Thuneihnak tangih Pum-apnak

July 29
Zarhpi Ni

Thuneihnak tangih Pum-apnak

Bible Siar Ding: Galati 5:16-25

Daihnak in petu Pathian Amah in famkimzet in lo thianghlimter sehla, kan Bawipa Jesuh Khrih a rat saal tikah nan thlarau, nan thinlung le nan taksa, nan ziangzongza in mawhnak nei lo ah lo tuah hram seh! – 1 Thess. 5:23

Pathian in kannih cu Jesuh Khrih in thinglamtah parih a tthehsuakmi hnattuannak ruangah midingfel ah in tuah zo. Sihmansehla, kan khuaruahnak, kan ttongkam, le kan tuahmi pawl hi Pathian ih in timi kan si ding thawn cu a mil aw thei lo ttheu.

Zo kan si timi le zo vekin kan nung ding timi pahnih karlak ih mil-awknak le si thei ringring lonak in kan tthanso dingmi a dawnkham. Duhdawtnak, thinsaunak, tthatnak, mah le mah uk-awk theinak nei dingin kan zuam. Zuam sinsin ding, hnattuan taima ding, ttha sinsin dingin thutluknak kan nei. Cucing cun atu le tu kan tlu cingcing.

Kanmai’ zuamnak in kanmah le kanmah midingfel kan si ti kan ti awk ngam lo vekin kanmah le kanmah midingfel ah kan tuah aw thei ve lo a si. Duhdawtnak, lungawinak, thlangamnak, thinsaunak, tthatnak, rin-umnak, nunneemnak, mah le mah uk-awk theinak timi pawl hi “thlarau rah” an si (Gal. 5:22-23), ziangahtile cumi cu Thlarau Thianghlim in kan sunglam nun ih a tthansotermi an si.

Himi hi kan zuam natsat ruangah a si lo; Pathian thuneihnak hnuai ih pum-apnak ruangah sawn a si. Cutik lawngah kanmah hmangin Pathian in midang parah a duhdawtnak a langter thei ding, A lungawinak in pe ding, asilole kan sungah kan minung sinak ih titheimi lengin thinsaunak a umter ding.

Yahweh Mekoddishkem hnenih pum ka ap awk asile Amah in in thianghlimter dingih A Fapa bang deuhdeuh ko in tuah ding. Kan mizia khal Amah in a phuan cia zo bang khan; Khrih ah sersiam thar kan si ding.

Yahweh Mekoddishkem, tuni ka nunnak sungah Na Thlarau ih hnatuannak parah hngat aw thei dingin in bawm hram aw.

Minung sinak ih ka neih thei lomi rah rah thei dingin kan ziangmi si Thlarau Thianghlim hnenah ka ap awk ding?

@ Ava Pennington

(Visited 16 times, 1 visits today)

Comments

comments

Comments

%d bloggers like this: