Thupte Nun

June 29
Tlawngkai Ninga

Thupte Nun

Bible Siar Ding: Matthai 6:1-8

Milai cun a lenglam thil nan zoh, Kei cun an thinlung ka zoh a si.
– 1 Samuel 16:7

Shakespeare in veikhat ah hiti’n a rak sim dah, “Leitlun pumpuluk hi donhleisang (stage) a si ih, minung pawl cu lemcangtu pawl (players) an si,” ti’n. Cumi hi a diknak lai a um men thei, asinan Christian pawl an rung um tikah, Pathian cun zumtu pawl cu lemcangtu (actor le actress) pawl vekin biaknak sungih cangvaitu men si ih hmuh ding a tumtah lo.

Thil ttha tuah ruangih mi ih upat co ding, Pathian lungkimnak ngah dingih zuam timi hi a palhmi lungput a si. Jesuh sanlai ih mi pawl cu cuvek fang a si ti’n hmuh an theih. Biaknaklam hruaitu pawl in an thil ttha tuahmi pawl in mipi thinlung laak an tum. An hiarhaalbikmi cu mipi pawl ih uar le upat ding lawng hi a si.

Jesuh in hih nunzia hi a dem ih kan zumnak kan nunpi daan ding lamzin thar in khihhmuh: cumi thupte nun (the secret life) hi a si. Cuti’n kan ti tikah ka zumnak hi midang ih theih lo dingin thup ding tinak si loin thil ttha kan tuahmi in kan sinak zate in hmu thluhtu El Roi Pathian lungawiter ding sawn hi a si. Jesuh in hih thu cu mipi ih nelzetmi tahthimnak thawn a sim. A dungthluntu pawl hnenah peknak, thlacamnak, le rawl ulnak pawl hi mi ih theih le thangthat hngai seh ti’n hnganlang ih tuah loin a thupte ih tuah dingin a zirh.

A thupte ih thiltuah hi a ol lo. Kan zuamnak ih man midang in hmintthatnak an comi khi naazet in kan tuar thei men. Asinan El Roi Pathian in kan zuamnak le kan thinlung a hmu thluh. Amah ih in pek dingmi zuamman laksawng (reward) cu mipi ih lom le thangthat hnakin a ttha sawn ringring.

El Roi Pathian, tuni ah mi ih thangthat ding hawl loin ka thinlung takte’n
Nangmah lo rian dingah ka pum ka pe a si.

Hnattuan ttha ka ttuanmi hi ziangmi ih thapeknak ruangah a si?
Mipi ih thangthat duh sawntu si lo dingin ziangti’n ka um ding?

@ Ava Pennington

(Visited 30 times, 1 visits today)

Comments

comments

Comments

%d bloggers like this: