkap pawlin an kapthat man.
Hi bomb puahnak hmun Wardek khua hi Arab leh Kurdish pawl thu neih an cuhawk nakhmun a si ruangah Arab Tapung pawlih tipuah mi a si an zum. Iraq khawpi Baghdad leh Mosul hrawnghi misual pawlin buainak an tuah ttheunak hmun a si ruangah mipi an thla a phangzet theuih kandung thla khalah misual kuttuar in minung 28 an thizo.

Swine Flu Sii An Tuah

Swine Flu nat khamnak leh tidamnak sii Panflu-One cu  Sinovac Biotech Ltd in a tuahsuakih China ramih hman hmaisa bikdingin ruahman nak an nei. China Cozah cun himi sii hi hmaizarh hrawngih mipi hman theihdingih zuarsuak a tumthu a puang.
Himi laiah World Health Organization (WHO) thupuangtu Gregory Hartl cun theihfiang nak ngaingai cu a umlo nan  hi sii hi minung taksa hrangah tthatlo nak a nei mentheiih cu ruangah fimkhur zetih hman a ttul dingih, a si nan  mi tinkim taksa parih tthalo dingcu a si cuanglo ding a ti. Hi sii hi nauhak kum 3 ihsi Upa kum 60 karlakih hmanding a siih, China Cozah cun a zohfiang zo ih, China ramsungih tuahter a siannak thu khal a suahzo. hi sii hi tui thla sungah minung Million 5 hrang tuahsuak man an beisei thu an sim.

Ralthuam Phur Vanzam India In A Thlah Sal

Kandung colhni sunih India ram Kalkota khawpi ih Petrol thundingih ttum UAE thilri phurtu Vanzam India Cozah in a rak kaihmi cun  Defence leh Custom pawlih lungkim nakin tuisun ah zuansuak tersal a si. Hi Vanzam hin ralthuam meithal leh thilri dang tamzet a phurh ruangah India Cozah cun a thuhal fiangtei zingzoi dingin an rakkai tangih an theihduh mi leh a thuhla fiangtei an zinzoi hnu ah a fehtum nakhmun China Xianyang khua panin tuisun ah an zuangsuak tersal a si.
India Defence thupuangtu cun hi Vanzam ih thil phurh mi leh a hna ttuantu minungt 10 pawlih thuhla theih ttulmi pawlcu  Aviation thu neitu pawlin  famkim ten an zingzoi thluh ih, Kandung tlawngkai nikhat ah India Cozah cun UAE ram hnenah an ram Vanzam in India Cozah dan a pahbal a si tithu khal an simzo ih, India leh UAE ramhi laicin aw tthazet an si ruangah theihthiam awknak sangzet thawn hithu hi relfel a si a ti.
Hi Vanzam in ziangvek ralthuam a phur, ziangruangah a phur, ziang a duhnaksan  ti leh a thuhal famkim cu India Aviation hotu pawlin an sim fiang duhlo.
(Visited 55 times, 1 visits today)

Comments

comments

One Comment

  1. Thanks for posting the article, was certainly a great read!

Comments

%d bloggers like this: