Thukammi Famkim

January 22
Nipi Ni

Thukammi Famkim

A tiam cia vekin Bawipa in Sarah cu a thluasuah ih, Sarah cu nau a keng ih Abraham tar zawng ah fapa a hring. Pathian ih a sim ciami tikcu a thlen in fapa an nei.
– Seem. 21:1-2

Bible Siar Ding: Seem. 21:1-20

Isaak le Ishmael, thutiamkam ih cithlah le tisa daan ih cithlah inn khat ah an um tlang. Harsat le buainak tikcu caan a thleng, ziangahtile Ishmael in Isaak a hnaihnok ruangah. Hih thu ahhin Abraham ih cithlah Isaak ih thu na hmu fiang ding. Tisa nunnak le daan cu hlonhlo a ttul ringring zia na hmu ding. Cule Sarah in, “Hih sal nu le a fapa hi dawi aw. Ka fapa Isaak ih a co dingmi ro hi hih sal nu ih fapa in malte hman dai hlah seh,” tiah a ti (Seem. 21:10). Cutikah Abraham cu a thinharzet. Tuah dingah a harzetmi a si, sikhalsehla tuah ding rori a ttulmi le a si fawn. Na tisa duhhiarnak thihter a si hlan lo na thinlung sungah iksik nahsuahnak, buainak a um ringring ding. A huham in a lo uk ih a lo kilkhawi tik lawngah na nunnak cu daihnak le lungawinak in a khat ding.

Isaak cu tlangval mawi mi piangzet ah a hung cang. Kum kul hrawng a ti ah hniksaknak dang pakhat Abraham nunnak ah a thleng saal lala. Pathian in a hnenah, “Na fapa hruai awla, ka lo hmuh dingmi tlang parah raithawinak ah hlan aw,” a ti (Seem. 22:2). Hih thu hi Abraham in midang a sim dingah na ruat maw? Zohman a sim lo ti ka zum ngam. Isaak cu a thinlung laimuril a si, Pathian in amah cu na cithlah a timi a si. A tuah dingmi ziangso a um? Pathian in fapa a pek thei vekin Pathian cun a fapa cu thihnak ihsin a nunter saal thei ti a zum ngam a si. A nupi Sarah a sim maw? Sim lo. An innsang ah thinharnak nasatak a thleng. Hih thu hi amahte lawngin a tuar ti ka zum. Pathian in na nunnak ah thuthup a lo sim tikah zohman sim hlah aw. Minaa parah kut suangih thlacam ding a lo fial a si khal le zohman sim hlah, feh in tuah mai aw.

Abraham in a fapa neihsun Isaak cu raithawinak ah a pe thei. Na tontehmi harsatnak parah thazaang ka lo pe duh. Mihrek in an tonmi buainak cu midang hnenih a thlengmi hnakin har cuangah an ruat ttheu. Harsatnak cu na nun thianghlimternak dingah a si. Pathian in hman a lo duh ruangah meisa in a lo hniksak taa a si. Hniksaknak tong dah lo pawl cu tuar theinak an nei lo ding. Sikhalsehla Jesuh in kan tuar thei lo khop tiangin hniksaknak in tuarter lo ding (1 Korin 10:13). Pathian in Abraham a hniksak hlanah a tuar thei ding ti a thei cia, nangmah tla na neh thei ding ti thei cia in a lo hniksak a si.

Hniksaknak tong ding mi kan si. Sual hua ding le dingfelnak duh ding mi kan si. Pathian thawn pawlkom aw ringring ding mi kan si. “Amah sungah khua kan sa” (Tirh 17:28).

Hniksaknak ih manneih zia na theih asile Pathian hnenah ziangdang hnakin lungawithu na sim thei ding.

@ Smith Wigglesworth

(Visited 30 times, 1 visits today)

Comments

comments

Comments

%d bloggers like this: